އެމެރިކާގެ ހަނގުރާމަމަތީ ބިޔަ މަނަވަރާއި އޭގައި ތިބިހާ ބަޔަކާއި އާލާތްތައް ނައްތާލާނެ ކަމަށާއި، މަނަވަރު ޔޫއެސްއެސް އަބްރަހަމް ލިންކަން ‘އަޑިއަށް’ ފައްތާލުމަށް އީރާނުގެ ޑްރޯން އުފުލާ ބިޔަ މަނަވަރު ކަމަށްވާ شهید بهمن باقری (އައްޝަހީދު ބަހްމާން ބާޤިރީ) އޮތީ ތައްޔާރީ ޙާލަތުގައި ކަމަށް އީރާނުގެ މީޑިއާއިން ބުނެފިއެވެ.
އެމެރިކާއިން ދެންމެދެންމެ އީރާނަށް ޙަމަލާ އެއް ދީފާނެ ހެން ހީވާ މި ދަނޑިވަޅުގައި އިސްލާމިކް ރިވޮލިއުޝަނަރީ ގާޑް ކޯޕްސް އިން ވަނީ ޑްރޯން ކެރިއަރު ނެރެ، ދިފާޢީ ބާރު ވަރުގަދަ ކޮށްފައެވެ. މިއީ ޒަމާނީ އެންމެ ވަރުގަދަ 60 ޖެޓް އެއްފަހަރާ އުފުލޭ ވަރުގެ ބިޔަ މަނަވަރެކެވެ.
ޝަހީދު ބާޤޭރީ އަކީ ދެވަނަފަހަރަށް ތެޔޮ ނާޅައި 22000 ނޯޓިކަލް މޭލަށް ދަތުރުކުރާ މަނަވަރެކެވެ. އެހެންކަމުން މިއީ އީރާނުން އެމެރިކާ އަށް، އަދި އެނބުރި އީރާނަށް އާދެވޭ ވަރުގެ މަނަވަރެކެވެ. އެމެރިކާ އާއި އީރާނާއި ދެމެދުގައި ވަނީ ގާތްގަނޑަކަށް 7260 ވަރަކަށް މޭލެވެ. މި މަނަވަރަކީ އީރާނުގެ އެންމެ ޚާއްސަ ޑްރޯން ކެރިއާ ހަނގުރާމަ މަނަވަރެވެ. އައިއާރްޖީސީގެ ބިޔަ ލަޝްކަރާއި މި މަނަވަރު ގުޅުނީ މިދިޔަ އަހަރުގެ ފެބްރުއަރީ މަހުގެ 6 ވަނަ ދުވަހު ޢައްބާސް ބަނދަރުގައި ބޭއްވި ރަސްމިއްޔާތެއްގައެވެ.
ޢައްބާސް ބަނދަރަކީ އީރާނުގެ ދެކުނުގައި، ޚޮރްމޫޒްގެ އުތުރު އައްސޭރީގައި އޮންނަ ސިޓީގައިވާ ބިޔަ ބަނދަރެކެވެ. އެތަނުގައި އަސްކަރީ ބިޔަ އެތައް މަރުކަޒެއް ވެސް ހުރެއެވެ. ޢާންމުކޮށް އަލަށް އުފައްދާ ހަނގުރާމަ މަތީ މަނަވަރުތަކާއި ސަބްމެރިންތަކާއި ޑްރޯން އުޅަނދުތައް ހުންނަނީ އެތާނގައެވެ.
ޝަހީދު ބާޤޭރީ 22،000 ނޯޓިކަލް މޭލަށް ދިގުކޮށް ޑިޕްލޮއިމަންޓް ކުރެވޭނެ ބޯޓެއް ކަމަށާއި ރިކޮނައިސަންސް އަދި އެޓޭކް ޑްރޯންތަކާއި ފަސްޓް އެޓޭކް ކްރާފްޓްތަކާއި ކްރޫޒް މިސައިލްތަކާއި ޑިފެންސް ސިސްޓަމްތައް އުފުލޭ ބޯޓެއް ކަމަށެވެ.
