ވިލުފުށީގައި އެއާޕޯޓް އެޅުމުގެ މަސައްކަތް އެމްއޭސީއެލްއާ ހަވާލުކޮށް އެކަމުގެ އެއްބަސްވުމުގައި ސޮއިކުރީ މިދިޔަ އަހަރުގެ ސެޕްޓެމްބަރު މަހުގެ 24 ވަނަދުވަހުއެވެ. އަދި ހަމަ އެ ދުވަހު ވަނީ އެއާޕޯޓަށް ބޭނުންވާ ބިން ހިއްކުމުގެ އަމަލީ މަސައްކަތް ފަށާފައެވެ. އެހެންނަމަވެސް ބޮޑު ޑްރަޖަރެއް ގެނެސް މަސައްކަތް ފެށީ މިދިޔަ އަހަރުގެ ނޮވެމްބަރު މަހުގެ 14 ވަނަ ދުވަހުއެވެ.
އެމްއޭސީއެލުން ބުނީ ވިލުފުށީގައި އެއާޕޯޓް އެޅުމަށް ހިއްކަން ޖެެހޭ 81 ހެކްޓަރު ބިމުން މިހާތަނަށް 65 ހެކްޓަރުގެ ބިން ހިއްކާ ނިންމާފައިވާކަމަށެވެ. މި މަސައްކަތް ކުރަމުން އަންނަނީ 11،300 ކިއުބިކް މީޓަރު ހިއްކުމުގެ ކެޕޭސިޓީ ހުރި ފިލިއްޕޯ ބްރޫނެލްޝީ ނަމަކަށް ކިޔާ ޑްރެޖަރެއް ބޭނުންކޮށްގެންނެވެ. ވިލުފުށީ އެއާޕޯޓަކީ 1800 މީޓަރުގެ ރަންވޭއަކާއެކު ތަރައްގީކުރާ އެއާޕޯޓެކެވެ.
ވިލުފުށްޓަށް ޒިޔާރަތްކުރައްވާ އެރަށުގެ ރައްޔިތުންނާއި ބައްދަލުކުރައްވާ މިދިޔަ އަހަރުގެ ސެޕްޓެމްބަރު މަހުގެ 23 ވަނަ ދުވަހުގެރޭ ވާހަކަފުޅު ދައްކަވަމުން ރައީސް މުއިއްޒު ވިދާޅުވީ ދެ އަހަރާއި ބައިގެ ތެރޭގައި އެއާޕޯޓް މަސައްކަތް ނިންމާ ދަތުރުކުރަން ފައްޓާނެމަށެވެ.
