ރައްޔިތުންގެ މަޖިލިހަށް ރިޔާސީ ބަޔާން އިއްވަވަމުން ރައީސް ޑރ. މުހައްމަދު މުއިއްޒު ދެއްކެވި ވާހަކަތަކަށް އިޝާރަތް ކުރައްވަމުން ސައީދު ވިދާޅުވީ ރިޔާސީ ބަޔާނުގައި ވަރަށް ތަފްސީލުކޮށް ހާމަކޮށްދެއްވީ އެމަނިކުފާނު ރާއްޖޭގެ ތަރައްގީއާމެދު ކުރައްވާ އުންމީދީ ތަސައްވަރު ކަމަށެވެ. އަދި އެ ތަސައްވަރު ހަގީގަތަކަށް ހެއްދެވުމަށް މިއަހަރު ކުރައްވާނޭ އަމަލީ މަސައްކަތްޕުޅުތައް ކަމަށްވެސް ވިދާޅުވިއެވެ.
”މި ބަޔާނުގައި އެމަނިކުފާނު ވިދާޅުވި ކޮންމެ ޖުމްލައަކުންވެސް ރައްޔިތުންގެ ހިތްތަކަށް ޔަގީންކަމާއި ތަސައްލީ ގެނަސްދެއްވީ، ކަންކަން ހިނގަމުން ދިޔަ ގޮތާއި، ސާބިތު ހެކިތަކާއި ހަގީގަތްތަކާއި، ތަފާސްހިސާބުތައް ހާމަކުރައްވައިގެން،“. ސައީދު ވިދާޅުވިއެވެ.
ސައީދު ވިދާޅުވިގޮތުގައި އެހެން އަހަރުތަކާ ހިލާފަށް، މި އަހަރުގެ ރިޔާސީ ބަޔާން އެތައް ގޮތަކުން މުހިއްމުވެ ހާއްްސަވި ސަބަބުތަކެއް ހުއްޓެވެ. އެއީ، ރައީސްދެއްވި ތަފްސީލުތަކާއި ހިއްސާ ކުރެއްވި މުހިއްމު ގިނަ މައުލޫމާތުގެ އިތުރަށް، ރައީސުލްޖުމްހޫރިއްޔާ ކަމުގެ މަގާމާ އެމަނިކުފާނު ހަވާލުވެ ވަޑައިގެންނެވިއިރު ވާރުތަވަމުން އައި ބިޔަބޮޑު ދަރަނި ޑިފޯލްޓް ނުވެ އަދާކުރަންޖެހޭ އަހަރަކީ މިއަހަރު ކަމުގައިވާތީ ކަމަށްވެސް ސައީދު ވިދާޅުވިއެވެ.
”އެ ދަރަނީގެ ފުން އަނދަވަޅުން ގައުމު ސަލާމަތްކުރައްވާނޭކަމަށް ދެއްވި ޔަގީން ކަމާއި އަޒުމުގެ ސާބިތުކަމަށްޓަކައި އެކަނިވެސް މިއީ ތާރީހީ ބަޔާނަކަށް ވެގެންދޭ. ތަފްސީލުތައް ހިއްސާކުރެއްވުމުގެ ހާމަކަންބޮޑު. ގައުމަށް ކުރިމަތިވެފައިވާ މިފަދަ ކޮންމެ މައްސަލައަކާ ކުރިމަތިލައްވައި ސަލާމަތުގެ އައްސޭރިއަކަށް ރައްޔިތުން ގެންގޮސްދެއްވާނެ ގޮތްވެސް މިއަދު އެމަނިކުފާނު ވިދާޅުވެދެއްވީ ނުހަނު ހާމަކަންބޮޑުކޮށް! މަރުހަބާ ރައީސް،“. ސައީދު ވިދާޅުވިއެވެ.
