މި ވެރިކަން ކޮންގްރެސް ޕާޓީ (ޕީއެންސީ)ގެ ލީޑަރު، ރައީސް ޑރ. މުހައްމަދު މުއިއްޒުގެ ފަހަތްޕުޅުގައި އެންމެން ސާބިތުކަމާއެކު ތިބެއްޖެކަމުގައިވާނަމަ، އައްޑޫ ސިޓީ އާއި އައްޑޫގެ ތަރައްގީ އޮތީ ވަރަށް ކައިރީގައި ކަަމަށް އިގްތިސާދީ ތަރައްގީ އާއި ވިޔަފާރިއާ ބެހޭ ވަޒީރު މުހައްމަދު ސައީދު ރޭ ވިދާޅުވެއްޖެއެވެ.
ކޮންގްރެސް ޕާޓީގެ އައްޑޫ ސިޓީ ކެމްޕެއިން އިފްތިތާހް ކުރަން ބޭއްވި އިވެންޓްގައި ވާހަކަފުޅުދައްކަވަމުން ސައީދު ވިދާޅުވީ، މި ވެރިކަން ކުރާ ޕާޓީގެ ލީޑަރުގެ ފަހަތްޕުޅުގައި އެންމެން ސާބިތުކަމާއެކު މިހެން ތިބެއްޖެކަމުގައިވާނަމަ، އައްޑޫ ސިޓީ އާއި އައްޑޫގެ ތަރައްގީ އޮތީ ވަރަށް ކައިރީގައި ކަަމަށެވެ. މިގޮތުން ވަރަށް ގިނަ ކަންތައްތަކެއް އައްޑޫ ސިޓީ އާއި އައްޑޫއަށް މި ސަރުކާރުގެ ޒައާމަތުގައި ފެންނަމުންދާ ކަމަށް ވިދާޅުވިއެވެ.
”ކުރިމަގު ވަަރަށް ސާފު، ވެހޭ ވާރޭ އާއި އަތްވާ އެކުގައި އިންޝާﷲ އަޅުގަނޑުމެން ގޮސް ކާމިޔާބު ކުރަން މި ޖެހެނީ ތަރައްގީ، ގައުމުގެ ކުރިއެރުން،“. ސައީދު ވިދާޅުވިއެވެ.
ރައީސް ޑރ. މުހައްމަދު މުއިއްޒު ގައުމީ ނަވާއި ހަވާލުވިއިރު، ދިޔަ ނުވާ ވަތެއް ނެތް ކަމަށެވެ. ހުރިހާ އުނގުރިއެއް ހުރީ ނެއްޓިފައި ކަމަށާއި، ދިޔަވަމުން ދިޔައީ ހުއްޓުމެއް ނެތި ކަމަށްވެސް ވިދާޅުވިއެވެ. އަދި ނައު އަޑިއަށް ގޮސް ދަރާ ވިކިފައިވާ ކަމަށްވެސް ވިދާޅުވިއެވެ.
”ހުރިހާ ހިންމިތައް ވަރުގަދަކޮށް އަނެއްކާ ގައުމީ އޮޑި، ގައުމީ ނައު އޭގެ ފުރިހަމަ ބާރާއެކު ބަނދެވި، ނައްޓާލައިގެން އިރާދަކުރެއްވިއްޔާ ދަރަނިވެރިވެސް ނުވެ ކުރިއަށް މި ދަނީ، ދާއިރުގައި، ރައީސް ޑރ. މުއިއްޒުގެ ފަހަތްޕުޅުގައި ތިބެންވީ ސަބަބަކީ އެމަނިކުފާނު މުޅި ރާއްޖެއަށް ހާއްސަކޮށް އައްޑޫއަށް ވީ ވައުދުތައް އެ އޮތީ ޗާޕްކޮށް، ކައުންސިލްތަކަށް ދީފައި، ރައްޔިތުންގެ އަތްޕުޅަށް އަަރުވާފައި، މި އޮތީއޭ މެނުއަލް،“. ސައީދު ވިދާޅުވިއެވެ.
ސައީދު ވިދާޅުވިގޮތުގައި، ރައްޔިތުންގެ މަޖިލީސް އަމާނާތްތެރިކަމާއެކު ސުޕަ މެޖޯރިޓީގައި އެ ދަނީ ސިޔާސީ ގޮތަކަށް ވަކި ކޮޅަކަށް ނުޖެހި ގައުމު ބާރުވެރި ކުރުމުގެ ޒިންމާާރު މަސައްކަތް ކުރަމުންނެވެ.
”ދެން މި ވައުދުތައް ފުއްުމަށްޓަކަައި މޭޔަރު، އަދި މޭޔަރުގެ ޓީމް، ޑަބްލިއުޑީސީ ހިމެނޭ ގޮތަށް ތިބޭފުޅުން ނުކުމެވަޑައިގެން ތިއްބެވީ، އައްޑޫއަށް ބޭނުންވަނީ ކުރިއެރުން، ވަޒީފާ އުފެދެން، ޖީބަށް މުއްްސަނދިކަން، ޓޫރިޒަމް، ވަރުގަދަ އެއާޕޯޓެއް، ހުއްޓުމެއް ނެތި ކެނެކްޓިވިޓީ، ވައިގެ ބަނދަރު ތަރައްގީވާން، ކަނޑުގެ ބަނދަރު ތަރައްގީވާން، އަދި އައިސީޓީ ގޮތުންވެސް ގުޅެން، ޒަމާނީ ކުޑަކުޑަ ޑެސްޓިނޭޝަންއަކަށް ރާއްޖޭގެ ޓޫރިޒަމްއާ ގުޅުން ހުރި، ރާއްޖޭގެ އެޓްރެކްޓިވްނެސް އެެއަށްވުރެ ބޮޑަށް އޮފާ ކުރާ ތަނަކަށް ކްރިއޭޓިވިޓީ،“. ސައީދު ވިދާޅުވިއެވެ.
ސައީދު ވިދާޅުވީ، ޕީއެންސީގެ ކެންޑިޑޭޓުން ހޮއްވެވުމުން، ރައީސްގެ މެނުއަލް ތަންފީޒުކުރުމަށްޓަކައި، ބޭނުންވާ ކަންކަން ވެގެން ދާނެ ކަމަށެވެ.
