އީރާނަށް ހަމަލާދިނުމަށް ޑިއޭގޯ ގާސިއާގައި އޮންނަ އަސްކަރީ މަރުކަޒު ބޭނުންކުރުމުގެ ހުއްދަ އިނގިރޭސިވިލާތުން ނުދިނުމާ ގުޅިގެން، ޗާގޯސް ޖަޒީރާގެ އެއްބަސްވުމަށް ދެމުންދިޔަ ތާއީދު އެމެރިކާގެ ރައީސް ޑޮނަލްޑް ޓްރަމްޕް އަނބުރާ ގެންދަވައިފިއެވެ.
މި މައްސަލައިގައި ޓްރަމްޕްގެ ”ޓްރުތް ސޯޝަލް“ ގައި ކުރެއްވި ޕޯސްޓެއްގައި ވިދާޅުވީ، އިނގިރޭސި ބޮޑުވަޒީރު ކިއަރ ސްޓާމަރ ޗާގޯސްގެ ސިޔާދަތީ ބާރު މޮރިޝަސްއާ ހަވާލުކުރަން ނިންމެވުމަކީ ހެއްދެވި ”ބޮޑު ގޯހެއް“ ކަމަށެވެ.
އިރާނުގެ ނިއުކްލިއާ މަޝްރޫޢާ ގުޅިގެން އެ ގައުމުން އެއްބަސްވުމަކަށް ނައިސްފި ނަމަ، އެ ގައުމުގެ ނުރައްކާތަކުން ސަލާމަތްވުމަށްޓަކައި ޑިއޭގޯ ގާސިއާގައިވާ ވައިގެ ބަނދަރު ބޭނުންކުރުން ކޮންމެހެން މުހިންމު ވެދާނެ ކަމަށް ވެސް ޓްރަމްޕް ފާހަގަކުރެއްވިއެވެ. މި އެއްބަސްވުމުގެ ދަށުން ޗާގޯސްގެ ރަށްތައް މޮރިޝަސްއާ ހަވާލުކުރި ނަމަވެސް، ޑިއޭގޯ ގާސިއާގައިވާ އިނގިރޭސި އަދި އެމެރިކާގެ އަސްކަރީ މަރުކަޒު ކުރިއަށް އޮތް 99 އަހަރަށް ބޭނުންކުރުމުގެ އިޚްތިޔާރު އޮންނާނެއެވެ.
ނަމަވެސް، ބައިނަލްއަގުވާމީ ގާނޫނުތަކަށް ރިއާޔަތްކޮށް، އިނގިރޭސިވިލާތުގެ ބާރުގެ ދަށުގައިވާ ތަންތަން ބޭނުންކޮށްގެން އެހެން ގައުމަކަށް އިސްވެ ހަމަލާދިނުމަކީ އިނގިރޭސި ސަރުކާރުން ހުއްދަދޭނެ ކަމެއް ނޫނެވެ. އިނގިރޭސި ސަރުކާރުގެ މަސްދަރުތަކުން މައުލޫމާތު ދޭ ގޮތުގައި، ޓްރަމްޕްގެ ނިންމުން ބަދަލުވީ އިރާނަށް ހަމަލާދިނުމަށް މި މަރުކަޒު ބޭނުންކުރުމުގެ ފުރުސަތު ނުލިބޭނެކަން ކަށަވަރުވުމުންނެވެ.
މިކަމާ ގުޅިގެން އިނގިރޭސި އިދިކޮޅު ފަރާތްތަކުން ވެސް ދަނީ ފާޑުކިޔަމުންނެވެ. ޚާއްޞަކޮށް، އެމެރިކާގެ ތާއީދާ ނުލައި މި އެއްބަސްވުން ކުރިއަށް ނުގެންދެވޭނެ ކަމަށް އިދިކޮޅު ކޮންޒަވޭޓިވް ޕާޓީން ބުނެއެވެ. އިނގިރޭސި ސަރުކާރުގެ ތަރުޖަމާނަކު ވިދާޅުވީ، އަސްކަރީ އޮޕަރޭޝަންތަކާ ގުޅޭގޮތުން އެއްވެސް އެއްޗެއް ބުނަން ބޭނުންނުވާ ކަމަށާއި، ނަމަވެސް އިރާނުން ނިއުކްލިއާ ހަތިޔާރު އުފެއްދުމާ ދެކޮޅަށް އިނގިރޭސިވިލާތުން އަބަދުވެސް ވަކާލާތު ކުރާނެ ކަމަށެވެ.
ޑިއެގޯ ގާސިއާ އަކީ އިންޑިއާ ކަނޑުގައި އޮންނަ އިނގިރޭސިންގެ އިސްތިއުމާރުގެ ދަށުގައިވާ ރަށެކެވެ. މިއީ އެމެރިކާއާއި އިނގިރޭސިވިލާތުގެ މުހިންމު އަސްކަރީ މަރުކަޒެއް ގާއިމްކޮށްފައިވާ، އަދި އެމެރިކާގެ ބީ-2 މަތިންދާ ބޯޓުތައް ފަދަ ސްޓްރެޓެޖިކް ހަތިޔާރުތައް ބޭނުންކުރާ ސަރަހައްދެކެވެ. މި ރަށަކީ ކުރިން މީހުން ދިރިއުޅުނު ރަށެއް ނަމަވެސް، އަސްކަރީ ބޭނުންތަކަށްޓަކައި އެތަނުގެ އަސްލު ވަޒަންވެރިން ވަނީ ބޭރުކޮށްފައެވެ.
