މެކްސިކޯގެ އެންމެ ނުރައްކާތެރި އަދި ބާރުގަދަ ކުށްކުރާ ކާޓެލްއެއް ކަމަށްވާ ”ހަލީސްކޯ ނިއު ޖެނެރޭޝަން ކާޓެލް“ (ސީޖޭއެންޖީ) ގެ ލީޑަރު، ނެމެސިއޯ އޮސެގުއެރާ ސެރަަންޓެސް ނުވަތަ މަޝްހޫރު ނަމުން ނަމަ ”އެލް މެންޗޯ“ މަރާލުމާ ގުޅިގެން، އެ ގައުމުގެ ސަލާމަތީ މަސްރަހު ވަރަށް ބޮޑަށް ގޯސްވެ، ކާޓެލްގެ މެންބަރުން ބަދަލުހިފުމުގެ ގޮތުން ބޮޑެތި ހަމަނުޖެހުންތަކެއް ހިންގަން ފަށައިފިއެވެ.
ބައިނަލްއަގުވާމީ މީޑިއާ ރިޕޯޓުތައް ބުނާގޮތުން، ފެބްރުއަރީ 23، 2026 ވީ ހޯމަ ދުވަހުގެ ހެނދުނުން ފެށިގެން ކާޓެލްތަކުން ދަނީ ސަރުކާރާއި އާންމުންނާ ދެކޮޅަށް ބަދަލުހިފުމުގެ ހަރަކާތްތައް ހިންގަމުންނެވެ.
”އެލް މެންޗޯ“ މަރާލި އޮޕަރޭޝަންމި ނުރައްކާތެރި ކާޓެލް ލީޑަރު މަރާލާފައިވަނީ މެކްސިކޯގެ ޖަލިސްކޯގެ ފަރުބަދަމަތީ އަވަށެއް ކަމަށްވާ ޓަޕަލްޕާގައި އެ ގައުމުގެ ސްޕެޝަލް ފޯސަސްއިން ހިންގި ހާއްސަ ރޭޑެއްގައެވެ. އެމެރިކާގެ އިންޓެލިޖެންސްގެ އެހީތެރިކަމާއެކު އަލަށް އުފެއްދި ޖޮއިންޓް ޓާސްކް ފޯހަކުން ހިންގި މި އޮޕަރޭޝަނުގައި ހިނގި ކުރިމަތިލުންތަކުގެ ތެރޭގައި އޭނާ ވަނީ ވަރަށް ބޮޑަށް ޒަހަމްވެފައެވެ. ރިޕޯޓްތައް ބުނާގޮތުން އޭނާ މަރުވީ އިތުރު ފަރުވާއަށް މެކްސިކޯ ސިޓީއަށް ވައިގެ މަގުން ގެންދިޔުމުގެ މަގުމަތީގައެވެ.
މިހާރުގެ ސަލާމަތީ ހާލަތުއެލް މެންޗޯ މަރުވިކަން އިއުލާނުކުރުމާއެކު، ސީޖޭއެންޖީ ކާޓެލް އިން ވަނީ ”ނާކޯ-ބްލޮކޭޑްސް“ ނުވަތަ މަގުތައް ބަންދުކޮށްގެން ހިންގާ ހަމަނުޖެހުންތައް ފަށާފައެވެ. މިގޮތުން ގުއަޑަލަހާރާ އަދި ޖަލިސްކޯ ސަރަހައްދުގައި މިހާރު ވަނީ ”ކޯޑް ރެޑް“ ނެރެފައެވެ. ކާޓެލްގެ މެންބަރުން ވަނީ މަގުތަކުން ދަތުރުކުރި ބަސްތަކާއި ލޮރީތައް ފޭރިގަތުމަށްފަހު، އެ ތަކެތީގައި ހުޅުޖަހައިގެން މައި ހައިވޭތަކާއި ސިޓީގެ މުހިންމު މަގުތައް ބަންދުކޮށްފައެވެ.
މީގެ އިތުރުން، ކާޓެލްއިން ވަނީ ސޯޝަލް މީޑިއާ މެދުވެރިކޮށް ގުއަޑަލަހާރާ، ޕުއެރްޓޯ ވަލާޓާ އަދި ޒަޕޯޕާންގެ ރައްޔިތުން ގޭގައި ތިބުމަށް އަމުރުކޮށް ”ނާކޯ-ކާފިއު“ އެއް އިއުލާނުކޮށްފައެވެ. މިއީ ސަރުކާރުން ރަސްމީކޮށް އިއުލާނުކުރި ކާފިއުއަކަށް ނުވި ނަމަވެސް، ރައްޔިތުން ބިރުން ގޭގައި ތިބުމުގެ ސަބަބުން އެ ސިޓީތަކުގެ މަގުތައް ވަނީ މުޅިން ފަޅުވެފައެވެ.
މި ހަމަނުޖެހުންތަކުގެ ސަބަބުން ގުއަޑަލަހާރާ (ޖީޑީއެލް) އަދި ޕުއެރްޓޯ ވަލާޓާ (ޕީވީއާރު) އެއާޕޯޓްތަކުގެ ގިނަ ފްލައިޓްތަކެއް ވަނީ ކެންސަލްކޮށްފައެވެ. ޔުނައިޓެޑް، އެމެރިކަން، އެއާ ކެނެޑާ އަދި ވެސްޓްޖެޓް ފަދަ ބޮޑެތި އެއާލައިންތަކުން ވަނީ، އެއާޕޯޓަށް ދާ މަގުތަކުގެ ރައްކާތެރިކަން ނެތުމުގެ ސަބަބުން ދަތުރުތައް ވަގުތީގޮތުން މެދުކަނޑާލާފައެވެ.
ބައިނަލްއަގުވާމީ އިޖާބައެމެރިކާ އާއި ކެނެޑާގެ ސަރުކާރުން ވަނީ ޖަލިސްކޯ، ޓަމައުލިޕަސް، މިޗޯއަކާން އަދި ގުއެރޭރޯގައި ތިބި އެ ގައުމުތަކުގެ ރައްޔިތުން ގޭގައި މަޑުކުރުމަށާއި، އެއްވެސް ދަތުރެއް ނުކުރުމަށް އިލްތިމާސްކޮށް ކުއްލި އިންޒާރު ނެރެފައެވެ.
އެމެރިކާގެ ޑެޕިއުޓީ ސެކްރެޓަރީ އޮފް ސްޓޭޓް ކްރިސްޓޮފާ ލަންޑައު ހިމެނޭހެން، އެ ގައުމުގެ އޮފިޝަލުން ވަނީ މިއީ ކުށްކުރުމާ ދެކޮޅަށް ކުރާ މަސައްކަތުގައި ދުނިޔެއަށް ލިބުނު ”ބޮޑު ކުރިއެރުމެއް“ ކަމަށް ސިފަކޮށްފައެވެ. ނަމަވެސް، ކާޓެލްގެ ފަރާތުން ކުރިމަތިވެދާނެ ނުރައްކަލުގެ ބިރު އަދިވެސް އިންތިހާއަށް ބޮޑުކަން އޮފިޝަލުން ފާހަގަކުރެއްވިއެވެ.
2009 އާއި 2010 އާ ދެމެދު ’މިލެނިއޯ ކާޓެލް‘ ބައިބައިވުމުގެ ތެރެއިން އުފެދުނު ސީޖޭއެންޖީ ޑްރަގް ކާޓެލް އަކީ މިހާރު މެކްސިކޯގައި އޮތް އެންމެ ނުރައްކާތެރި ކާޓެލްއެވެ. މި ޖަމާއަތުން ބޭނުންކުރާ ’ފްރެންޗައިޒް މޮޑެލް‘ ގެ ސަބަބުން، މެކްސިކޯގެ ބޮޑު ބަޔަކަށް އެމީހުންގެ ނުފޫޒު ވަނީ ފެތުރިފައެވެ.
މި ޖަމާއަތުގެ މައިގަނޑު ސިފައަކީ އަސްކަރީ ފެންވަރުގެ ހަތިޔާރާއި ވަސީލަތްތައް ބޭނުންކުރުމެވެ. މީގެ ތެރޭގައި ގޮވާތަކެތި ހަރުކޮށްފައިވާ ޑްރޯންތަކާއި، ރޮކެޓް ލޯންޗަރާއި، ބަޑިނުވިދޭ ބޮޑެތި އުޅަނދުތައް ހިމެނެއެވެ. ދުނިޔޭގެ 40 އަށްވުރެ ގިނަ ގައުމަށް ފެތުރިފައިވާ މި ވިއުގައަކީ އެމެރިކާ އާއި ޔޫރަޕަށް އެންމެ ގިނައިން ފެންޓަނީލް އާއި މެތަމްފެޓަމިން ފަދަ ނުރައްކާތެރި މަސްތުވާތަކެތި އެތެރެކުރާ އެއް ބާރެވެ.
