އީރާނަށް ހަމަލާދީފިނަމަ، ދިގުދެމިގެންދާ ހަނގުރާމައެއްގެ ތެރެއަށް ވަދެވިދާނެ ކަމަށާއި އެމެރިކާގެ ސިފައިން މަރުވުމުގެ ފުރުސަތު އޮތް ކަމަށް ބުނެ، ޖޮއިންޓް ޗީފްސް އޮފް ސްޓާފްގެ ޗެއާމަން ޖެނެރަލް ޑެން ކޭން އިންޒާރު ދެއްވި ކަމަށް މީޑިއާތަކުން ރިޕޯޓުކުރުމާ ގުޅިގެން، އެމެރިކާގެ ރައީސް ޑޮނަލްޑް ޓްރަމްޕް އެކަމަށް ވަރަށް ބޮޑަށް ފާޑުވިދާޅުވެއްޖެއެވެ.
އީރާނަށް ހަމަލާދިނުމުން ކުރިމަތިވެދާނެ ނުރައްކާތަކާ ބެހޭގޮތުން އެންމެ އިސް ޖެނެރަލް އިންޒާރު ދެއްވި ކަމަށް ބުނާ ރިޕޯޓުތަކަށް ޓްރަމްޕް ވަނީ ވަރުގަދަ ރައްދެއް ދެއްވާފައެވެ.
ހޯމަ ދުވަހު ސޯޝަލް މީޑިއާގައި ކުރެއްވި ޕޯސްޓެއްގައި ޓްރަމްޕް ވިދާޅުވީ، އީރާނާއެކު ކުރާ ހަނގުރާމައެއް ”ފަސޭހަކަމާއެކު ކާމިޔާބު ކުރެވޭނެ“ ކަމަށް ކޭން ގަބޫލުކުރައްވާ ކަމަށެވެ. އެމެރިކާއިން ހުށަހަޅާފައިވާ ޝަރުތުތަކެއް އީރާނުން ގަބޫލުނުކޮށްފިނަމަ އަސްކަރީ ހަމަލާއެއް ދޭނެ ކަމުގެ އިންޒާރު ރައީސް ޓްރަމްޕް ވަނީ މީގެ ކުރިން ދެއްވާފައެވެ.
ވޮޝިންޓަން ޕޯސްޓް ނޫހުން ރިޕޯޓުކޮށްފައިވާ ގޮތުގައި، މިދިޔަ ހަފުތާގައި ބޭއްވި ބައްދަލުވުމެއްގައި ކޭން ވަނީ ޓްރަމްޕަށް މައުލޫމާތު ދެއްވާފައެވެ. އެގޮތުން، އެމެރިކާއިން ހަމަލާއެއް ދީފިނަމަ އީރާނުން ދީފާނެ ރައްދު ހަމަލާތައް ހުއްޓުވުމަށް އެމެރިކާއިން ކުރާ މަސައްކަތްތަކަށް، ބޭނުންވާ މިންވަރަށް ހަތިޔާރު ނެތުމާއި ސަރަހައްދީ ބައިވެރިންގެ އެހީތެރިކަން ކުޑަވުމުގެ ސަބަބުން ހުރަސްތަކެއް ކުރިމަތިވެދާނެ ކަމަށް އޭނާ ވިދާޅުވި ކަމަށް އެ ނޫހުން ބުނެއެވެ.
އެ ރިޕޯޓުގައިވާ ގޮތުން، މިސައިލް ޑިފެންސް ސިސްޓަމްތަކުގައި ބޭނުންކުރާ ހަތިޔާރު ހިމެނޭހެން، އެމެރިކާގެ ހަތިޔާރުގެ ރިޒާވް ވަނީ އިސްރާއީލާއި ޔޫކްރޭން ފަދަ ބައިވެރިންނަށް އެހީތެރިވުމަށް ބޭނުންކުރުމުގެ ސަބަބުން ވަރަށް ބޮޑަށް މަދުވެފައެވެ. ”އީރާނާ ދެކޮޅަށް ހިންގާ ކެމްޕޭނެއްގެ ބޮޑުމިނާއި، އޭގައި ހުރި އުނދަގޫތަކާއި، އެމެރިކާ ސިފައިން މަރުވެދާނެ ކަމުގެ ކަންބޮޑުވުން ވެސް ކޭން ވަނީ ފާޅުކުރައްވާފައި،“ އެ މައްސަލައިގެ އެތެރޭގެ މަޝްވަރާތައް އެނގޭ މީހަކާ ހަވާލާދީ އެ ނޫހުން ރިޕޯޓުކޮށްފައިވެއެވެ.
ވޮޝިންޓަން ޕޯސްޓްގެ ލިޔުމަށް ރައްދު ދެމުން ކޭންގެ އޮފީހުން ބުނީ، އޭނާގެ މަސްއޫލިއްޔަތަކީ އެމެރިކާގެ ސަލާމަތީ ނިންމުންތައް ނިންމަވާ މަދަނީ ލީޑަރުންނަށް އަސްކަރީ ގޮތުން ކުރެވެން ހުރި ކަންކަމާއި، އޭގެ ސަބަބުން ކުރިމަތިވެދާނެ ނަތީޖާތަކާއި ނުރައްކާތަކުގެ މައުލޫމާތު ފޯރުކޮށްދިނުން ކަމަށެވެ. ނަމަވެސް، އެކްސިއޯސް އިން ރިޕޯޓުކުރާ ގޮތުގައި ފާއިތުވި ހަފުތާތަކުގައި އީރާނާ ބެހޭގޮތުން ޓްރަމްޕަށް މައުލޫމާތު ދެއްވަމުން ގެންދަވާ ހަމައެކަނި އަސްކަރީ ޝަހުސިއްޔަތަކީ ކޭން އެވެ.
މެދުއިރުމަތީގައި އެމެރިކާގެ އަސްކަރީ އޮޕަރޭޝަންތައް ބަލަހައްޓަވާ ޔޫއެސް ސެންޓްރަލް ކޮމާންޑް (ސެންޓްކޮމް) ގެ ވެރިޔާ އެޑްމިރަލް ބްރެޑް ކޫޕާ، ޖެނުއަރީ މަހުން ފެށިގެން އެއްވެސް ބައްދަލުވުމަކަށް ދައުވަތު ދީފައެއް ނުވެއެވެ. ދިރާސާކުރާ ފަރާތްތަކުން ފާހަގަކުރާ ގޮތުގައި، ތެހެރާނާ މެދު ވޮޝިންޓަނުން ކުރާ ގިނަ ޑިމާންޑްތަކަކީ އިސްރާއީލުން އިސްކަންދޭ ކަންކަމާ އެއްގޮތް ކަންކަމެވެ.
