ލުބުނާނުގެ ހަރަކާތްތެރިވާ ހިޒްބުﷲ ޖަމާއަތުން އިސްރާއީލާއި ރަސްމީކޮށް ހަނގުރާމަ އިއުލާނުކޮށްފިއެވެ.
ހިޒްބުﷲ ޖަމާއަތާއި އިސްރާއީލާއި ދެމެދު މީގެ އެތަކެއް އަހަރުތަކެއް ކުރިން ހަނގުރާމަ އިއުލާނުކޮށްފައިވާއިރު، އެކި ފަހަރުމަތިން ހަނގުރާމަ ވަނީ މެދުކަނޑާލާފައެވެ. އެގޮތުން ހަނގުރާމައިގެ ކުރީކޮޅަށް ޖެހިލާއިރު، ހިޒްބުﷲ އުފެދިފައިވަނީ އިސްރާއީލުން ލުބުނާނަށް 1982 ވަނަ އަރައިގަތުމުން ފެށުނު ހަނގުރާމައިގެ ތެރެއިން އެ އަހަރުގައެވެ. އޭގެ ފަހުން އީރާން ވާގިވެރިވެ، ހިޒްބުﷲއިން އިސްރާއީލާއި ހަނގުރާމަކޮށްފައިވަނީ ލުބުނާނުގެ ދެކުނުގައެވެ.
ހިޒްބުﷲއާއި އިސްރާއީލާއި އެންމެ ވަރުގަދަ ހަނގުރާމައެއް ފެށިފައިވަނީ 2006 ވަނަ އަހަރުއެވެ. އެ ހަނގުރާމަ 34 ދުވަހަށް ކުރިއަށް ގެންދިޔައިރު، އޭގެ ފަހުން ދޭތެރެއަކުން ދެ ގައުމުން ހަމަލާތަކެއް ބަދަލުކޮށްލައެވެ.
މިހާރު ހިޒްބުﷲ އާއި އިސްރާއީލާއި ދެމެދު ހަނގުރާމަ ފެށިފައިވަނީ އިސްރާއީލުން އެމެރިކާގެ އެހީއާއެކު އީރާނަށް ހަމަލާދީ، އެގައުމުގެ ސުޕްރީމް ލީޑަރު، އާޔަތުﷲ އަލީ ޚާމަނާއީ އަވަހާރަކޮށްލުމާއި ގުޅިގެންނެވެ. އެކަމާއި ގުޅިގެން ހިޒްބުﷲއިން ވަނީ މިމަހުގެ 2 ވަނަ ދުވަހުގެ ހެނދުނުގެ ވަގުތެއްގައި އިސްރާއީލުގެ އުތުރަށް ރޮކެޓާއި ޑްރޯން ހަމަލާތަކެއް ދީފައެވެ.
އެ ހަމަލާއާއި ގުޅިގެން އިސްރާއީލުން ވެސް ރައްދު ހަމަލާދީފައިވާއިރު، ދެ ފަރާތުން ވެސް މިހާރު ދަނީ ހަމަލާތައް ބަދަލު ކުރަމުންނެވެ.
އެކަމާއި ގުޅިގެން ހިޒްބުﷲގެ ސީނިއާ އޮފިޝަލަކާއި ހަވާލަދީ ރިޕޯޓްތަކުން ބުނީ، ހިޒްބުﷲއިން އޮތީ ހުއްޓާލާ ގޮތަކަށް ނޫން ކަމަށާއި މަޑުމަޑުން ތިބި ޒަމާން ފާއިތުވެގެން ގޮއްސި ކަމަށެވެ. އަދި މިހާރު ހަނގުރާމައަށް ނުކުތުން ނޫން ގޮތެއް ނެތް ކަމަށް ވެސް ވަނީ ބުނެފައެވެ.
ހިޒްބުﷲއިން ބުނީ، އިސްރާއީލުން ބޭނުންވީ ހަނގުރާމައެއް ކަމަށާއި އެހެން ކަމުން އެ ޖަމާއަތުން އޮތީ އެކަމަށް ތައްޔާރަށް ކަމަށެވެ.
