ބޭރުގައުމު ތަކުގައި ހިނގަމުންދާ ހަނގުރާމައިގައި ބައިވެރިވުމަށް ދިޔަ ދިވެހިންގެ ބަޔަކު، ތުރުކީގައި ތާށިވެފައި ތިބި ކަމުގެ މައުލޫމާތު ލިބިގެން މިހާތަނަށް ކުރެވުނު މަސައްކަތުން އޭގެ ތެރެއިން ކުޑަ ކުއްޖަކާއި އެކުއްޖާގެ މަންމަ ރާއްޖެ ގެނެވިފައިވާކަމަށް ދާޚިލީ ސަލާމަތާ ބެހޭ ވަޒީރު އަލީ އިޙްސާން ވިދާޅުވެއްޖެއެވެ.
ރައީސް އޮފީހުގައި މިއަދު އޮތް ނޫސްވެރިންގެ ބައްދަލުވުމުގައި މިނިސްޓަރު ވިދާޅުވީ ހަނގުރާމަތަކުގައި ބައިވެރިވާން ރާއްޖެއިން ދިޔަ ބައެއް މީހުންނާއި އެފަދަ މީހުން ގެންދިޔަ އާއިލާގެ މީހުން ރާއްޖެ ނާދެވި ހާލުގައި ޖެހިފައި އެބަ ތިބި ކަމަށެވެ.
ވަޒީރު ވިދާޅުވީ، ދިވެހިރައްޔިތުންގެ ތެރެއިން، ހަނގުރާމަވެރި އެކި ސަރަހައްދުތަކަށް ގޮސް އަނބުރާ ނާދެވި، ތާށިވެފައި ތިބި މީހުންނާއި، ހަނގުރާމަ ތަކުގައި އެކި ގޮތްގޮތުން ބައިވެރިވެފައި ތިބި ފަރާތްތަކުގެ އިތުރުން، ހަނގުރާމައިގައި ބައިވެރިވާން ދިޔައިރު އެކުގައި ގެންދިޔަ އާއިލާގެ ފަރާތްތައް ރާއްޖެ ނާދެވިފައި ތިބޭ މައްސަލަ ނިމުމަކަށް ގެނައުމުގެ މަސައްކަތް ރައީސް ޑރ. މުހައްމަދު މުއިއްޒުގެ އިރުޝާދާއެކު ފައްޓަވާފައިވާ ކަމަށެވެ.
އެ މަސައްކަތުގެ ދަށުން މީގެ ކުރިން 23 މީހަކު ވަކިން ރީއިންޓަގްރޭޓް ކޮށްފައިވާ ކަމަށާ، އޭގެ ފަހުންވެސް ސީރިޔާގެ ދެ ސަރަހައްދެއްގައި ތާށިވެފައި ތިބި 60އެއްހާ މީހުން ގެނައުމަށް މަސައްކަތްތަކެއް ކުރެވިފައިވާކަމަށް ވަޒީރު ވިދާޅުވިއެވެ.
ހަނގުރާމަ ހިނގަމުންދާ ސަރަހައްދުތަކަށް ދިއުމަށްފަހު، އެތަންތަނުގައި ތާށިވެ ރާއްޖެއަށް ނާދެވި ތިބި ދިވެހިންގެ ތެރެއިން ސޫރިޔާގެ ދެ ސަރަހައްދެއްގައި ތިބި 60 މީހަކު ރާއްޖެއަށް އަނބުރާ ގެނައުމުގެ މަސައްކަތް ސަރުކާރުން ކުރަމުންދާކަން މިނިސްޓަރ ފާހަގަކުރެއްވިއެވެ.
އެގޮތުން ކުރެވުނު މަސައްކަތުން އޭގެ ތެރެއިން 14 އަހަރުގެ އަންހެން ކުއްޖަކާއި އެކުއްޖާގެ މަންމަ ރާއްޖެ ގެނެވިފައިވާ ކަމަށާ، އެމީހުންނަށް ކުރިއަށް ގެންދަންޖެހޭ ރީއިންޓަގްރޭޝަން ޕްރޮގްރާމްތައް ކުރިއަށްދާކަން ވަޒީރު ވިދާޅުވިއެވެ.
އެ މީހުން ތުރުކީ ސަރުކާރުން ހިފަހައްޓައި، ދިވެހި ސަރުކާރަށް އެންގުމުން އެ ތިން މީހުން ރާއްޖެ ގެނައުމުގެ މަސައްކަތް ކުރިއަށް ގެންދިޔަ ކަން މިނިސްޓަރު ފާހަގަކުރެއްވި އެވެ. އެގޮތުން 14 އަހަރުގެ އަންހެން ކުއްޖަކާއި އެ ކުއްޖާގެ މަންމަ ރާއްޖެ ގެނެސް ހިންމަފުށީގައި ހުންނަ ނޭޝަނަލް ރީއިންޓެގްރޭޝަން ސެންޓަރު (އެންއާރުސީ)ގައި އެމީހުންނަށް ފޯރުކޮށްދޭން ޖެހޭ ކަންކަން ފޯރުކޮށްދެމުން އަންނަ ކަމަށް މިނިސްޓަރު ވިދާޅުވި އެވެ.
