އީރާނުގެ އައި.އާރް.ޖީ.ސީ ނޭވީ ކޮމާންޑަރު ވަނީ ހޮރްމޫޒް ކަނޑުއޮޅިން ދަތުރުކުރާ އުޅަނދުފަހަރަށް ވަރުގަދަ އިންޒާރެއް ދެއްވާފައެވެ. އޭނާ ވިދާޅުވީ، ހަނގުރާމަ ފެށުނުއިރުވެސް ބުނި ފަދައިން، އީރާނާ ދެކޮޅަށް ޢުދުވާން ހިންގާ ޤައުމުތަކާ ގުޅުންހުރި އެއްވެސް އުޅަނދަކަށް ހޮރްމޫޒް ކަނޑުއޮޅިން ދަތުރުކުރުމުގެ ޙައްޤު ލިބިގެން ނުވާ ކަމަށެވެ. އަދި މިކަމާ މެދު ޝައްކެއް އޮތް ނަމަ، ކައިރިއަށް އައިސް އެކަން ތަޖުރިބާކޮށްލުމަށްވެސް އޭނާ ވަނީ ގޮންޖައްސަވާފައެވެ.
ސީ.އެން.އެން އިން ރިޕޯޓްކޮށްފައިވާ ގޮތުގައި، އީރާނުން މިހާރު ވަނީ ހޮރްމޫޒް ކަނޑުއޮޅީގައި ކަނޑު އަޑީގެ މައިން އަތުރަން ފަށާފައެވެ. މިއީ މި ހަނގުރާމައިގެ މިސްރާބު މުޅިން ބަދަލުކޮށްލާނެ ވަރަށް ނުރައްކާތެރި ފިޔަވަޅެކެވެ. މިކަމުގެ ސަބަބުން އެމެރިކާގެ ރައީސް ޑޮނަލްޑް ޓްރަމްޕަށް ދެން ކުރިމަތިވާނީ ދެ އިޚްތިޔާރެކެވެ. އެއީ ހަނގުރާމަ ހުއްޓާލުމަށް މަގެއް ހޯދުން ނުވަތަ މިއަށްވުރެ ފުޅާދާއިރާއެއްގައި އީރާނުގެ އެކި އަމާޒުތަކަށް ބޮން އެޅުމެވެ.
މި ޙާލަތަކީ މުޅި ދުނިޔޭގެ އިޤްތިޞާދަށާއި ހަކަތައިގެ ބާޒާރަށް އިންތިހާއަށް ނުރައްކާ ބޮޑު ޙާލަތެކެވެ. އީރާނުން ހޮރްމޫޒް ކަނޑުއޮޅި ބަންދުކޮށްފިނަމަ، ދުނިޔޭގެ ތެލުގެ ބާޒާރަށް ބޮޑު ލޮޅުމެއް އަރާނެއެވެ. އެހެންކަމުން، ކުރިއަށް އޮތް ގަޑިއިރުތަކަކީ މި ހަނގުރާމައިގެ އެންމެ ނާޒުކު ވަގުތުކޮޅު ކަމަށް އަސްކަރީ މާހިރުން ދެކެއެވެ.
