މީގެ ހައެއްކަ މަސް ކުރިން ރައީސް ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގަތީ އިގުތިސާދީ ގޮތުން ރާއްޖެ އަށް އުނދަގޫ ދަނޑިވަޅެއްގަ އެވެ.
ވެރިކަމާ ހަވާލުވެވަޑައިގެންނެވިތާ ސާޅިހަކަށް ދުވަހުގެ ތެރޭގައި ބޮޑު ލޯނެއް ދައްކަން ޖެހިފައި އޮތެވެ. ދައުލަތް އޮތީ މަސްވެރިންނަށާއި އެހެން އެތައް ބަޔަކަށް ދަރާފައެވެ.
މިދިޔަ ހަ މަސް ތެރޭގައި ކުރި މަސައްކަތުގެ ނަތީޖާއެއްގެ ގޮތުން އިގުތިސާދު ރަނގަޅު ކުރުމުގެ އެތައް ފިޔަވަޅެއް ވަނީ އަޅާފައެވެ.
ފައިސާ ޗާޕުކުރުން އެއްކޮށް ހުއްޓާލި ނަމަވެސް ދަރަނި ދައްކަމުން އަދި ކުރިމަގަށްޓަކައި ބިޔަ ޕްރޮޖެކްޓްތަކެއްގައި ވަނީ ސޮއިކޮށް އަމަލީ މަސައްކަތް ފަށާފަ އެވެ.
ސަރުކާރުގެ ދަރަނި 124 ބިލިއަނެއްހާ ރުފިޔާ އަށް ބޮޑުވެ، އަމިއްލަ ފަރާތްތަކަށް ދައްކަން ޖެހުނު ނުވަ ބިލިއަން ރުފިޔާއަށް ވުރެ ބޮޑު ދަރަނި އަނބުރާ އަދާކުރަން ނިންމީ، ފައިސާ ޗާޕުކުރުން ވެސް ހުއްޓާލައި ލިބޭ އާމްދަނީއަކުން ހަރަދުތައް ހަމަޖެއްސޭނެ ގޮތްތަކެއް ބަލައިގެންނެވެ.
ދާދި ފަހުން އައިއެމްއެފްގެ ރިޕޯޓުގައި ވެސް ވަނީ އާ ސަރުކާރުން ސަބްސިޑީ ރިފޯމްކޮށް، ހަރަދުތައް ކުޑަ ކުރުމުގެ ވިސްނުން ހުރުމަކީ ރާއްޖޭގެ އިގްތިސާދު ހަމައަކަށް އެޅުމަށް އޮތް ބޮޑު އުންމީދެއް ކަމަށެވެ. އަދި އެ ފިޔަވަޅުތަކާ އެކު އިގްތިސާދު ކުރިއަށް އޮތްތަނުގައި ރަނގަޅު މިސްރާބަކަށް ގެންދެވޭނެ ކަމަށް އަންދާޒާކޮށްފައިވެ އެވެ.
ރިޕޯމުގެ މަސައްކަތްތައް ކުރިއަށް ގެންދާ އިރު ސަރުކާރުން އަންނަނީ ދައުލަތުގެ އާމްދަނީއަށް ބޮޑެތި ބަދަލުތައް އަންނަ ބިޔަ ޕްރޮޖެކްޓްތަކުގައި ސޮއިކޮށް އޭގެ މަސައްކަތްތައް ވެސް ފަށައިފަ އެވެ. އެ މަސައްކަތްތައް ކަނޑައަޅާފައިވާ ގޮތަށް ކުރިއަށްދާ ނަމަ، އެކަމުން އިގްތިސާދީ ބޮޑެތި މަންފާތަކެއް ލިބެން ފަށާނެ އެވެ.
މިވަގުތު އިގްތިސާދަށް ދިމާވެފައިވާ އެންމެ ބޮޑު އެއް މައްސަލައަކީ، ހަރަދުތައް ބޮއްސުއްލައިގެން ދިއުމާއި ދަރަނި އިންތިހާއަށް ބޮޑުވުމެވެ. މި ގޮންޖެހުންތަކާ އެކު އާ ސަރުކާރުން މިވަނީ، އާ ފިޔަވަޅުތަކާ އެކު އިގްތިސާދު ކުރިއަށް ގެންދާނެ މަގު ކޮށައި ކުރިއަށް ހިނގައިގަނެފަ އެވެ.
