ޤުދުރަތުގެ ހިތްގައިމު މަންޒިލެއްގައި ބޮޑުކަމުދާއިރު އެކަމުގެ ހިތްހަމަޖެހުން އިހުސާސް ކުރުމަކީ އެކަން ކުރާ މީހުންނަށް ނުވަތަ ކުރި ބަޔަކަށް ނޫނީ ކުރެވޭނެ އިހުސާސެއް ނޫނެވެ. މިއީ އިހު ދިވެހިންގެ އާދައެކެވެ. ގަދީމީ ޒަމާނުގައި މުޅި ދުނިޔޭގެވެސް އާދައެކެވެ. މިފަދަ ޤުދުރަތުގެ ހިތްގައިމު މަންޒިލްތައް ކަމުގައި ވެފައި އޮތީ އާއްމު ތަންތަނެވެ. އެހެންކަމުން މިފަދަ ތަންތަނަށް ބޮޑުކަމުދިއުމީ ތިމާ އާއި އެހެން މީހުންގެ ސިއްހަތަށް ފަހަރުގައި ގެއްލުން ކުރުވަނިވި ކަމަކަށް ވެދާނެއެވެ. ނަމަވެސް ދިރާސާވެރިން ފާހަގަ ކުރާގޮތުގައި މިއީ ބޮޑުކަމުދާ އިންސާނާގެ ނަފްސާނީ ދުޅަހެޔޮކަމަށް އެކަމުން ހެޔޮ އަސަރެއް ކުރުވަފާނެ ކަމެކެވެ.
އެގޮތުން ފާހަގަ ކުރެވޭ ބައެއް ކަންކަމަކީ:
ސްޓްރެސް ފިލުން: ޤުދުރަތްތެރި ހިތްގައިމު މަންޒިލެއްގައި އިންސާނާ ހުރުމަކީ ސްޓްރެސްގެ މިންވަރު ދަށްކޮށްދީ ހަމަޖެހުމަށް މަގުފަހިކޮށްދޭ ކަމެކެވެ. ޤުދުރަތީ މާހައުލުގެ ހަމަޖެހުމުގެ ސަބަބުން ފާޚާނާ ކުރުމަށް ފަސޭހަވެ، ހާސްކަން ކުޑަވެ، ހަޖަމުކުރުމުގެ ސިއްހަތަށްވެސް ފައިދާތަކެއް ކުރާނެއެވެ. ޤުދުރަތްތެރި ކަމަކީ ހިތްހަމެޖުން ގެނުވާ ކަމަކަށް ވާއިރު، ބޮޑުކަމުދިއުމަކީވެސް ހިތްހަމަޖެހުން ގެނުވާނެ ކަމެކެވެ. ވީއިރު، ހިތްހަމަޖެހުން ގެނުވާނެ ދެކަމެއް އެއްވަގުތަކު ހިނގާނަމަ، އެއީ ހާސްކަމާ ނުތަނަވަސްކަމުން އިންސާނާ ދުރުކޮށްދޭނެ ކަމެކެވެ.
ނަފްސާނީ ހަމަޖެހުން: ޤުދުރަތީ ހިތްގައިމުކަމަށް އިންސާނާ ހުށަހެޅުމުން ހާސްކަމާއި، ޑިޕްރެޝަން، އަދި ނަފްސާނީ ވަރުބަލިކަން ކުޑަކޮށްދީ ނަފްސާނީ ސިއްހަތު ރަނގަޅުވާކަން ވަނީ ފާހަގަކުރެވިފައެވެ. ގުދުރަތީ މާހައުލެއްގެ އަމާންކަމާއި ރީތިކަމުން މި ހެޔޮ އަސަރު އިތުރުވެގެންދެއެވެ. މިކަމުގެ ތެރެއަށް ބޮޑުކަމުދިއުމުގެ ހަމަޖެހުން އިތުރުވުމުން އިތުރު ހަމަޖެހުމެއް އަނެއްކާ ވެރިވެ، ނަފްސަށް އިތުރު ހަމަޖެހުމެއް ގެނެސްދޭނެެއެވެ.
ޖިސްމާނީ ހަމަޖެހުން: ގަވާއިދުން ޤުދުރަތީ އަލިކަމާއި ތާޒާ ވައިގެ ތެރެއަށް ހުށަހެޅުމީ ޖުމްލަ ސިއްހަތު ރަނގަޅުކޮށްދޭ ކަމެކެވެ. ޤުދުރަތީ މާހައުލުތަކަށް ބޮޑުކަމުދާނަމަ، އެތަންތަނުގައި ފާހާނާ ތަށި ބޭނުން ކުރާކަށް ނުހުރެއެވެ. އެއާއި އެކު ބޮޑުކަމުދިއުމަށް އިށީންނަނީ އުޑުފައިންނެވެ. މިއީ މައިދާ އާއި ގޮހޮރުގެ މަސްތައް އޭގެ ފުރިހަމަ ގޮތުގައި މަސައްކަތް ކުރުމަށް ފަހި ގޮތެކެވެ. ބައެއްކަހަލަ ފިޒިއޮތެރަޕީގެ ތެރޭގައި މިފަދަ ހަރަކާތްތަކެއް އެކުލެވޭ ކަސްރަތު ތަކެއްވެސް ކުރުވާނެއެވެ.
ތޫނުފިލިކަން އިތުރުވުން: ދިރާސާވެރިން ދެކިލައްވާގޮތުގައި އިންސާނާއާއި އޭނާގެ މާހައުލާ ގުޅުނު ވަރަކަށް އޭނާގެ ތޫނުފިލިކަން އިތުރުވެދެއެވެ. ޤުދުރަތްތެރި ހިތްގައިމު މަންޒިލެއްގައި ބޮޑުކަމުދާން އިށީނދެ އިންނަ އިންސާނާއާއި އޭނާގެ މާހައުލާ ވާނީ ގުޅިފައެވެ. ގުޅެނީ އެ އިންސާނާގެ ވިސްނުމާއި ހިޔާލުތަކުންނެވެ. ފިކުރުތަކާއި އިހުސާސްތަކުންނެވެ.
ކޮންމެއަކަސް، ޤުދުރަތީ ހިތްގައިމު މަންޒިލަކަށް ބޮޑުކަމުދާއިރު، މި ލިބޭ ޒާތީ، ނަފްސާނީ ފައިދާތަކާއި ތިމާވެށީގެ ޒިންމާ ހަމަހަމަ ކުރުމަކީ ކޮންމެހެން ބޭނުންތެރި ކަމެކެވެ. އެގޮތުން ތިމާވެށްޓަށް ކުރާ ނޭދެވޭ އަސަރު ކުޑަކުރުމަކީ ކޮންމެހެން ކުރަން ޖެހޭނެ ކަމެކެވެ. އިންސާނުންގެ ނަޖިހަކީ އޭގައި ތިމާވެއްޓަށް ފައިދާ އާއި ގެއްލުން ދެނިވި އެއްޗެކެވެ. އެހެންކަމުން ދިރާސާވެރިން ދެކިލައްވާގޮތުގައި ޤުދުރަތްތެރި ހިތްގައިމު މަންޒިލްތަކަށް ބޮޑުކަމުދާނަމަ، އިންސާނުން އުޅޭ ސަރަހައްދުތަކާ 200 ފޫޓު ދުރަށް، 8 ނުވަތަ 6 އިންޗި ވަޅުގަނޑަކަށް ބޮޑުކަމުދިއުމަށްފަހު ފަސްލާ ރަނގަޅަށް ވަޅުލަންވާނެއެވެ. މިއީ މިކަމުގައި ސިއްހީ ގޮތުން އެއްމެ ރައްކާތެރި ގޮތެވެ. އެހެނަސް ދިރާސާވެރިންގެ އެދުމަކީ މިފަދަ ގޮތަކަށްވެސް ބޮޑުކަމު ނުދިއުމެވެ. އެހެނީ ސިއްހީ ގެއްލުންތަކުން ކުޑަކުރުމަށެވެ. މީގެ އިތުރުން ތިމާގެ އަމަލުތަކުގެ ސަބަބުން ޤުދުރަތީ ސަރަހައްދުތައް ބޭނުންކުރާ އެހެން މީހުންނަށް ނޭދެވޭ އަސަރު ނުކުރާނެކަން ޔަގީންކުރަން ވާނެއެވެ. މިކަމުގައި ބޮޑުކަމުދާ ތަކެއްޗާއި ސާފުވާން ބޭނުންކުރި ތަކެތި، ރައްކާތެރި ގޮތުގައި ނައްތާލަން ސަމާލުކަން ދޭންވާނެއެވެ.
ޤުދުރަތީ ހިތްގައިމު މަންޒިލަކަށް ބޮޑުކަމުދިއުމާ ބެހޭގޮތުން ވާހަކަ ދައްކާއިރު، މިކަމުގައި ބޮޑުކަމުދާ މީހާއަށް ލިބޭ ނަފްސާނީ ފައިދާތަކެއް ހުއްޓެއްކަމަކު، އާއްމު ސިއްހަތުގެ ރައްކާތެރިކަމަށް ފަރުވާތެރިވުމީ ހަމަ ކޮންމެ މީހެއްގެ ޒިންމާއެކެވެ. އިންސާނުންގެ ނަޖިހުގެ ސަބަބުން ޖެހޭ އެތައް ސިއްހީ ބައްޔެއް ހުރެއެވެ. އެހެންކަމުން މިފަދަ މާހައުލަކަށް ބޮޑުކަމުދާން އެދޭ މީހާ، އެކަން ކުރަން ވާނީ ވަރަށްވެސް ޒިންމާދާރު ގޮތެއްގައެވެ. ޖުމުލަކޮށް ރަނގަޅީ އެކަން އެމަގުން ނުކުރުމެވެ. މިއީ އަދުގެ މި ޒަމާނާ ބީރައްޓެހި ކަމެކެވެ. މިއީ މި ތަހުޒީބު މުޖުތަމައަށް ހަޑި އަދި ހުތުރު ކަމެކެވެ. އިސްލާމް ދީންވެސް ބާރު އަޅަނީ އާއްމު އިޖްތިމާއީ ސަހަރައްދުތަކަށް ކުޑަކަމުދިއުމާ ބޮޑުކަމުދިއުމުން ދުރަށް ދިއުމަށެވެ. ނަމަވެސް އާއްމު އިޖްތިމާއީ ސަރަހައްދުތަކަށް ނުވާ، އެކަހެރި ޤުދުރަތީ ހިތްގައިމު މަންޒިލްތަކަކީވެސް އޮތް ތަންތަނެވެ. ކަމުގެ ޠަބީއަތުން ފައިދާތަކެއް ހުއްޓެއްކަމަކު، ގެއްލުންތަކެއްވެސް ހުރިކަމެކެވެ. ނަމަވެސް މިފަދަ ސައިންޓިިފިކް ހަގީގަތްތަކަކީ އިންސާނުންނަށް އެނގެން ޖެހޭނެ ކަންކަން ކަމުން މިކަންވެސް ހިއްސާކޮށްލީމުއެވެ. އަދި ކިއެއް މިއީ އަހަރެމެން ކާބަފައިންގެ އެ ހަމަޖެހޭ ދިރިއުޅުމުގެ އެއް ސިއްރުކަމުގައި ވެދާނެނޫންހެއްޔެވެ؟
