މިދިޔަ ހުކުރު ދުވަހު ހަތަރު މީހުނާއެކު ގެއްލުނު މުދާ އުފުލާ ދޯންޏާއި އޭގައި ތިބި މީހުން ފެނިއްޖެ އެވެ.

މީމު އަތޮޅުން ގެއްލިގެން ހޯދަމުން ދިޔައީ ތްރީއޭ ކުންފުނީގެ ސަޕްލައި ދޯންޏާއި އޭގައި ތިބި ހަތަރު މީހުންނެވެ. އޭގައި ތިބީ އެއް ދިވެއްސަކާއި ތިން ބިދޭސީންނެވެ.

މި ދޯނި ފެނިފައި ވަނީ ވ. ފޮއްތެޔޮ ކައިރިންނެވެ. މައުލޫމާތު ލިބިފައިވާ ގޮތުގައި ދޯނި ހުއްޓުނީ އަޑީ ތެޔޮ ހުސް ވެގެނެވެ. ދޯނި ހުއްޓުމުގެ ސަބަބުން އޮޔާ ދަނިކޮށް ފެނުނީ އެމީހުން ހޯދަމުން ދިޔަ ސީޕްލޭނަށެވެ.މި ދޯނި ގެއްލުނީ މ. މުލަކު ބޭރުންނެވެ. ނަމަވެސް ދޯނި ހޯދާފައިވަނީ އޭގެ 60 ކިލޯމީޓަރު ދުރުން ވ. ފޮއްތެޔޮ ބޭނުންނެވެ.

ސިފައިންނަށް ދިން މައުލޫމާތުގެ މައްޗަށް ބަލައި ސާޗް އޮޕަރޭޝަން ކުރިއަށް ގެންގޮސްފައިވަނީ މާބޭރުގެ އެވެ. ނަމަވެސް މި ދޯނުި ފެނިފައިވަނީ ފޮއްތެޔޮ ފަޅު ކައިރީގައި ފަރުމަތީގައި ނަގިލި ލައިގެން އޮއްވަ އެވެ.

މައުލޫމާތު ލިބިފައިވާ ގޮތުގައި އެ ހަތަރު މީހުންގެ ވެސް ހާލު ރަނގަޅެވެ. މިހާރު އެމީހުންނަށް ތެޔޮ ފޯރު ކޮށްދިނުމުގެ މަސައްކަތް ކަމާ ގުޅުން ހުރި ފަރާތްތަކުން ދަނީ ކުރަމުންނެވެ.

މި ދޯނި ފެނިފައި ވަނީ ދޯނި ހޯދަން ބޮޑު އޮޕަރޭޝަނެއް ފަށާފައި ވަނިކޮށެވެ. ދެ ސީޕްލޭނާއެކު ބޮޑު ސަރަހައްދެއް ބަލާފައިވެ އެވެ.