ކަރަންޓު ބޭނުންކުރާ މިންވަރު ދެނެގަތުމަށް ދިރާސާއެއް ހަދަން ސްޓެލްކޯ އާއި ރާއްޖޭގެ ގައުމީ ޔުނިވާސިޓީ (އެމްއެންޔޫ) އިން މިއަދު އެއްބަސްވެއްޖެ އެވެ.
މި ދިރާސާ ހެދުމުގެ އެއްބަސްވުމުގައި ސްޓެލްކޯގެ ފަރާތުން ސޮއިކުރެއްވީ މެނޭޖިން ޑިރެކްޓަރު ހުސެއިން ފަހުމީ އެވެ. އެމްއެންޔޫގެ ފަރާތުން ސޮއިކުރެއްވީ ވައިސް ޗާންސެލަރު އައިޝަތު ޝެހެނާޒް އާދަމް އެވެ.
ސްޓެލްކޯ އިން ބުނީ، އެ އެއްބަސްވުމުގެ މައިގަނޑު ދާއިރާއަކީ ބިލުކުރުމުގައި ދިމާވާ އެކި މައްސަލަތަކުގެ އަސްލު ސަބަބުތައް ދިރާސާކޮށް، ކަރަންޓު ބޭނުންކުރާ ވައްޓަފާޅި (ކޮންސިއުމަންޓް ޕެޓާންސް) ދިސާރާ ކުރުން ކަމަށެވެ.
އޭގެ އިތުރުން މޫސުމީ ބަދަލުގެ ސަބަބުން އެކަމަށް ކުރާ އަސަރު ދެނެގަނެ، ބިލުކުރުމުގެ ނިޒާމުގައި ހާމަކަން ބޮޑުކަމާއި ސައްހަކަމާއި ކަސްޓަމަރުންގެ ހިތްހަމަޖެހުން އިތުރުކުރުމަށް އިސްތިރާޖުތައް އެކުލަވާލުމަކީވެސް ދިރާސާގެ މައިގަނޑު ދާއިރާއެއް ކަމަށް ބުންޏެވެ.
ސްޓެލްކޯ އިން ބުނި ގޮތުގައި އެ ދިރާސާގައި ވޭތުވެދިޔަ 10 އަހަރު (2014 އިން 2014 އަށް)ގެ މައުލޫމާތު އެވަލުއޭޓް ކުރާނެ ކަމަށެވެ.
މި ދިރާސާގެ އަސާސީ މަގުސަދަކީ ސްޓެލްކޯ އިން ބުނި ގޮތުގައި:
• ކަރަންޓު ބޭނުންކުރާ ވައްޓަފާޅި
• ބިލުކުރުމުގެ ސައްހަކަން ވަޒަންކުރުން
• އެނާޖީ އެފިޝަންސީ އިތުރުކުރުމަށް ހުރި ފުރުސަތުތައް ދެނެގަތުން
• ކަސްޓަމަރުންގެ ހިތްހަމަޖެހުން
• މާލީ ގޮތުން މަސައްކަތް ކުރެވޭ ފެންވަރު
މި ދިރާސާ އިން ސްޓެލްކޯ އިން ހާސިލުކުރަން ބޭނުންވާ ކަންތައްތަކަކީ:
1. އެކި ކެޓަގަރީތަކުގެ ކަސްޓަމަރުން ކަރަންޓު ބޭނުންކުރާ ވައްޓަފާޅި ދެނެގަތުން
2. އެންމެ ގިނައިން ކަރަންޓު ބޭނުންކުރާ ވަގުތުތަކާއި މޫސުމީ ބަދަލުގެ ސަބަބުން ކަރަންޓު ބޭނުންކުރާ ވައްޓަފާޅިއަށް ކުރާ އަސަރު ދެނެގަތުން
3. މީޓަރު ކުރެވިފައިވާ ޔޫސޭޖް ޑޭޓާ އާއި ބިލްކުރެވޭ އަދަދުތަކާ އަޅާކިޔައިގެން ކަރަންޓް ބިލްތަކުގެ ސައްހަކަން ކަށަވަރުކުރުން
4. ބިލުކުރުމުގައި ގޯސްތަކެއް ހުރި ނަމަ، ހުރި ގޯސްތަކާއި ހުރި މިންވަރު ދެނެގަނެ އަދަދުކުރުން
5. ކަސްޓަމަރުންނަށް ކަރަންޓް ބޭނުންކުރުން މަދުކޮށް، ހަރަދު ކުޑަކުރެވޭނެ ދާއިރާތައް ދެނެގަތުން
6. ކަރަންޓް ބިލާ ގުޅޭ ގޮތުން ކަސްޓަމަރުންގެ ޝަކުވާތަކާއި ހިޔާލު ދެނެގަތުން
7. ކުންފުނީގެ އިސްތިރާޖު ކަނޑައެޅުމާއި ގޮތް ނިންމުމުގެ މަރުހަލާތަކަށް އެހީތެރިވުމަށްޓަކައި ހިޔާލުދީ، ތަފާސްހިސާބާއި ދިރާސާގެ މައްޗަށް ބިނާކުރާ މަޝްވަރާ ފޯރުކޮށްދިނުން
