މި ސަރުކާރު މަޤާމެއްގައި ހުރި މީހަކު ޝަރުއީ ނިޒާމުގެ ތެރެއަށް ނުފޫޒު ނުފޯރުވާނޭ ކަމަށާއި އެފަދަ މީހަކު ސަރުކާރުގެ ތެރޭގައި ހުރެއްޖެނަމަ މަޤާމުން ވަކިކުރާނޭކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
މާލެ ސިޓީ ކައުންސިލާ ބައްދަލުކުރެއްވުމަށްފަހު އެތަނުން ނިކުމެވަޑައިގެން ނޫސްވެރިއަކު ކުރެއްވި ސުވާލަކަށް ޖަވާބުދެއްވަމުން ރައީސް މުއިއްޒު ވިދާޅުވީ، އެމަނިކުފާނުގެ ވެރިކަމެއްގައި ސަރުކާރަށް ނިސްބަތްވާ އެއްވެސް މީހަކު، ޝަރުއީ ދާއިރާގެ ތެރެއަށް އެއްވެސް ވަރަކަށް ނުފޫޒު ނުފޯރުވާނޭކަމަށެވެ. އަދި ސަރުކާރަށް ނިސްބަތްވާ މީހަކު އެފަދަ ކަމެއް ކޮށްފިނަމަ ވަކިކުރެވޭނޭކަމަށް ރައީސް ވިދާޅުވިއެވެ.
ރައީސް އޮފީހުންނެއް އަދި ސަރުކާރުގެ އެއްވެސް ލެވެލްއަކުން ޝަރުއީ ނިޒާމުގެ ތެރެއަށް އެއްވެސް ވަރަކަށް ނުފޫޒު ނުފޯރުވާނެ
ރައީސް ޑރ.މުއިއްޒު ވިދާޅުވިއެވެ.
ރައީސް މުއިއްޒު ވިދާޅުވީ ރައީސް ޔާމީނުގެ ޝަރީއަތަށް ސަރުކާރުން އެއްވެސް ވަރަކަށް ނުފޫޒު ފޯރުވާފައި ނުވާނޭކަމަށެވެ. ސަރުކާރުގެ ތެރެއިން އެކަހަލަ ކަންކަމަށް ނުފޫޒު ފޯރުވުމަކީ އެމަނިކުފާނު އެއްވެސް ވަރަކަށް ތަހައްމަލު ކުރާނޭ ކަންތައްތަކެއް ނޫންކަމަށް ރައީސް ޑރ.މުއިއްޒު ވިދާޅުވިއެވެ.
ރައީސް ވިދާޅުވީ އެމަނިކުފާނު އަމަލުކުރައްވަމުން ގެންދަވަނީ އިންތިހާބު ދުވަސްވަރު ރައްޔިތުންނަށް ވީ ވައުދާ އެއްގޮތަށް ކަމަށާއި، އެނޫން ގޮތަކަށް މިހާތަނަށް އެއްވެސް ކަމެއް ކޮށްފައި ނުވާނޭކަމަށެވެ.
ރައީސް ޔާމީނުގެ ޝަރީއަތަށް ސަރުކާރުގެ އެއްވެސް ނުފޫޒެއް ފޯރުވާފައި ނުވާނޭކަމަށް ރައީސް މުއިއްޒު ވިދާޅުވިއިރު، ޕީއެންއެފުން ކުރިއަށްގެންދާ ޖަލްސާތަކުގައި ކުރީގެ ރައީސް ޔާމިނު ވިދާޅުވަމުން ގެންދަވަނީ އެމަނިކުފާނުގެ ޝަރީއަތަށް ސަރުކާރުން ނުފޫޒު ފޯރުވަމުން ގެންދަވާކަން އެނގިވަޑައިގަންނަވާ ކަމަށެވެ. އަދި އެކަންކަން އެމަގުން ކުރައްވާ މީހުންވެސް އެނގޭކަމަށް ރައީސް ޔާމިނު ވަނީ ވިދާޅުވެފައެވެ.
