ލޮނުމެދަކީ އަޅުގަނޑުމެންގެ ތެރޭގައި ވަރަށް ގިނަ މީހުން އެކިކަހަލަ ކާތަކެތި ތައްޔާރު ކުރުމަށްޓަކައި ބޭނުން ކުރާ އެއްޗެކެވެ. ލޮނުމެދު ކެއުމުން އަނގައިގައި ނުބައި ވަސް ހުއްޓަސް މި ކެއުމުން ހަށިގަނޑަށް ވަރަށް ގިނަގުނަ ފައިދާތަކެއް ލިބިދެއެވެ.
އެގޮތުން ބަލާއިރު ލޮނުމެދަކީ ހުޅުހުޅުގައި ހުންނަ ރިހުން ރަނގަޅު ކުރުމަށް އެހީވެދޭ އެއްޗެކެވެ. ލޮނުމެދަކީ ގިނަ އަދަދަކަށް އެންޓި-އޮކްސިޑެންޓް ހިމެނޭ އެއްޗެއް ކަމުން މި ބޭނުން ކުރުމުން ހަށިގަނޑުގެ ގުނަވަންތަކާއި ހުޅުހުޅު ދުޅަވުމުން ދުރުކޮށްދެއެވެ. އަދި މިކަމުގެ ސަބަބުން އާތްރައިޓިސް ފަދަ ބަލިތަކުން މީހާ ރައްކާތެރިކޮށްދީ، ހުޅުހުޅުގައި ރިއްސާނަމަ އެކަންވެސް ރަނގަޅު ކޮށްދެއެވެ.
މީގެ އިތުރުން ލޮނުމެދަކީ ތަފާތު އެކިކަހަލަ އެކްޓިވް މާއްދާތައް ހިމެނޭ އެއްޗަކަށް ވުމުން މި ބޭނުން ކުރުމުން މީހާގެ ގައިގައި ހުންނަ ލޭނާރުތަކުގައި ލޭދައުރުވުން ރަނގަޅު ކޮށްދެއެވެ. އަދި އޭގެ ސަބަބުން މީހާގެ ލޭގެ ޕްރެޝަރު ދައްކޮށްދީ، ހައިޕަޓެންޝަން އާއި ހިތުގެ ބަލިތަކުން މީހާ ރައްކާތެރި ކޮށްދެއެވެ.
އަދި މީގެ އިތުރުން ލޮނުމެދަކީ އޭގައި އެލިސިން ނަމަކަށް ކިޔާ މާއްދާއެއް އެކުލެވިގެންވާ އެއްޗެކެވެ. މި މާއްދާއަކީ މީހާގެ ދިފާއީ ނިޒާމު ވަރުގަދަ ކޮށްދިނުމަށް މަސައްކަތް ކުރާ މާއްދާއެއްކަމުން، ގަވާއިދުން ލޮނުމެދު ބޭނުން ކުރާނަމަ މީހާ ބަލިތަކުން ރައްކާތެރި ކޮށްދެއެވެ. އަދި ހަމަ އެހެންމެ އަރިދަފުސް ރޯގާ ފަދަ ބައްޔެއް ޖެހިއްޖެނަމަ އެކަންވެސް ފަސޭހަކަމާއެކު ރަނގަޅު ކޮށްދެއެވެ.
ލޮނުމެދަކީ ހަށިގަނޑަށް އެކި ގޮތްގޮތުން ފައިދާ ލިބިދޭ އެއްޗަކަށްވީއިރު، މި ބާވަތް ކެއުމުގައި ކޮންމެވެސް ގޮތަކަށް ހިމަނާލުމަކީ ވަރަށް މުހިންމު ކަމެކެވެ. މިއީ ތަފާތު އެކި ގޮތްގޮތަށް ކެއުމުގައި ހިމަނާލެވޭނެ އެއްޗެއްވެސް މެއެވެ. އެގޮތުން ބަލާއިރު ކާތަކެތީގެ ރަހަ މީރު ކުރުމުގެ ގޮތުން މި ބޭނުން ކުރެވޭއިރު ތަފާތު އެކިކަހަލަ އަސާރަ އާއި ތެޔޮ ތައްޔާރު ކުރުމަށްވެސް ވަރަށް ގިނަ މީހުން މި ބޭނުން ކޮށް އުޅެއެވެ.
