ދިވެހިރާއްޖޭގައި މިހަރު ހިނގަމުން ދަނީ އަނދިރި ދައުލަތެއް ކަމަށް ރައީސް އަބްދުﷲ ޔާމީން ވިދާޅުވެއްޖެއެވެ.
އެމަނިކުފާނު މިފަދައިން ވިދާޅުވީ ހޯމަ ދުވަހުގެރޭ ޕީއެންއެފްގެ އޮފީހުގައި ބޭއްވި ޖަލްސާގައި ވާހަކަފުޅު ދައްކަވަމުންނެވެ.
ރައީސް ޔާމީން ވިދާޅުވީ، ދިވެހި ދައުލަތް މިހާރު ހިންގަމުން ގެންދަނީ ރައްޔިތުންނަށް ގިނަ ކަންކަން ސިއްރުކުރަމުން ކަމަށެވެ.
އެގޮތުން އެމަނިކުފާނު ނަޒަރު ހިންގަވާ ލެއްވީ ދާދި ފަހުން އަންހެންނަކު ރަހީނު ކުރި މައްސަލައިގައި ފިރިހެން މީހާ ހައްޔަރުކުރަން ފުލުހުން އަމަލު ކުރި ގޮތަށާ އަދި މާލެ ސިޓީގެ ގެއެއްގެ 9 ވަނަ ފަންގިފިލާއިން އަންހެނަކު ވެއްޓި މަރުވި ހާދިސާއަށެވެ.
ރައީސް ޔާމީން ވިދާޅުވީ ފުލުހުންގެ ކްރެޑީބިލިޓީ ނުވަތަ އިތުރބާރު ރައްޔިތުން ކުރިމަތީ ގެއްލުނަ ނުދީ ހިފެހެއްޓުމަކީ ފުލުހުންގެ އަތްމަތީގައި އޮންނަ ކަމެއް ކަމަށާ އެހެންކަމުން މުޖުތަމައަށް އެނގުން މުހިއްްމު ކަންކަމުގެ މައުލޫމާތު ރައްޔިތުންނަށް ލަސްނުކޮށް ފޯރުކޮށްދޭން ޖެހޭނެ ކަމަށެވެ.
މިހެން ހުންނަ ކަންކަމުގައި މިހާރު އެބަ ޖެހޭތޯއޭ ފުލުުހުންގެ ތެރެއިން މުއިއްޒުގެ މެނިފެސްޓޯއަށް އައު ބާބެއް އިތުރުވާން. އެއީ މިގޮތަށް މަދަނީ މީހުން ދިވެހި ރައްޔިތުން ބައްދަލުވާއިރު އެކްސެސިވް ފޯސސް ނުވަތަ އެސްއޯޕީގެ ބޭރުން ކަތއްތައް ކުރުމުން ނުބައި ނަތީޖާއެއް ދެން ނުނުކުންނާނެކަން ކަށަވަރުކޮށްދޭން އަދި ފުލުހުންގެ ކަސްޓޮޑީގައި މީހަކު ގުދުރަތީކަމެއް މެދުވެރި ނުވަތަ ސިއްހީ ކުއްލި މައްސަލައެއް ދިާމވެގެން މަރުވުން ފިޔަވާ ފުލުހުންގެ އިހުމާލު ނުވަތަ ފުލުހުން ކުރާ ކަމަކުން ޚާއްސަކޮށް މަރާ ހަމައަށް ދަތުރުކުރާ ކަންތައްތައް ނުވާނެކަމުގެ ކަށަވަރުކަންއެބަދެއްވަން ޖެހޭ މިހާރު. ގެދޮރާ ހުރިހާ އެއްޗެއް ބަހައްޓަވާ. މިއީ ޕްލެޖުގައި ލިޔާނެކަންކަމެއް ނޫން. އެކަމަު މިހާރު އެބަޖެހޭ ޕްލެޖުގައި ލިޔަން. އެއީ މީހުންގެ ރައްކާތެރިކަމާ ގާނޫނު ދަމަހައްޓާނެކަމާ ޕްލެޖުގައި ލިޔާކަންކަން ނޫނަސް މިހާރު ކަންތައް ވާގޮތުން އެކަން ލިޔަން ޖެހެ. ފުލުހުން ބައެއް ކަންކަމުގައި ވަރަށް ފަސޭހައިން ރިއެކްޓިވް. އަނެއްބައި ކަންތައްތަކުގައި، އެއްގޮތަކަށްވެސް ޖަވާބެއް ދޭކަށް ބޭނުމެއް ނުވޭ. ދާދި ފަހުން ހަމަ ޒުވާން އަންހެން ކުއްޖަކު އަމިއްލައަށް ކޮންމެވެސް އުސް އިމާރާތަކުން ފުންމާލައިގެން މަރުވެއްޖެއޭ. އެންމެ ކުޑަ މިނުން ރައްޔިތުންނަށް އެންގެން އެބަ ޖެހޭ މީގަ ތަހުގީގު އެބަ ހިނގާ ހެއްޔޭ. ކޮބާ ހެއްޔޭ މީގެ ބެކްގްރޮއުންޑަކީ. މީ ކިހިނެއް ވެގެން ހިނގި ކަމެއް ހެއްޔޭ. މިއަކަށް ފުލުހުން ބޭނުމެއް ނުވޭ ރިއެކްޓު ކުރާ ކަށް. މީ އަނދިރި ދައުލތެއްގަ ކަންތައް ހިނގާ ގޮތަށް މި ހިނގަނީ. އަނދިރި ދައުލަތެއްގައި ކަންކަން ފޮރުވާ ގޮތަށް މި ފޮރުވަނީ.
ރައީސް ޔާމީން އިތުރަށް ވިދާޅުވީ، ގައުމުގެ ކަންކަން މިހިނގާ މަގުން ހިނގާނަމަ ކުރިއަށް އޮތް ދުވަސްތަކުގައި ރައްޔިތުން މަގުތަކަށް ނުކުމެ މަގުމަތީ ހަރަކާތްތައް ފަށާ ސަރުކާރާ ދެކޮޅަށް އަޑު އުފުލާނެ ކަމަށެވެ.
ހުރިހާ ގޮތަކުން ރައްޔިތުންނަށް ދަތިވަމުންދާއިރު އެއީ ނުވުމަށް ވުރެ ވުން ގާތް ކަމެއްގެ ގޮތުގައި ރައީސް ޔާމީން ފާހަގަކުރެއްވިއެވެ.
