މި ދެ ގެއަކީ އެ ބޭންކުން ނަގާފައިވާ ދެ ލޯނަކަށް ފައިސާ ނުދައްކައިގެން ނީލަމުގައި ވިއްކާލަން ނިންމާފައިވާ ގެތަކެކެވެ.
ނީލަމުގައި ވިއްކާލަން ނިންމާފައިވަނީ ސަންފްރަންޓް ލައިޓްޝޮޕް ގޯޅިތެރޭގައި ހުންނަ މ. ނާއިންފަރުއާގެ އާއި މ. ބީޗްކޯނާއެވެ. މ. ނާއިންފަރުއާގެ ވިއްކާލަން ނީލަން ފެށޭ އެންމެ ދަށް އަގަކީ 13 މިލިއަން ރުފިޔާއެވެ. މިއީ 792 އަކަފޫޓުގެ ގެއެކެވެ. އަދި މ. ބީޗްކޯނާ ވިއްކާލަން ނީލަން ފެށޭ އެންމެ ދަށް އަގަކީ 23.8 މިލިއަން ރުފިޔާއެވެ. މިއީ 927.33 އަކަފޫޓުގެ ގެއެކެވެ.
މި ދެ ގެ ވެސް ނީލަމުގައި ވިއްކާލަން ހަމަޖެހިފައިވަނީ އެންމެ ބޮޑު އަގެއް ހުށަހަޅާ ފަރާތަކަށެވެ. ބޭންކުން ބުނެފައިވާ ގޮތުގައި އެންމެ ބޮޑު އަގެއް ހުށަހެޅި ފަރާތް ކަނޑައަޅާނީ ހުށަހަޅާ އަގު އެންމެ މަތީ އަގުގެ ގޮތުގައި ބަދަލެއް ނައިސް ފަސް ދުވަހުގެ މުއްދަތަކަށް އޮތުމުންނެވެ.
ނީލަން ނިމުމުން އެންމެ މަތީ އަގު ހުށަހަޅާ ފަރާތަށް އެކަން އަންގާނެ ކަމަށާއި، ބޭންކުން އެކަން އަންގާ ތާރީޚުން ފެށިގެން ސަރުކާރު ބަންދު ދުވަސްތައް ނުހިމަނައި 10 ދުވަހުގެ ތެރޭގައި، ނުވަތަ ބޭންކުން އިތުރުކޮށްދޭ މުއްދަތެއްގެ ތެރޭގައި އެ ފަރާތަކުން ހުށަހެޅި ޖުމްލަ އަގަށްވާ ފައިސާ ބޭންކަށް ދައްކަން ޖެހޭނެ ކަމަށްވެސް ބޭންކުން ބުނެފައިވެއެވެ.
