މަގުމަތީގެ ސަލާމަތާއި ރައްކާތެރިކަން ކަށަވަރުކުރުމަށް ފުލުހުން ކުރަމުންދާ މަސައްކަތުގެ ތެރެއިން މަހެއްގެ ތެރޭގައި 6,000 އަށް ވުރެ ގިނަ އުޅަނދު ހިފަހައްޓާ ފާސްކޮށްފިއެވެ.
އެ މަސައްކަތުގެ ތެރެއިން މިދިޔަ މަހުގެ 12 އިން 30ގެ ނިޔަލަށް ހުޅުމާލޭގައި ކުރި މަސައްކަތްތަކުން ފުލުހުން ވަނީ 5,427 ސައިކަލާއި، 1,266 ކާރު ހުއްޓުވައި ބަލައި ފާސްކޮށްފައެވެ. މީގެ ތެރެއިން 112 އުޅަނދެއް ދުއްވި ފަރާތަކި ލައިސަންސް ނެތި ދުއްވި ފަރާތްތަކެވެ.
ޖުމްލަ އުޅަނދުތަކުގެ ތެރެއިން 482 އުޅަނދަކަށް ފިޔަވަޅު އެޅިފައިވާއިރު ފުލުހުން ވަނީ 515 ފަރާތަަކަށް ނަސޭހަތްދީފައެވެ. އަދި ޓްރެފިކް ގަވާއިދާ ޚިލާފުވެގެން 182 އުޅަނދެއް ހިިފަހައްޓާފައިވެއެވެ.
މަގުމަތީގެ ރައްކާތެރިކަން އިތުރުކުރުމަށް މިދިޔަ މަހުން ފެށިގެން ފުލުހުން ގެންދަނީ ޚާއްސަ އޮޕަރޭޝަންތަކެއް ހިންގަމުންނެވެ. އެގޮތުން މާލެ ސަރަޙައްދުގައި ފުލުހުންގެ ހަރަކާތްތެރިވުން އިތުރުކޮށް، މާލެ އަދި ހުޅުމާލޭގައި ފުލުހުންގެ ޗެކް ޕޯސްޓްތައް ވަނީ އިތުރުކޮށްފައެވެ. އަދި ކޮންމެ ފަސް މިނެޓަކުން ފުލުހަކާ ބައްދަލުކުރެވޭ ގޮތަށް މަގުމަތީގައި ފުލުހުންގެ ހަރަކާތްތެރިކަން އިތުރުކުރުމަށް ވެސް އިތުރު ފިޔަވަޅުތަކެއް އެޅުމަށް ފުލުހުން ވަނީ ނިންމާފައެވެ.
އެފަދަ އޮޕަރޭޝަންތައް ފުލުހުން ހިންގަން ފެށީ، ފާއިތުވި ދެ މަހުގެ ތެރޭގައި މާލެ ސަރަހައްދުގައި ގިނަ ނުރައްކާތެރި އެކްސިޑެންޓްތަކެއް ހިނގުމުގެ ސަބަބުންނެވެ. އެގޮތުން ސައިކަލް އަދި ކާރު ހިމެނޭ އެކްސިޑެންޓްތަކުގައި ފާއިތުވި ދެ މަހުގެ ތެރޭގައި ދެ މީހަކު ވަނީ މަރުވެފައެވެ.
