މިދިޔަ ސަރުކާރުގައި ކޮވިޑް 19 ގެ ތެރޭގައި ވެންޓިލޭޓަރު ގަތުމަށް ހިންގި ޚިޔާނާތުގެ މައްސަލާގައި ދައުލަތަށް ގެއްލުނު ލާރި އަނބުރާ ލިބޭނެކަމަށް ބަންޑާރަ ނައިބު އަހުމަދު އުޝާމް ވިދާޅުވެއްޖެއެވެ. އުޝާމް އެހެން ވިދާޅުވީ ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުންނެވެ.
އުޝާމް ވިދާޅުވީ ދުބާއީ ކުންފުންޏަކަށް ވެންޓިލޭޓަރު ގަތުމަށް ދިން ލާރީގެ މައްސަލަ ދުބާއީގެ އާބިޓްރޭޝަނަށް ހުށައަޅާފައިވާނެ ކަމަށާއި އަދި އެ މައްސަލަ ނިމުނީ ދިވެހި ދައުލަތާއި އެއްކޮޅަށް ކަމަށެވެ. އެހެން ކަމުން ދުބާއީގެ ކުންފުނިން ދިވެހި ދައުލަތަށް އަނބުރާ އެ ފައިސާ ދައްކަން ޖެހޭނެ ކަމަށްވެސް އުޝާމް ވަނީ ވިދާޅުވެފައެވެ.
އެ މައްސަލަ އަޅުގަނޑުމެން އާބިޓްރޭޝަންއަށް ހުށައަޅައިގެން ސަރުކާރާއި އެއްކޮޅަށް މައްސަލަ ނިމިފައި އޮތީ. އެ ކުންފުނިން ސަރުކާރަށް ފައިސާ ދޭން ޖެހޭ ކަމަށް ނިންމާފައި އޮތީ. އޭތީގެ އެންފޯސްމެންޓް މަސައްކަތް މިހާރު ކުރަމުން މިދަނީ. ކުންފުންޏާއި ބެހޭ މަޢުލޫމާތެއް ވެސް ނޭނގެ. ކުންފުނި ވީތަނެއް ވެސް ނޭނެގެ. އެކަމަކު އަޅުގަނޑުމެން މިހާރު ކުރަމުންދާ މަސައްކަތަކީ އެ އެންފޯސްމެންޓް ގެ މަސައްކަތް. ދުބާއީ ގެ ލޯ ފާމް އަކާއި ގުޅިގެން އާބިޓްރޭޝަންގެ މައްސަލަ ތަންފީޒު ކުރުމަށްޓަކައި އެ ފައިސާ ހޯދުމަށްޓަކައި އެންފޯސްމެންޓް ގެ މަސައްކަތް ކުރިއަށް އެބަދޭ. އޭގައި ކުރިއެރުންތަކެއް ވެސް އެބަ ލިބޭ. އަޅުގަނޑަށް ހީވަނީ އަންނަ އަހަރު ކުރީ ކޮޅު އެކަމާއި ބެހޭ މަޢުލޫމާތުތައް ދެވޭނެހެން. އަޅުގަނޑު އުއްމީދުކުރަނީ އެ ފައިސާ އަނބުރާ ލިބޭނެ ކަމަށް.-ބަންޑާރަ ނައިބު އަހުމަދު އުޝާމް
މިދިޔަ ސަރުކާރުން ކޮވިޑް 19 ގެ ތެރޭގައި ވެންޓިލޭޓަރު ގަތުމަށް އެގްޒެކިއުޓާސް ޖެނެރަލް ޓްރޭޑިންއާ ހަވާލުކުރުމުގައި އަމަލުކޮށްފައިވަނީ މާލިއްޔަތު ގާނޫނާއި ޙިލާފަށެވެ.
މިނިސްޓަރ އަމީން ވަނީ ވެންޓިލޭޓަރު ހޯދަން ގާބިލް ކުންފުންޏެއްތޯ ނުބަލައި ދުބާއީގެ ކުންފުންޏަކާއި ހަވާލުކޮށް އެއްބަސްވުމެއް ނެތީސް މަސައްކަތް ކުރިއަށް ގެންދަން އެ ކުންފުންޏަށް އަންގާފައެވެ. އަދި މި މުއާމަލާތުގައި އެޑްވާންސް ޕޭމަންޓުގެ ގޮތުގައި އެއްބަސްވުމުގެ %90 ( 30 މިލިއަން ރުފިޔާ ) ވަނީ ދީފައެވެ. އޭސީސީން ބުނެފައިވާ ގޮތުގައި އެޑްވާންސް ފައިސާ ދެއްކީ ، އެގްޒެކިއުޓާސްއިން 65 މެކޭނިކަލް ވެންޓިލޭޓަރާއި 10 ޕޯޓަބަލް ވެންޓިލޭޓަރަށް ކަމަށެވެ. ނަމަވެސް މި ފައިސާ ނުލިބެނީސް އެ ތަކެތި ލިބިފައިވާ ކަމަށް ސެޕް ސިސްޓަމު ގައި ލިޔެފައި ވާކަމަށް ވެސް އޭސީސީއިން ވަނީ ބުނެފައެވެ. އޭރު އެގްޒެކިއުޓާސް އާ އެކު އެއްވެސް އެއްބަސްވުމެއްގައި ސޮއިކޮށްފައި ނުވާކަމަށްވެސް އޭސީސީގެ ރިޕޯޓުތަކުގައި ވަނީ ފާހަގަކޮށްފައެވެ.
އޭސީސީން ވަނީ މިނިސްޓަރު އަމީންއާ އެކު 11 މީހެއްގެ މައްޗަށް ދައުވާކޮށްދޭން ޕީޖީގައި އެދިފައެވެ. އެއީ، ފައިނޭންޝަލް އެގްޒެކެޓިވް އަހްމަދު އަސްލަމާއި ޑެޕިއުޓީ މިނިސްޓަރު ނިޝާމާ މުހައްމަދާއި ޑެޕިއުޓީ މިނިސްޓަރު ޝިޔާމާ މުހައްމަދާއި ޑިރެކްޓަރު ނައުޝާދު އަލީ އާއި ބިޑް ކޮމިޓީ މެމްބަރު އާމިނަތު ޝައުފާ އާއި އެސިސްޓެންޓް ޑިރެކްޓަރު ފާތުމަތު ލިމްޔާ އާއި ލީގަލް އޮފިސަރު އަލީ ޝިހާމާއި އެސިސްޓެންޓް ޑައިރެކްޓަރު އަބްދުﷲ ހަފީޒާއި އެސިސްޓެންޓް އެޑްމިނިސްޓްރޭޓިވް އޮފިސަރު ހުސައިން ނިޔާޒުގެ މައްޗަށެވެ. ނަމަވެސް 20 އޮކްޓޯބަރ 2020 ޕީޖީ އޮފީހުން ވަނީ މި މައްސަލާގައި އެެއްވެސް ފަރާތަކަށް ދައުވާ ނުކުރުމަށް ކަނޑައަޅައި މައްސަލަ ޕީޖީ އޮފީހުން ނެރެލާފައެވެ.
