އިޒްރޭލުގެ އަސްކަރިއްޔާއިން ހޮނިހިރު ދުވަހު (އޮކްޓޯބަރު 26) ފަތިހު ވަނީ އީރާނުގެ އަސްކަރީ އަމާޒުތަކަށް ހަމަލާދޭން ފަށާފައިވާކަން އިއުލާނުކޮށްފިއެވެ.
އިޒްރޭލު އަސްކަރިއްޔާ އިން ބުނީ ހަމަލާތައް ދެމުން އަންނަނީ އިރާނުގެ ވެރިރަށް ތެހްރާނުގައި ގާއިމުކޮށްފައިވާ އަސްކަރީ އަމާޒުތަކަށް ކަމަށާއި މިއީ މި މަހުގެ ކުރީކޮޅު އިރާނުން އިޒްރޭލަށް ދިން ހަމަލާގެ ރައްދުގައި ދެމުންދާ ހަމަލާތަކެއް ކަމަށެވެ.
ފަތިހު އީރާނުގެ އަމާޒުތަކަށް އިސްރާއީލުން ހަމަލާދޭން ފެށުމުން އީރާނުގެ އެންޓި އެއާކްރާފްޓް ގަންތަކުން ޑްރޯންތައް ވައްޓާލާފައިވާއިރު، ތެހެރާންގެ އުޑުމަތީގައި މިސައިލްތައް ގޮއްވާލި މަންޒަރުތައް ވަނީ ފެނިފައެވެ.
”އަޅުގަނޑުމެންގެ ޑިފެންސިވް އަދި އޮފެންސިވް ކެޕޭސިޓީ ތައް ފުރިހަމައަށް މޮބިލައިޒް ކުރެވިފައި އެބަހުރި. އިޒްރޭލުގެ ދައުލަތާއި އިސްރާއީލުގެ ރައްޔިތުންގެ ދިފާއުގައި ކުރަން ޖެހޭ ހުރިހާ ކަމެއް ކުރާނަން،“ އިސްރާއީލުގެ ދިފާއީ ބާރުތަކުގެ ޗީފް ސްޕޯކްސްޕާސަން ރިއާ އެޑްމިރަލް ޑެނިއަލް ހަގާރީ ވިދާޅުވި އެވެ.
އީރާނުގެ ވެރިރަށް ތެހެރާނުގައި ބޮމުގެ އަޑު އިވެމުން ދިޔައިރު، ތެހެރާންގެ ވަށައިގެން މަދުވެގެން ހަ ބޮމެއް ގޮއްވާލި ކަމަށް އެގައުމުގެ ދައުލަތުގެ މީޑިއާއިން ފުރަތަމަ ރިޕޯޓް ކޮށްފައިވެއެވެ. ނަމަވެސް އޭގެ ތެރެއިން ބައެއް އަޑު ތަކަކީ އެ ސިޓީގެ ވަށައިގެންވާ ވައިގެ ދިފާއީ ނިޒާމުތަކުން ވައިގެ ތެރޭގައި މިސައިލްތައް ގޮއްވާލި އަޑުކަމަށްވެސް ބުނެފައިވެއެވެ.
އިޒްރޭލުން އީރާނަށް ދިން ހަމަލާތަކުގެ ތެރޭގައި އީރާނުގެ ނިއުކްލިއާ މަރުކަޒުތަކަށާއި ތެޔޮ ފީލްޑްތަކަށް ހަމަލާ ދިނުން ނުހިމެނޭ ކަމަށާއި އަސްކަރީ އަމާޒުތަކަށް އަމާޒުކޮށްފައިވާ ކަމަށް އިޒްރޭލުގެ އޮފިޝަލަކާ ހަވާލާދީ އެންބީސީ ނިއުސް އާއި އޭބީސީ ނިއުސް އިން ވަނީ ބުނެފަ އެވެ.
އިރާގުގެ ޓްރާންސްޕޯޓް މިނިސްޓްރީން ވަނީ ވަކި ގޮތެއް އަންގަންދެން އެގައުމުގެ ހުރިހާ އެއާޕޯޓެއްގެ ވައިގެ ދަތުރުފަތުރު މެދުކަނޑާލަން ނިންމައިފަ އެވެ.
މި މަހުގެ ކުރީކޮޅު އިރާނުން ވަނީ އިޒްރޭލަށް އަމާޒުކޮށް 300 އަށް ވުރެ ގިނަ މިސައިލް ހަމަލާ ދީފައެވެ. އެ ހަމަލާތަކަކީ ހަމާސް ޖަމާއަތުގެ ވެރިޔާ އިސްމާއިލް ހަނިއްޔާ އާއި ލުބްނާނުގެ ހިޒްބުﷲ ޖަމާއަތުގެ ލީޑަރު ހަސަން ނަސްރުﷲ އަވަހާރަކޮށްލުމުގެ ބަދަލެއްގެ ގޮތުން ދިން ހަމަލާތަކެއްކަމަށް އިރާނުން ވަނީ ބުނެފަ އެވެ. އަދި އެ ހަމަލާ ތަކުގެ ބަދަލުގައި އިސްރާއިލުން އިރާނަށް ހަމަލާދީފިނަމަ ވަރުގަދަ ރައްދެއް ދޭނެ ކަމުގެ އިންޒާރު ދީފައެވެ.
