ދެ ދުވަސް ތެރޭގައި ވެރިކަންކުރާ މައި ޕާޓީ ކަމަށްވާ ޕީޕަލްސް ނެޝަނަލް ކޮންގްރެސް (ޕީއެންސީ) އަށް 10،400 މީހުން އަލަށް ސޮއިކޮށްފައިވާ ކަމަށް އެ ޕާޓީގެ ޕާލިމެންޓްރީ ގްރޫޕުގެ ލީޑަރު އަދި އިނގުރައިދޫ ދާއިރާގެ މެންބަރު އިބްރާހިމް ފަލާހު ވިދާޅުވެއްޖެއެވެ.
ޕީއެންސީން ވަނީ އެ ޕާޓީގެ މެންބަރުން އިތުރުކޮށް ރާއްޖޭގެ އެންމެ ބޮޑު ސިޔާސީ ޕާޓީއަށް ހެދުމަށް މެންބާޝިޕް ޑްރައިވިން ހަރަކާތެއް ފަށައިފައެވެ. އެއީ އެ ޕާޓީގެ ރައީސް އަދި ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ އެދިވަޑައިގަތުމެއްގެ މަތިން އަންނަ ނޮވެމްބަރު މަހުގެ ނިޔަލަށް 75،000 މެންބަރުން ހަމަކުރުމަށް ކުރިއަށްގެންދާ ހަރަކާތަކެވެ.
ފަލާހު މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ އެ ޕާޓީއަށް ދެ ދުވަސް ތެރޭ 10،000 އަށްވުރެ ގިނަ މީހުން ސޮއިކުރުމުން ރައީސް މުއިއްޒަށް، ރައްޔިތުން ތާއިދުކުރަމުންދާ މިންވަރު ސާފުވެފައިވާ ކަމަށެވެ.
”އޮކްޓޫބަރު 26 އަދި 27، މި ދެ ދުވަހު އެކަނި ޕީއެންސީން ހިންގި މެންބާޝިޕް ޑްރައިވްގައި 10،400 މީހުން މެންބަރުން ޕީއެންސީއަށް އަލަށް ގުޅުމުން ރައީސް މުއިއްޒަށް މުޅި ދިވެހިރާއްޖޭގައި އޮތް ތާއީދު ވަރަށް ސާފު ދެ ދުވަހުން. އިލެކްޝަން ގަވާއިދު ބުނާ ގޮތުން ނަމަ ތިން ސިޔާސީ ޕާޓީގެ އަދަދު މި ހަމަވީ،“ ފަލާހު ވިދާޅުވިއެވެ.
އޭނާ ވިދާޅުވީ 2028 ވަނަ އަހަރު ބާއްވާ ރިޔާސީ އިންތިހާބު ރައީސް މުއިއްޒު ކާމިޔާބުކުރައްވާނެ ކަމަށެވެ.
ޕީއެންސީއަށް މެންބަރުން އިތުރުކުރުމަށް މުޅި ރާއްޖޭގައި ގިނަ ހަރަކާތްތަކެއް ފެށީ މިއަހަރުގެ އޮގަސްޓު އެއްވަނަ ދުވަހުއެވެ. އަދި އެ ހަރަކާތް މިމަހުގެ 15 ވަނަ ދުވަހުގެ ނިޔަލަށް ކުރިއަށްގެންދަން ވަނީ ނިންމައިފައެވެ.
ފަލާހު މިދިޔަ ސެޕްޓެމްބަރު މަހުގެ 14 ގައި ”ވަން“ އަށް ވިދާޅުވެފައިވަނީ އެހާތަނަށް ޕީއެންސީއަށް މެންބަރުން އިތުރުކުރުމަށް ކުރިއަށްގެންދިޔަ ހަރަކާތްތަކުން 50،000 އާ ގާތްކުރާ އަދަދަކަށް ފޯމު ލިބިފައިވާ ކަމަށެވެ.
”ނޮވެމްބަރު ނިމޭއިރު، އަޅުގަނޑުމެންގެ ޕާޓީގައި 75،000 މެންބަރުން ތިބޭނެ އިރާދަކުރެއްވިއްޔާ. ކޮންމެ ދުވަހަކުވެސް ފޯމު ފުރުމުގެ މަސައްކަތް ކުރިއަށްދާނެ. ވަރަށް ބޮޑު ހަރަކާތެއްވީމަ ޓައިމްކޮޅެއް ނަގާނެ އިތުރަށް 45،000 ފޯމު ފުރަން ތިއްބަސް އަދި ވަރަށް ޓައިމް ނަގާނެ. މިއަދުވެސް މާލޭގައި މައްޗަންގޮޅިއާއި ގަލޮޅުގައި ފޯމު ފުރުމުގެ ހަރަކާތްތައް ކުރިއަށް އެބަދޭ. ބޮޑެތި ސިޓީތަކަށް ބަލާނަމަ، އައްޑޫސިޓީގައާއި ކުޅުދުއްފުށި ސިޓީގައިވެސް ކުރިއަށް އެބަދޭ،“ ފަލާހު ވިދާޅުވެފައިވެއެވެ.
”ރައްޔިތުން ތިބީ ރައީސުލްޖުމްހޫރިއްޔާގެ މި ސިޔާސަތަށް ރުހި ގަބޫލުވެގެންކަން ވަރަށް ބޮޑަށް ހާމަވޭ. 75،000 މެންބަރުންނާއެކު ޕީއެންސީ ވެގެންދާނީ ރާއްޖޭގެ ތާރީހުގައި ވެސް އެންމެ ބޮޑު ސިޔާސީ ޕާޓީއަށް. މިހާ ގިނަ އަދަދެއްގެ ރައްޔިތުން އެއް ޕާޓީއަކަށް ވަންނާނީ ސަރުކާރަކަށް އެ ރައްޔިތުން ވަރަށް ބޮޑު ތާއީދެއް ކުރާތީ.“
ފަލާހު އިތުރަށް ވިދާޅުވެފައިވަނީ ޕީއެންސީއަށް މެންބަރުން އިތުރުކުރަން ކުރިއަށްގެންދާ ހަރަކާތުން، ރައްޔިތުންގެ ފަރާތުން ސަރުކާރު މިހާރު ހިންގާ ގޮތާ މެދު އެއްވެސް ޝަކުވާއެއް ލިބިފައި ނުވާ ކަމަށެވެ.
