ކައިވެނި ކުރަނީ މުޅި ހަޔާތް ދެމަފިރިން އެކުގައި ވޭތުކުރުމަށެވެ. ނަމަވެސް ދުވަސްކޮޅެއް ފަހުން ތިބާގެ ފިރިމީހާ އެހެން އަންހެނަކާ ވަގުތީ ނުވަތަ ދާއިމީ ގޮތުން ވެސް ގުޅެނީ ކީއްވެ ހެއްޔެވެ؟ މި ބަލައިލަނީ މި ކަން މި ގޮތަށް ދިމާވެދާނެ 11 ސަބަބަކަށެވެ.
އެކަކާއެކު އުޅެން ބައެއް ފިރިހެނުންނަށް އުނދަގޫ ކަމަކަށްވެއެވެ. ހާއްސަކޮށް ކަންތައްތައް ދެކެ އަވަސްއަވަހަށް ފޫހިވާ މީހުންނެވެ. މި ފަދަ ފިރިންނާ ބާއްވާ ގުޅުން ޖެހޭނީ އަބަދުވެސް ތާޒާކަންމަތީގައި ބާއްވާނެ ގޮތްތައް ހޯދައިށެވެ.
ތިބާ ދެކެ ވާ ލޯތްބަށް ވެސް ބަދަލު އަތުވެދާނެއެވެ. އެ ގޮތުން އޭނާގެ ހިތުގައި ތިބާއަށް އޮތް ލޯބި މަޑުމަޑުން ފޮހެވެމުން ގޮސް އެކުގައި ނެތިގެން ހިނގައިދާނެއެވެ. މިފަދަ ހާލަތްތަކުން ސަލާމަތްވުމަށް، ލޯބި ދެމެހެއްޓޭނެ ގޮތްތަކަކީ ކޮބައިތޯ ތިބާ ހޯދަންވާނެއެވެ.
ތިބާ އޭނާއަށް އިހުތިރާމް ނުކުރާ ކަމަށް އޭނާއަށް ހީވާން ފަށައިފި ނަމަ، އޭނާއަށް އިހުތިރާމްކުރާ އަންހެނެއް ގާތަށް ދިއުން އޮންނާނީ ވަރަށް ކައިރީގައެވެ. ހާއްސަކޮށް، އެހެން ފިރިހެނުންނާ ތިބާ އޭނާ އަޅާނުކިޔާށެވެ. އޭނާގެ ހިޔާލުތަކާއި ވިސްނުންތަކަށް ޖާގަ ދީ، އޭނާއަށް އިހުތިރާމްކުރާށެވެ.
ބައެއް ފަހަރަށް ފިރިމީހާއަށް ފިތޭ ކަހަލަ އިހުސާސެއް ކުރެވިދާނެއެވެ. ހާއްސަކޮށް، ދަރިއަކު ހޯދަން ތައްޔާރު ނުވެ ހުއްޓައި ދަރިޔަކު ލިބި، އެ ދަރިއަކު ބަލަންޖެހުމުންނެވެ. އެހެންކަމުން ދަރިން ހޯދަން ވާނީ ދެ މީހުން ދުރާލާ ރާވައިގެންނެވެ. އެހެން ނޫން ނަމަ ދަރިއަކު ނެތް އަންހެނެއްގެ ގާތަށް އިސާހިތަކު އޭނާ ގޮސްފާނެއެވެ.
ފިރިމީހާގެ ހުރިހާ ހަރަކާތްތަކެއް ހުންނަ ގޮތް ތިބާ ބަލަން ފަށައިފި ނަމަ އޭނާގެ މިނިވަންކަން އޭނާއަށް ގެއްލޭކަމުގެ އިހުސާސެއް ކުރެވިދާނެއެވެ. ބައެއް ފިރިންނަކީ ޒަވާޖީ ހަޔާތެއްގައި އުޅުނަސް މިނިވަންކަން އިހުސާސްކުރަން ބޭނުންވާ މީހުންނެވެ. މިހެންވެ އޭނާއަށް ތިބާ ދޫތަކެއް ދޭންޖެހެއެވެ. އެ ގޮތުން އިޖުތިމާއީ ގުޅުންތައް ބާއްވަން އޭނާއަށް ޖާގަ ދޭންވާނެއެވެ.
އޭނާއާމެދު އަޅާނުލައި، ފަރުވާލެއް ނުބަހައްޓާކަމަށް އޭނާއަށް އިހުސާސްކުރެވޭ ނަމަ، އޭނާއަކީ އެކަނިވެރި މީހެއްކަމަށް އޭނާއަށް އިހުސާސް ކުރެވެން ފަށައިފާނެއެވެ. މިހެންވެ، އޭނާގެ ޖަޒުބާތީ އަދި ޖިސްމާނީ އެދުންތައް ފުއްދައިދިނުމަށް ތިބާ ސަމާލުކަން ދޭންވާނެއެވެ.
އަނބިމީހާގެ ހަށިގަނޑަށް އަންނަ ބަދަލުތަކުގެ ސަބަބުން ބައެއް ފިރިން އެ މީހުންގެ އަނބިން ދެކެ ފޫހިވާން ފަށައެވެ. މިސާލަކަށް، ދަރިން ލިބުމަށް ފަހު އަނބިމީހާ ފަލަކަންމަތީގައި ދެމިހުންނަ ނަމައެވެ. މިހެންވެ، އަބަދުވެސް ފިޓުކޮށް ހުންނަން ތިބާ ސަމާލުކަން ދޭންވާނެއެވެ.
ޖިންސީ އެދުން ފުރިހަމަ ނުވުމަކީ ވަރަށް ގިނަ ފިރިން އެހެން އަންހެނުން ގާތަށް ދާ ސަބަބެކެވެ. އެކި ސަބަބުތަކާހުރެ ތިބާ އޭނާއާ އެއްދާންކުރަން ދެކޮޅު ހަދާ ނަމަ، އޭނާގެ ޖިންސީ އެދުން ފުއްދައިދޭނެ އަންހެނެއްގެ ގާތަށް ދިއުން އޮންނާނީ ކައިރީގައެވެ.
ގެވެށި އަނިޔާގެ ޝިކާރައަކީ ހަމައެކަނި އަންހެނުންނެއް ނޫނެވެ. އަނބިމީހާ ވެސް އޭނާގެ ފިރިމީހާއަށް ގެވެށި އަނިޔާ ދީފާނެއެވެ. މި ގޮތަށް ކަންތައްތައް ދިމާވާން ފަށައިފި ނަމަ ރައްކާތެރި އުނގެއް ލިބޭނެ އަންހެނެއްގެ ގާތަށް ފިރިމީހާ ދާނެއެވެ.
ފިރިމީހާއަށް ޒަވާޖީ ހަޔާތުން އުފާވެރިކަން ނުލިބުމަކީ ވެސް އޭނާ އެހެން އަންހެނަކާ ގާތްވާން ފައްޓާ ސަބަބަކަށް ވެދާނެއެވެ. މި ކަމަށް އޮތް ހައްލަކީ އޭނާގެ އައިބު ސިފަތައް ވެސް ބަލައިގަތުމެވެ. އެހެނީ، އެއްވެސް މީހަކީ ހުރިހާ ކަމެއް ފުރިހަމަ އިންސާނަކަށް ނުވާނެއެވެ. މިހެންވެ އޭނާގެ އައިބުތައް ބަލައިގަތުމުން ނޫނީ ތިބާއާމެދު އޭނާގެ ހިތްސާފެއް ނުވާނެއެވެ.
ދެމަފިރިން ޝައުގުވެރިވާ ކަންތައްތައް ވަކި ހިސާބަކުން ބަދަލުވާން ފަށައިފި ނަމަ، ފިރިމީހާ ޝައުގުވެރިވާ ކަންތައްތަކަށް ޝައުގުވެރިވާ އަންހެނެއްގެ ގާތަށް އޭނާ ދާން ފަށައިފާނެއެވެ. މި ކަމަށް އޮތް ހައްލަކީ ދެމަފިރިން ޝައުގުވެރިވާ މައިގަނޑު ކަންތައްތަކުގެ އިތުރުން ހަޔާތުގެ ބާކީ އޮތް ބައިގައި ދެމަފިރިން އެކުގައި ޝައުގުވެރިކަމާއެކު ކުރެވޭނީ ކޮން ކަންތައްތަކެއްތޯ ދެނެގަތުމެވެ. ވަކިން ހާއްސަކޮށް ނަފުސު ތަރައްގީ ކުރެވޭނެ ގޮތްތަކަކީ ކޮބައިތޯ ބަލައި، އެ ކަންތައްތައްކުރަންވާނެއެވެ.
މި ބަލައިލީ ޒަވާޖީ ހަޔާތް ދެކެ ފިރިމީހާ ފޫހިވެދާނެ 11 ސަބަބަށެވެ. ނަމަވެސް މިއީ ފަސޭހައިން ހައްލު ވެސް ކޮށްލެވިދާނެ ކަންތައްތަކެކެވެ.
