ދިވެހިރާއްޖެއަށް ޑިޖިޓަލް ކަރަންސީ ތައާރަފް ކުރުމުގެ މަސައްކަތްތައް ފައްޓާވަފައިވާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ އެމްއެންޔޫގެ ދަސްވެނިވުމުގެ ހަފުލާގައި ވާހަކަފުޅު ދައްކަަވަމުންނެވެ. ރައީސް ވިދާޅުވީ ޔޫއެންގައި އިއުލާން ކުރެއްވި ފަދައިން އެމަނިކުފާނުގެ ލަނޑުދަނޑި އަކީ 2030 އަންނަންވާއިރަށް ރާއްޖޭގެ ޖީޑީޕީގެ 15 އިންސައްަތަ އަކީ ޑިޖިޓަލް އިގްތިސާދުގެ ހިއްސާ އަކަށް ހެއްދެވުން ކަމަށެވެ.
އަޅުގަނޑު މިހާރު އެމްއެމްއޭ ގެ ގަވަރުނަރަށް ދަންނަވާފައިވާނެ ޑިޖިޓަލް ކަރަންސީ ރާއްޖެއަށް ތައާރަފް ކުރުމަށް. ކްރިޕްޓޯ ކަރަންސީ ރާއްޖެއަށް ތައާރަފް ކުރުމަށް މަސައްކަތް ފައްޓަވަން. އެ މަސައްކަތާއި ބެހޭ އަމަލީ މަސައްކަތްތައް އެމްއެމްއޭގެ ގަވަރުނަރު މިހާރު ފައްޓަވައިފި.-ރައީސުލްޖުމްހޫރިއްޔާ ޑރ. މުޙައްމަދު މުއިއްޒު
ރައީސް ވިދާޅުވީ އިތުރު އެހެން ޚިދުމަތްތައް ފެޢްޓެވުމުގެ މަސައްކަތްތައް ވެސް ކުރައްވަމުން އަންނަ ކަމަށާއި އޭގެ ތެރޭގައި ކްރިޕްޓޯ ކަރަންސީ ފަދަ ޑިޖިޓަލް މާކެޓް ތައް ރާއްޖެއަށް ތައާރަފް ކުރެއްވުމުގެ މަސައްކަތްތައް ވެސް ފައްޓަވާފައިވާނެ ކަމަށެވެ.
އަޅުގަނޑުމެންގެ އަމާޒަކީ ކްރިޕްޓޯ ކަރަންސީ، ޑިޖިޓަލް ކަރަންސީ ރާއްޖެއަށް ގެނައުމުގައި އޭގެ ހުރިހާ ކަންތައްތަކަށް ފަރުވާ ލިބޭގޮތަށް ޚާއްސަ ގާނޫނު ހަދައިގެން އަދިވެސް ދެން ހުންނަ އިންޓަނޭޝަނަލް ބެސްޓް ޕްރެކްޓިސްތަކުގެ މިންގަނޑުތަކާއި އެއްގޮތަށް ރާއްޖޭގައި ޑިޖިޓަލް ކަރަންސީ ފުޅާ ކުރުމަށް . މިހިރަ ކަންކަމަކީ ކިޔަވައިގެން ނިކުންނަ ކުދިން، ޒުވާނުން، އެކި އެކި ފަންނުވެރިން ރާއްޖޭގެ އިގްތިސާދުގައި ހަރަކާތްތެރިވުމަށް ހުރި ފުރުސަތުތައް. ރައީސުލްޖުމްހޫރިއްޔާ ޑރ. މުޙައްމަދު މުއިއްޒު
ރައީސް ވިދާޅުވީ މިފަދަ ތަރައްގީގެ ފުރުސަތުތަކުގެ ސަބަބުން މުސްތަގްބަލުގައި ރާއްޖެ ވާނީ ޒަމާނީ ތަރައްގީއާއި އެއްހަމައެއްގައި ފައިހަމަވެފައިވާ އެހެނިހެން ގައުމް ތަކުން ނަމޫނާ ގައުމަކަށް ބަލާ ގައުމަކަށް ކަމަށެވެ.
