ރާއްޖޭގައި ސީ ޓު އެއާ ކާގޯގެ ހިދުމަތަށް ޑިމާންޑް ބޮޑުވާތީ، ދެކުނު އޭޝިޔާ ސަރަހައްދުގެ ގައުމުތަކުން ކަންބޮޑުވާން ފަށައިފި ކަމަށް މޯލްޑިވްސް ޕޯޓްސް ލިމިޓެޑް (އެމްޕީއެލް) ގެ އެމްޑީ މުހައްމަދު ވަޖީހް އިސްމާއީލް ވިދާޅުވެއްޖެ އެވެ.
ވަޖީހު މިގޮތަށް ވިދާޅުވީ އޭނާގެ ފޭސްބުކް އެކައުންޓުން ކުރި ޕޯސްޓެއްގަ އެވެ.
ވަޖީހު ވިދާޅުވީ ރައީސް ޑރ. މުޙައްމަދު މުޢިއްޒުގެ ވެރިކަމަށް، 1 އަހަރު ނުވަނީސް، ރާއްޖޭގެ އިގުތިސާދަށް ދިރުންގެނެސްދޭނެ އިތުރު ސިނާއަތެއް އުފެދިގެންދިޔަ ކަމަށެވެ.
ރާއްޖޭގެ ނާޒުކު އިގުތިސާދު ހަރުދަނާކޮށް، އިގުތިސާދަށް ދިރުން ގެނެސްދޭނެ އިތުރު ސިނާއަތްތައް އުފެއްދެވުމަކީ، ރައީސް އެމަނިކުފާނުގެ ވެރިކަން ފެށްޓެވުމާއި އެކު އެންމެ އިސްކަން ދެއްވި އެއް މަސައްކަތްޕުޅު ކަމަށް ވަޖީހު ވިދާޅުވި އެވެ.
އެގޮތުން އެމަނިކުފާނުގެ ވެރިކަމަށް 1 އަހަރު ނުވަނީސް، “ސީޓު އެއަރ ކާގޯ” ނަމުގައި ވަނީ އިގުތިސާދަށް ދިރުން ގެނެސްދޭނެ އިތުރު ދާއިރާ އަކުން މަސައްކަތް ފެށި، އެމަސައްކަތް ތަރައްގީ ވާން ފަށާފައިވާކަން ވަޖީހު ފާހަގަކުރެއްވި އެވެ.
ސީޓު އެއަރ ކާގޯގެ ހިދުމަތަކީ، ކަނޑު މަގުން އަންނަ މުދާ، ޓްރާންސިޓުކޮށް ވައިގެ މަގުން ދުނިޔޭގެ އެހެން ގައުމު ތަކަށް ފޮނުވުމެވެ. މިމަސައްކަތަކީ، ދުނިޔޭގެ ވަރަށް ގިނަ ގައުމު ތަކުން ކުރަމުން އަންނަ، އަދި މިމަސައްކަތުން އެގައުމު ތަކުގެ އިގުތިސާދަށް ބޮޑެތި މަންފާތަކެއް ގެނެސްދޭ މަސައްކަތެކެވެ.
ރާއްޖޭގައި މިމަސަތްކަތް ފެށުމުގެ ގޮތުން މޯލްޑިވުްސް ޕޯޓްސް ލިމިޓެޑާއި އެކު ފުރަތަމަ ފަހަރަށް އެއްބަސް ވުމެއްގައި ސޮއި ކޮށްފައިވަނީ މިއަހަރުގެ މާޗް މަހު ޓާކިޝް އެއަރ ލައިނާ އެކު އެވެ. އެއަށް ފަހު ފުރަތަމަ ކާގޯ ޝިޕުމެންޓު ފޮނުވާލާފައިވަނީ މިއަހަރުގެ މެއި މަހު އެވެ.
މިވަގުތު ރާއްޖެއިން އެންމެ ފަހުން ބޭރު ކުރި މުދަލަކީ، ބަންގްލަދޭޝްގައި އުފައްދާ އަންނައުނުގެ ބާވަތްތަކެވެ. ބަންގްލަދޭޝްގެ ގާމެންޓް އިންޑަސްޓުރީގެ ބޮޑު އިންސައްތައެއް ވައިގެ މަގުން ފޮނުވަނީ ޔޫރަޕުގެ ގައުމު ތަކަށެވެ. މިހާތަނަށް މި މުދަލުގެ ބޮޑު ބައެއް ދުނިޔޭގެ އެކި ގައުމު ތަކަށް ގޮސްފައި ވަނީ، އިންޑިޔާ އާއި، ސުރީލަންކާ މެދުވެރި ކޮށެވެ.
އެހެންކަމުން ރާއްޖޭގައި މިހިދުމަތް ފެށިފަހުން މިކަމަށް ލިބޭ ތަރުހީބު ބޮޑުވެ، މިވީ ކުޑަ ދުވަސްކޮޅު ތެރޭ، މި ހިދުމަތުގެ ޑިމާންޑު ވަރަށް ބޮޑަށް އިތުރު ވެފައިވާކަން ވަޖީހުގެ ޕޯސްޓުގައި ފާހަގަކުރައްވާފައި ވެއެވެ. އެގޮތުން ނިމިދިޔަ އޮކްޓޯބަރ މަހު އެކަނިވެސް، 96 ކޮންޓެއިނަރ (418 ޓަނުގެ މުދާ /34946 ދާގީނާ) ގެ މުދާ ވަނީ ވައިގެ މަގުން ރާއްޖެއިން ބޭރަށް ފޮނުވާފައި ކަމަށް ވަޖީހު މައުލޫމާތު ދެއްވި އެވެ. މިހާރު 7 އެއާލައިނަކުން ރާއްޖޭގެ ސީ-ޓު-އެއާ ކާގޯގެ ހިދުމަތް ހޯދާފައި ވެއެވެ.
“ރާއްޖޭގައި މިހިދުމަތް ފުޅާވެ، މިކަމުގެ ޑިމާންޑު ބޮޑުވަމުންދާތީ، މިވިޔަފާރީގައި އުޅޭ މިސަރަހައްދުގެ ބައެއް ގައުމުތައް ވަނީ ކަންބޮޑުވާން ފަށާފަ”
ރާއްޖޭގައި މިހިދުމަތް އިތުރަށް ފުޅާކޮށް، ކަސްޓަމަރުންގެ އިތުބާރު ހޯދުމަށް ކުރަމުންދާ މަސައްކަތް ތަކުގެ ތެރެއިން ދާދި ފަހުން އެމްޕީއެލްގެ ޓީމަކާއި މިމަސައްކަތުގައި އިސްކޮށް އުޅުއްވާ، އެއްފަރާތް ކަމަށްވާ، އިނަރ މޯލްޑިވުސްގެ ވެރިޔާ މުޙައްމަދު ފިރާޤާއި އެކު ބަންގްލަދޭޝްގެ ޗިޓަގޮންގ އަށް ޒިޔާރަތް ކޮށް ބަންގްލަދޭޝްގެ ގާމެންޓު ފެކްޓަރީ ތަކުގެ ވެރިންނާ އެކު މަޝްވަރާކޮށްފައި ކަމަށް ވަޖީހު މައުލޫމާތު ދެއްވި އެވެ.
މިމަޝްވަރާ ތަކުން އެނގިގެންދިޔަ މުހިންމު އެއްކަމަކީ، މިކަން ރަނގަޅަށް ކުރެވޭ ގޮތް ވެއްޖެނަމަ، މަހެއްގެ މައްޗަށް 400 އަށް ވުރެ ގިނަ ކޮންޓެއިނަރ ގެ މުދާ ކަނޑުމަގުން ރާއްޖެ ގެނެސް، ވައިގެ މަގުން ދުނިޔޭގެ އެކި ގައުމު ތަކަށް ފޮނުވުމުގެ ފުރުސަތު އޮތްކަމެވެ.
ވަޖީހު ވިދާޅުވީ މިކަމަށްޓަކައި، (ކޮންޓެއިނަރތައް ރާއްޖެ ގެނައުމަށްޓަކައި) ރާއްޖެ އަށް ދަތުރު ކުރާ ޝިޕިންގ ލައިން ތަކާއި އެކު ވާހަކަ ދައްކަމުންދާ ކަމަށެވެ. އަދި މިމަސައްކަތަށް ބޭނުންވާ، މެޝިނަރީ ތަކާއި އިކުއިޕްމެންޓުސްތައް ހަމަކޮށް، ކަސްޓަމަރުން ހިތްހަމަ ޖެހޭފަދަ ހިދުމަތްތަކެއް ފޯރުކޮށްދެވޭތޯ ވަރަށް ބޮޑަށް މަސައްކަތް ކުރަމުންދާކަމަށްވެސް އޭނާ ވިދާޅުވި އެވެ.
“އިރާދަކުރެއްވިއްޔާ މިއީ، ކައިރި މުސްތަގުބަލެއްގައި ރާއްޖޭގެ އިގުތިސާދަށް އިތުރަށް ދިރުން ގެނެސްދޭނޭ ސިނާއަތަކަށް ވެގެން ދާނެ. ސީޓު އެއަރ ކާގޯގެ ހިދުމަތް ފުޅާކޮށް، ކަސްޓަމަރުންގެ އިތުބާރު ލިބޭފަދަ ފުރިހަމަ ހިދުމަތްތަކެއް ފޯރުކޮށްދެމުން ގެންދިއުމަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވަނީ، މިމަސައްކަތުގައި ސީދާ ބައިވެރިވާ ސަރުކާރުގެ ދެ ކުންފުނި ކަމަށްވާ އެމްޕީއެލް އާއި، އެމްއޭސީއެލް ގުޅިގެން މަސައްކަތް ކުރުމަށް އިރުޝާދު ދެއްވާފަ”
