ނޫސްވެރިކަމުގެ އެވޯޑު ދީފައިވަނީ އުސޫލުތަކާ ހިލާފަށް ކަމަށްބުނެ، ފަނޑިޔާރުން ކުރާ ތުހުމަތުތައް ދޮގުކޮށް މޯލްޑިވްސް މީޑިއާ ކައުންސިލް (އެމްއެމްސީ) އިން ރައްދު ދީފިއެވެ.
އޯޑިއޯ، ވީޑިއޯ ދާއިރާއިން ތަހުގީގީ ނޫސްވެރިކަމުގެ އެވޯޑު އަދަދު ނޫހުން ގެނެސްދިން ”އަދަދު“ ޑޮކިއުމެންޓްރީއަށް ލިބުމާއެކު މައްސަލަތައް ހޫނުވެފައިވަނިކޮށް، ނޫސްވެރިކަމުގެ އިނާމުގެ ފަނޑިޔާރުންގެ ޕެނަލުން ވަނީ މިދިޔަ ހުކުރު ދުވަހު ބަޔާނެއް ނެރެފައެވެ.
ފަނޑިޔާރުންގެ ޕެނަލްގައި ހިމެނިވަޑައިގަންނަވަނީ މުހައްމަދު ސަލީމް، ޝައްމާން ޝާކިރު، ހަސަން އާމިރު، ފާތިމަތު އަޝްވާ ފަހީމާ، އަބްދުﷲ ނައީމް އިބްރާހިމް އަދި އަބްދުﷲ އަޒްމީން ސޮއިކުރައްވައި ނެރުނު ބަޔާނުގައި ވަނީ، އެމްއެމްސީގެ އޯޑިއޯ ވީޑިއޯ ކެޓަގަރީގެ ތަހުގީގީ ނޫސްވެރިކަމުގެ އިނާމު އުސޫލާ ހިލާފަށް ދިންކަން ބަޔާންކޮށް ތުހުމަތުތަކެއް ކޮށްފައެވެ.
ފަނޑިޔާރުންގެ އެ ބަޔާނާ ގުޅިގެން އެމްއެމްސީން މިރޭ ނެރުނު ނޫސްބަޔާނުގައި ބުނީ އިނާމަށް ހުށަހެޅުންތައް ހުށަހެޅުމުން އެކަމަށް ކަނޑައަޅާފައިވާ އިދާރީ މުވައްޒަފު އެޕްލިކޭޝަނާއެކު އެންމެހައި ތަކެތި ހަމައަށް ހުށަހަޅާފައިވޭތޯ ބެލުމަށްފަހު، އެ ތަކެތި ސިޓީ އުރައެއްގައި ބަންދުކުރުމަށްފަހު ފޮނުވަނީ އެޕްލިކޭޝަން ހުށަހަޅާފައިވާ ކެޓެގަރީއަކާ ގުޅޭ ފަނޑިޔާރުންގެ ޕެނެލަށް ކަމަށެވެ. އަދި އިނާމަށް ހުށަހަޅާފައިވާ އެއްވެސް ލިޔެކިޔުމެއް ކައުންސިލުގެ ރައީސް، ސެކްރެޓަރީ ޖެނެރަލް އަދި ކައުންސިލުގެ މެންބަރުންނަށް ވެސް ހިއްސާނުކުރާ ކަމަށް އެމްއެމްސީން ބުންޏެވެ.
”ނަމަވެސް ފަނޑިޔާރުން ނެރެފައިވާ ކަމަށް ބުނާ ލިޔުމުގައި ނޫސްވެރިކަމުގެ އިނާމުގެ އިންސާފުވެރިކަމާއި ކައުންސިލުގެ މިނިވަންކަމާ މެދު ހަގީގަތާ ހިލާފު ބޮޑެތި ތުހުމަތުތަކެއް ކުރައްވާފައިވެއެވެ..،“ އެމްއެމްސީގެ ބަޔާނުގައި ބުންޏެވެ.
އެމްއެމްސީގެ ބަޔާނުގައި ވަނީ ފަނޑިޔާރުންގެ ބަޔާނުގައި ހަގީގަތާ ހިލާފަށް ހުރި ވާހަކަތައް ފާހަގަކޮށް، އެކަން ސާފުކޮށްދީފައެވެ. އެގޮތުން އެމްއެމްސީން ބުނީ މިދިޔަ އަހަރުގެ ސެޕްޓެމްބަރު 28 ގައި ނެރުނު ނޫސްބަޔާނަކާ ހަވާލާދީ ބުނެފައިވަނީ ކަނޑައެޅިގެން ދޮގެއް ކަމަށާއި އެއީ ވަކި ނޫހަކުން އާންމުކުރި ވަކި ކޮންޓެންޓަކަށް އަމާޒުކޮށް ނެރުނު ބަޔާނެއް ނޫން ކަމަށެވެ. އަދި އެއީ ރިޔާސީ އިންތިހާބުގެ ތެރޭގައި މައުލޫމާތު ފެތުރުމުގައި ޖުމުލަކޮށް މީޑިއާތަކުން ސަމާލުވުމަށް އިރުޝާދުދީ ނެރުނު ބަޔާނެއް ކަމަށް އެ ކައުންސިލުން ބުންޏެވެ.
މިނިވަންކަމާއެކު މަސައްކަތްކުރުމުގެ ޖާގަ ފަނޑިޔާރުންނަށް ދިނުމުގެ ގޮތުން ނޫސްވެރިކަމުގެ އިނާމަށް ހުށަހަޅާ ހުށަހެޅުމަކީ ޝަރުތު ހަމަނުވާ ހުށަހެޅުމެއް ކަމަށް ކަނޑައެޅުމާއި ހުށަހެޅުމެއް ޑިސްކޮލިފައިކުރުމުގެ ބާރު ވެސް އުސޫލުގެ ދަށުން ލިބިގެންވަނީ ހަމައެކަނި ފަނޑިޔާރުންގެ ޕެނަލަށް ކަމަށާއި އެގޮތުން އިނާމުގެ އިޖުތިމާއީ ދާއިރާ އާއި ޝަރުއީ ދާއިރާއަށް ހުށަހަޅާފައިވާ ބައެއް ހުށަހެޅުންތައް ފަނޑިޔާރުންގެ ޕެނަލުން ޑިސްކޮލިފައިކޮށްފައިވާ ކަމަށް އެމްއެމްސީން ބުންޏެވެ.
އެމްއެމްސީން ބުނީ އިނާމު ދިނުމުގެ ހަފުލާގައި ވެސް ފަނޑިޔާރުންގެ ފަރާތުން އެއްވެސް ކަންބޮޑުވުމެއް އަދި ޝަކުވާއެއް ހުށަހަޅާފައި ނުވާ ކަމަށާއި އެ ހަފުލާގައި ވާހަކަދެއްކެވި ފަނޑިޔާރު މުހައްމަދު ސަލީމް ވެސް އެވޯޑުގެ މިނިވަންކަމާއި އިންސާފުވެރިކަމާއި ފުރިހަމަކަން ފާހަގަކުރައްވައި ތައުރީފުކުރައްވާފައިވާ ކަމަށް ވެސް އެމްއެމްސީގެ ބަޔާނުގައި ބުންޏެވެ.
”އަދަދު“ ޑޮކިއުމެންޓަރީއާ ގުޅޭގޮތުން ފަނޑިޔާރުން އުފެއްދި ސުވާލުތަކަށް ކައުންސިލުން ޒިންމާދާރުކަމާއެކު ޖަވާބުދާރީނުވާ ކަމަށް ފަނޑިޔާރުން ބުނެފައިވީ ނަމަވެސް، އެ ހުށަހެޅުމާ މެދު ފަނޑިޔާރުން ސުވާލު އުފައްދައި އެއްވެސް ކަމެއް ހުށަހަޅާފައި ނުވާ ކަމަށެވެ. އަދި އެކަމާ މަޝްވަރާނުކޮށް ވެސް، އެކަން ނިންމުމުގެ ބާރު ހަމައެކަނި އޮންނަނީ ފަނޑިޔާރުންނަށް ކަމަށް ވެސް އެމްއެމްސީން ބުންޏެވެ.
އޭގެ އިތުރުން އެ ދާއިރާގެ ރުބްރިކުގައި ތަހުގީގީ ނަޒަރަކުން އެ އުފެއްދުމަށް އިންސާފުކުރަން ހަނިކޮށްފައިވާ ކަމަށް ފަނޑިޔާރުން ބުނެފައިވީ ނަމަވެސް، އެ ކަންބޮޑުވުން ވެސް ކައުންސިލާ ހިއްސާކޮށްފައި ނުވާ ކަމަށާއި ފާއިތުވި އަހަރު ފަނޑިޔާރުން ދީފައިވާ ލަފަޔާ އެއްގޮތަށް މާކިން ރުބްރިކްސް އިސްލާހުކޮށް ފުރިހަމަކޮށްފައިވާކަން ފަނޑިޔާރުންގެ ރިޕޯޓުގައި ވެސް ފާހަގަކޮށްފައިވާ ކަމަށް އެމްއެމްސީގެ ބަޔާނުގައި ބުންޏެވެ.
އެމްއެމްސީން ބުނީ ފަނޑިޔާރުންގެ ޕެނަލުން ފާހަގަކޮށްފައިވާ ގޮތަށް އޮޑިޓް ފާމެއް ހަމަޖެއްސިފައި ނުވަނީ އެކަމަށް އެކަށީގެންވާ ބަޖެޓެއް ނެތުމުން ކަމަށާއި އެކަމަށް ބަޖެޓު ހޯދުމަށް މަސައްކަތްކޮށްފައިވާނެ ކަމަށެވެ. އަދި ”އަދަދު“ ޑޮކިއުމެންޓަރީއަށް އެވޯޑު ދީފައިވަނީ ފަނޑިޔާރުންނަށް ނޭނގި ކަމަށް ދޭހަވާ ގޮތަށް ފަނޑިޔާރުން ފާހަގަކުރި ނަމަވެސް، އެ އެވޯޑު ދީފައިވަނީ ޕެނަލްގައި ހިމެނޭ ހުރިހާ ފަނޑިޔާރުން ސޮއިކޮށް ކައުންސިލަށް ހުށަހެޅި މާކްސް ޝީޓްތަކުން އެވޯޑު ލިބޭ މިންވަރަށް މާކްސް ލިބިފައިވާތީ ކަމަށް އެމްއެމްސީން ބުންޏެވެ.
އެ ކައުންސިލުގެ ބަޔާނުގައި އިތުރަށް ބުނީ އެއްވެސް ދާއިރާއަކުން އެވޯޑު ދިނުމުގައި އިނާމު ދިނުމުގެ އުސޫލާ ހިލާފަށް އެއްވެސް ކަމެއް ކައުންސިލުން ކޮށްފައިނުވާނެ ކަމުގެ ޔަގީންކަން އަރުވާ ކަމަށެވެ.
