ޒަމާނުއްސުރެ މީހުން ދެކެމުން އައިސްފައިވާ ގޮތުގައި ހިތުގެ ބަލިތައް ޖެހެނީ ނުވަތަ ޖެހުމުގެ ފުރުސަތު އެންމެ ބޮޑީ ފިރިހެން ވެރިންނަށެވެ. ނަމަވެސް މިއީ ހަގީގަތެއް ނޫނެވެ. މިއީ ދުނިޔޭގެ ނިސްބަތުން ބަލާއިރު އަންހެނުން މަރުވުމަށް ދިމާވާ އެންމެ މައިގަނޑު އެއް ސަބަބެވެ.
ގިނަ ފަހަރަށް އަންހެން ވެރިންނަށް ހިޔުގެ ބަލިތައް މެދުވެރިވަނީ އެއްވެސް ކަހަލަ ”އިންޒާރެއް“ ވެސް ނެތިއެވެ. ހިތުގެ ބަލިތަކުގެ ހާއްސަ ޑޮކްޓަރުން ބުނާ ގޮތުގައި ހިތުގެ ބަލިތަކުން ރައްކާތެރި ވާން ބޭނުންވާނަމަ އުމުރުން 20 އަހަރުން ފެށިގެން ޓެސްޓުތައް ހަދައި ބެލުމަކީ ވަރަށް މުހިންމު ކަމެކެވެ. އެހެންކަމުން މިފަހަރު މި ހިމަނާލަނީ ހިތުގެ ބަލިތަކުން ދުރުވާން ބޭނުންނަމަ ކޮންމެ އަންހެނަކުވެސް ޒުވާން އުމުރުގައި ހަދަން ޖެހޭ ބައެއް ޓެސްޓުތަކެވެ.
ލޭގެ ޕްރެޝަރު ބެލުން
ލޭގެ ޕްރެޝަރު މަތިވުން ނުވަތަ ހައިޕަޓެންޝަން އަކީ ހިތުގެ ބަލިތައް ޖެހުމަށް މެދުވެރިވާ އެންމެ މައިގަނޑު އެއް ސަބަބެވެ. ލޭގެ ޕްރެޝަރު ކޮންޓްރޯލު ނުކުރެވޭނަމަ އޭގެ ސަބަބުން ދިމާވާ ބައެއް ސިއްހީ މައްސަލަތަކުގެ ތެރޭގައި ހިތް ފެއިލު ވުމާއި، ކިޑްނީ ހަލާކުވުމާއި، ސްޓްރޯކު ޖެހުން ފަދަ ކަންތައް ހިމެނެއެވެ. އެހެންކަމުން ހިތުގެ ބަލިތަކުން ރައްކާތެރިވާން ބޭނުންނަމަ ލޭގެ ޕްރެޝަރު ބަލައި މޮނިޓާ ކުރުމަކީ ވަރަށް މުހިންމު ކެމެކެވެ.
ލޭގައި ކޮލެސްޓްރޮލް ހުންނަ ވަރު ބެލުން
ލޭގައި ކޮލެސްޓްރޮލް ހުންނަ މިންވަރު ބެލުމަކީވެސް ހިތުގެ ބަލިތަކުން މީހާ ރައްކާތެރިކޮށްދޭ ކަމެކެވެ. އެލްޑީއެލް ކޮލެސްޓްރޮލް އަކީ އަޅުގަނޑުމެންގެ ހިތުގެ ނާރުތަކުގައި ޕްލޭގު އުފައްދާ އެއްޗެއް ކަމުން ހަށިގަނޑުގައި މި ގިނަ ވާނަމަ، އޭގެ ސަބަބުން ހިތުގެ ނާރުތައް ބެދި ލޭ ދައުރުވާ ގޮތަށް ބުރޫ އަރައެވެ. އަދި އޭގެ ސަބަބުން ހާޓް އެޓޭކާއި ސްޓްރޯކު ޖެހުމުގެ ފުރުސަތު ބޮޑުވެއެވެ. އެހެންކަމުން ހިތުގެ ބަލިތަކުން ރައްކާތެރި ވާން ބޭނުންވާނަމަ ލޭގައި ކޮލެސްޓްރޮލް ހުންނަ މިންވަރު ބަލަން ލިޕިޑް ޕްރޮފައިލު ހެދުމަކީ ވަރަށް މުހިންމު ކަމެކެވެ.
ލޭގައި ގްލޫކޯޒު ހުންނަ މިންވަރު ބެލުން
ލޭގައި ގްލޫކޯޒު ހުންނަ މިންވަރު ބެލުމަކީވެސް ހިތުގެ ބަލިތަކުން ރައްކާތެރި ވުމަށް އެހީވެދޭ ކަމެކެވެ. ލޭގައި ހަކުރު ހުންނަ ވަރު އިތުރު ވުމުގެ ސަބަބުން ލޭނާރުތައް ހަލާކުވެ، ހިތުގައި ލޭދައުރުވާ ގޮތަށް ބުރޫ އަރައެވެ. އަދި އޭގެ ސަބަބުން ހިތުގެ ބަލިތައް ޖެހުމަށް މަގުފަހިވެއެވެ. އެހެންކަމުން ހިތުގެ ބަލިތަކުން ރައްކާތެރި ވުމަށްޓަކައި، އެޗްބީ1އޭސީ ޓެސްޓު ހަދައި ލޭގައި ހަކުރު ހުންނަ މިންވަރު ބެލުމަކީ ވަރަށް މުހިންމު ކަމެކެވެ. އަދި ލޭގައި ހަކުރު މަތި ނަމަ، ކެއިން ބުއިމަށް ބަދަލު ގެނެސް ކަސްރަތު ކުރުމަކީވެސް މުހިންމު ކަމެކެވެ.
މަސްދަރު: އިންޑިއަން އެކްސްޕްރެސް
