ބުނެފައި އޮތް ގޮތަކަށް، ވަޢުދުތައް ފުއްދުމަށް އިސްކަންދެއްވާ ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް މުޢިއްޒު އެފަދައިން ވިދާޅުވީ، އެމަނިކުފާނުގެ ރިޔާސީ ވައުދުފުޅެއް ކަމުގައިވާ ގެދޮރުވެރިކަމަށް ޚާއްސަކޮށް ފަސް އިންސައްތައި ދޫކުރާ ލޯނު ސްކީމު ކަމުގައިވާ ހިޔާވަހި ފައިނޭންސް ސްކީމް އިފްތިތާޙްކުރުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ. އެގޮތުން އިސްލާމީ މަރުކަޒުގެ ޙޯލުގައި އޮތް އެ ރަސްމިއްޔާތުގައި ރައީސް ވިދާޅުވީ ވައުދުތައް ފުއްދުމަށް އެމަނިކުފާނާއެކު، މުޅި ސަރުކާރުގެ އެހެނިހެން ވުޒާރާގެ އެއްބާރުލުން ވެސް އެކަމުގައި ފުރިހަމައަށް ލިބޭ ކަމަށެވެ.
އަޅުގަނޑު ވަރަށް އިސްކަންދެން، ވައުދުވެފައި އޮންނަ ގޮތަށް، ކުރާނެކަމެށް ބުނިގޮތަކަށް، އެކަމެށް ކުރެވޭތޯ. އަޅުގަންޑުމެންގެ މުޅި ޓީމް، ސަރުކާރުގެ ހުރިހާ ބޭފުޅުން މަސަތްކަތް ކުރަމުން ދަނީ އެގޮތަށް – ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު
އެގޮތުން މިއަދު އިފްތިތާޙްކުރި ކުރި ހިޔާވަހި ސްކީމާ ގުޅުވައި ރައީސް ވިދާޅުވީ ރާއްޖެއަށް ކުރިމަތިވެފައިއޮތް ގެދޮރުވެރިކަމުގެ މައްސަލަ މި ސަރުކާރުގެ ފަސް އަހަރުތެރޭގައި ހައްކޮށްދޭނެ ކަމަށާއި، އެގޮތުން އެ ސްކީމުގެ ދަށުން، ގެދޮރުވެރިކަމަށް ދިމާވެފައި އޮތް މައްސަލަ، ދާއިމަށް ޙައްލުވާނެ ކަމުގައި ދެކެވަޑައިގަންނަވާ ކަމުގައެވެ.
އިރާދުކުރެއްވީތީ، މިކަން ވެގެންދާނީ، ރާއްޖޭގައި މިއޮތް ގެދޮރުވެރިކަމުގެ މައްސަލައަށް ދާއިމީ ހައްލު ގެނައުމުގެ އެންމެ ފުރިހަމަ ނަތީޖާ ނުކުންނާނެ ކަމަކަށް. އަޅުގަނޑު ދެކެންބޭނުން ވަނީ، މި ދައުރު ނިމިގެންދާއިރުގައި، 2028 ހަމަޔަށް ދާއިރުގައި، ރާއްޖޭގަ، އަޅުގަނޑު ވައުދުވީ ގޮތަށް، ރާއްޖޭގަ ގެދޮރުވެރިކަމަށް، ހައުސިންނަށް، އެކްސެސް ނުލިބޭ އެކަކުވެސް ނުބަހައްޓަން. އެތަން ދެކެން ބޭނުންވަނީ، – ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު
މިއަދުު އިފްތިތާހްކުރި ހިޔާވަހި ފައިނޭންސިންގެ ދަށުން ޖުމްލަ ތިން ސްކީމެއް ކަނޑައަޅާފައިވާއިރު، އޭގެ ތެރެއިން ފުރަތަމަ ސްކީމު ޚާއްސަކޮށްފައިވަނީ އަތޮޅު ތެރޭގެ ރަށްތަކަަށެވެ. އެ ސްކީމުގެ ދަށުން އެއް މިލިއަން ރުފިޔާއާ ހަމައަށް ހައުސިން ޑެވެލޮޕްމަންޓް ފައިނޭންސް ކޯޕަރޭޝަން (އެޗްޑީއެފްސީ) މެދުވެރިކޮށް ލޯނު ލިބޭނެ އިރު، މި ލޯނުގެ ދަށުން އެއްވެސް އިކުއިޓީއެއް ދައްކަން ނުޖެހޭނެއެވެ.
ދެވަނަ ސްކީމު ކަނޑައަޅާފައިވަނީ އާބަން ސެންޓަރުގެ ގޮތުގައި ސަރުކާރުން ކަނޑައަޅާ ރަށްތަކަށް ވާއިރު، އެ ސްކީމުގެ ދަށުން ތިން މިލިއަން ރުފިޔާ އާ ހަމައަށް ލޯނު ލިބޭނެ އިރު، ތިން ވަނަ ސްކީމުގެ ދަށުން މާލެ އަށް ހަ މިލިއަން ރުފިޔާއާ ހަމައަށް ލޯނު ދޫކުރާނެއެވެ. އެ ދެ ސްކީމުގެ ލޯނުތައް ދޫކުރާނީ ބީއެމްއެލް އަދި އިސްލާމިކް ބޭންކުންނެވެ.
