އަންނަ އަހަރުގެ ބަޖެޓު ސަޕޯޓަށް ބޭރުގެ ކޮމާޝަލް ބޭންކުތަކުން 443 މިލިއަން ޑޮލަރު (6.7 ބިލިއަން ރުފިޔާ) ހޯދުމަށް ސަރުކާރުން ވަނީ ނިންމައިފި އެވެ.
ފިނޭންސް މިނިސްޓްރީން ހާމަކުރި މައުލޫމާތުގައިވާ ގޮތުން، އަންނަ އަހަރުގެ ބަޖެޓަށް ބޭނުންވާ 9.4 ބިލިއަން ރުފިޔާގެ ތެރެއިން 70 ޕަސަންޓު ހޯދުމަށް ރޭވިފައިވަނީ ބޭރުގެ ލޯނުތަކުންނެވެ. މީގެ ތެރޭގައި ބަޖެޓު ސަޕޯޓުގެ އިތުރުން އެހެނިހެން މަޝްރޫއުތަކަށް ބޭނުންވާ 5.1 ބިލިއަން ރުފިޔާ ވެސް ހިމެނެ އެވެ.
ނަމަވެސް މި އަހަރުގެ ތަޖުރިބާއަށް ބަލާއިރު، ބޭރުން ފައިނޭންސް ހޯދުމަށް ދަތިތަކެއް ހުރި ކަމަށް ފާހަގަކުރެވެ އެވެ. މި އަހަރު ބޭރުން ހޯދަން ކަނޑައެޅި 7.9 ބިލިއަން ރުފިޔާގެ ތެރެއިން 90 ޕަސަންޓު ވެސް އަދި ހޯދިފައެއް ނުވެ އެވެ.
މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ބުނީ ބަޖެޓު ފައިނޭންސިން ހޯދުމަށް ހުރި ދަތިތަކުގެ ސަބަބުން ޓީބިލް ގަންނަ ބޭންކުތަކަށް ސެކިއުރިޓީ ވިއްކޭ މިންވަރު ދަށްވަމުންދާ ކަމަށެވެ.
