ވެރިކަން ކުރާ ޕީޕަލްސް ނޭޝަނަލް ކޮންގްރެސް (ޕީއެންސީ) ގެ އެތެރޭގެ އިންްތިހާބުގެ ވޯޓްލުން ފަށައިފިއެވެ.
މި އިންތިހާބު ކުރިޔަށް ދާނީ މިއަދު ހެނދުނު 10:00 އިން މެންދުރު 14:00 އަށެވެ.
މިއަދުގެ އިންތިހާބުގައި 1،984 މަޤާމަށް މީހުން އިންތިހާބުކުރުން އޮންނާނެއެވެ. މި މަގާމުތަކަށް 648 މީހަކު ކުރިމަތިލާފައިވާކަމަށް ޕީއެންސީން ބުނެއެވެ. މީގެ އިތުރުން 1300 މަގާމަށް އެންމެ ކެންޑިޑޭޓަކު ކުރިމަތިލާފައިވާތީ، އެ 1،300 މަޤާމަށް އިންތިހާބަކާ ނުލައި މީހުން ހޮވިފައިވާ ކަމަށްވެސް ޕީއެންސީން ބުނެއެވެ.
33500 މީހުންނަށް ވޯޓްލުމުގެ ހައްގު ލިބިފައިވާ މި އިންތިހާބުގައި މުޅި ރާއްޖޭގައި 144 ވޯޓް ފޮށި ބަހައްޓާފައިވާކަަމަށް ޕީއެބްސީ ބުނެއެވެ. މީގެތެރެއިން 56 ފޮށި ބަހަައްޓާފައިވަނީ ވެރިރަަށް މާލޭގައެވެ.
ރަށްރަށުގައި ވޯޓު ފޮށި ބެހެއްޓުމަށް ހަމަޖެހިފައިވަނީ އެ ރަށެއްގެ ސްކޫލް އިމާރާތުގައިކަމަށް ޕީއެންސީން ބުނެއެވެ. މާލޭ ސަރަހައްދުގައި ފޮށިތައް ބަހައްޓާފައިވަނީ ދަރުބާރުގެއާއި ރެހެންދި ސްކޫލާއި، މުހިއްޔުއްދީން ސްކޫލުގައެވެ.
އިންތިހާބުކުރާ މަޤާމުތަކުގެ ތެރޭގައި ދާއިރާތަކުގެ ރައީސުންނާއި ނައިބުރައީސުންގެ އިތުރުން ރަށްރަށުގެ ޒުވާނުންގެ ހަރަކާތުގެ ރައީސުންނާއި ރަށްރަށުގެ އަންހެނުންގެ ހަރަކާތުގެ ރައީސުންނާއި ސްޓިއަރިން ކޮމިޓީތަކުގެ މެންބަރުން ހިމެނޭކަމަށް ޕީއެންސީވަނީ ބުނެފައެވެ.
