ރާއްޖޭގެ އާބާދީގެ ނިސްބަތުން ބޮޑު ގދ. ތިނަދޫއަށް ސިޓީއެއްގެ ދަރަޖަ ދިނުމަށް ގާނޫނަށް ގެނަން ޖެހޭ ބަދަލު ގެނެސް ރައްޔިތުންގެ ހުވަފެން ހަގީގަތަކަށް ހަދައިދޭނަކަމަށް އޭރުގެ އިދިކޮޅުގެ ރިޔާސީ ކެންޑިޑޭޓު ޑރ. މުހައްމަދު މުއިއްޒުގެ ވައުދާއި އެއްގޮތަށް ތިނަދުއަށް ސިޓީއެއްގެ ދަރަޖަ ދެއްވާ ބިލް ތަސްދީގް ކުރައްވާފައި ވަނީ ވެސް އެމަނިކުފާނެވެ.
އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނަށް އިސްލާހު ގެނެސް، ގދ. ތިނަދޫއަށް ސިޓީއެއްގެ ދަރަޖަ ގެނައުމުގެ ބިލު ރައީސް ޑރ. މުހައްމަދު މުއިއްޒު ތަސްދީގު ކުރައްވާފައި ވަނީ މިދިޔަ އަހަރުގެ މާރޗް މަހުގަ އެވެ.
މިއީ ރައްޔިތުންގެ މަޖިލިސްގެ މާޗު، 18 ގައި ބޭއްވި ޖަލްސާގައި ފާސްކުރި ބިލެކެވެ. ބިލުގައި އިސްލާހު ގެނެސްފައި ވަނީ ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުގެ 51 ވަނަ މާއްދާގެ (ށ)، (ނ)، (ރ)، (ބ) އަދި (ކ) އަށެވެ.
ތިނަދޫ ސިޓީއެއްގެ ދަރަޖަ ދެއްވާނެ ކަމަށް އޭރުގެ ރިޔާސީ އިންތިހާބުގެ ޕީޕީއެމް/ޕީއެންސީގެ ކެންޑިޑޭޓު ޑރ. މުުއިއްޒު ވައުދުވެ ވަޑައިގެންފައި ވަނީ ގދ، ގއ އަތޮޅުގެ ކެމްޕެއިން ދަތުރުތަކުގެ ތެރެއިން ތިނަދޫއަށް ވަޑައިގެން އެ ރަށުގައި ބޭއްވި ބޮޑު ޖަލްސާގަ އެވެ.
ތިނަދޫއަށް ސިޓީއެއްގެ ދަރަޖަ ދިނުމަށް އެދި ތިނަދޫގެ ކައުންސިލުން ލޯކަލް ގަވަމަންޓް އޮތޯރިޓީ (އެލްޖީއޭ) އަށް ސިޓީއެއް ވެސް ފޮނުވާފައި ވެއެވެ. ލާމަރުކަޒީ ގާނޫނު ބުނާ ގޮތުން ސިޓީއެއްގެ ދަރަޖަ ލިބެނީ ރަށެއްގެ ރަޖިސްޓްރީގައި ވާ އެ ރަށުގެ މަދުވެގެން 10،000 އިން މައްޗަށް އެރުމުންނެވެ. ސިޓީ ފޮނުވުމުން އޭރު އެލްޖީއޭގެ ސީއީއޯއަކަށް ހުންނެވި އަފްޝަން ލަތީފް ކައުންސިލާއި ހަވާލާ ދެއްވައި ވިދާޅުވީ ރަޖިސްޓްރޭޝަން އާބާދީ މަދު ނަމަވެސް ރަށުން ހިދުމަތް ހޯދާ މީހުންގެ އާބާދީ 12،000 އަށް އަރާކަމަށެވެ.
ރިޔާސީ އިންތިހާބުގެ ކެމްޕެއިނަށް ތިނަދޫއަށް ވަޑައިގެން ރައްޔިތުންނާއި ބައްދަލު ކުރައްވައި ރައީސް ޑރ. މުއިއްޒު އޭރު ވެސް ވިދާޅުވީ ރަށް އޮތީ ސިޓީއެއްގެ ދަރަޖަ ދިނުމުގެ ހުރިހާ ވަސީލަތެއް ފުރިހަމަވެފައި ކަމަށެވެ.
“ދަންނަވާލަން ބޭނުން ވަނީ އިންފްރާސްޓްރަކްޗާގެ ގޮތުން ބެލިޔަސް، ހިދުމަތްތައް ދިނުމުގެ ވަސީލަތްތަކަށް ބެލިޔަސް ތިނަދޫގައި ސިޓީއަކަށް ބޭނުންވާ ހުރިހާކަމެއް މިވަނީ ހުރިހާކަމެއް ގާއިމު ކުރެވިފައި ރައީސް ޔާމީންގެ ވެރިކަމުގައި… އެހެންވީމަ ގާނޫނުގައި މި އޮންނަ 10،000 ގެ އާބާދީ. 10،000 މީހުން ކޮންމެހެން ހަމަވުމަކީ އެތަނުގައި ސިޓީއަކަށް ބޭނުންވާ ވަސީލަތްތަކާއި އިންފްރާސްޓްރަކްޗާ ގާއިމުވެފައި ހުރެޖެއްޔާ ލާޒިމާކަށް ނުއެއް ޖެހޭނެކަމަށް އަޅުގަނޑު ގަބޫލު ކުރަން.“
ރައީސް ޑރ. މުއިއްޒު އޭރު ވެސް ވިދާޅުވީ ބޭނުން ވަނީ ކުރިޔަށް ދިއުމުގެ ރަނގަޅު ވިސްނުމާއި ކެރުން ކަމަށެވެ. އިތުބާރު ކުރުމަށް އެދިވަޑައިގެން ރައީސް ޑރ. މުއިއްޒު ވިދާޅުވީ ތިނަދޫއަށް ސިޓީއެއްގެ ދަރަޖަ ދިނުމުގައި ހުރިހާ މަސައްކަތެއް ކުރައްވައި ގާނޫނަށް ގެންނަން ޖެހޭ ބަދަލުތައް ގެންނާނެ ކަމަށެވެ.
“އަޅުގަނޑު ގަބޫލު ކުރަނީ އަށް ހާސް މީހުން ހަމަވާނަމަ ސިޓީއެއްގެ ދަރަޖަ ދޭންވާނެ ކަމަށް.“
ރައްޔިތުން އެދޭ ހެޔޮ ބަދަލަށް ތިނަދޫ ސިޓީގެ ހަގީގީ ފަހުލަވާނަކީ ރައީސް ޑރ. މުއިއްޒު ކަމާއި މެދު ސައްކު ހިނގާނެ ތަނެއް ނެތެވެ.
