މިދިޔަ މަހުގެ 28 ވަނަ ދުވަހު އޮޑިޓް އޮފީހުން ނެރުނު ހދ. އަތޮޅު ކައުންސިލްގެ އޮޑިޓް ރިޕޯޓްގައި ބުނީ އެ ކައުންސިލަށް މިދިޔަ އަހަރު ލިބުނު އާމްދަނީއާއި ބްލޮކް ގްރާންޓުންގެ ތެރެއިން ބޮޑު އަދަދެއް ހޭދަކުރީ އެ ދަތުރަށް ކަމަށެވެ.

އެގޮތުން މިދިޔަ އަހަރު ކުރި އެ ދަތުރުގައި 20 މީހުން ބައިވެރިވެ އެ އެންމެންގެ ހަރަދުތަކަށް ޖުމްލަ 952،885 ރުފިޔާ ހަރަދުކުރި ކަމަށް ވެސް ބުނެފައިވެ އެވެ.

އެހެން ނަމަވެސް އެ ދަތުރުން ހޯދި ތަޖުރިބާއާއި ތަމްރީންގެ ދަށުން އަހަރެއްވި އިރުވެސް ހދ.އަތޮޅުގައި އެއްވެސް މަޝްރޫއެއް ފަށާފައިނުވާ ކަމަށް ވެސް އޮޑިޓް ރިޕޯޓްގައި ފާހަގަކޮށްފައިވެ އެވެ.

މި ދަތުރަށް ހަރަދުކޮށްފައިވަނީ ފިނޭންސް މިނިސްޓްރީގެ ސާކިއުލާ ”ބަޖެޓު ތަންފީޒްކުރުމާ ގުޅޭ އިރުޝާދު“ އާ ޚިލާފަށްކަމަށްވާތީ، ދައުލަތުގެ މާލިއްޔަތުގެ ގަވާއިދުގައި ބަޔާންކުރާ ހުއްދަނޫން އަމަލެއް ކޮށްފައިވާ ކަމަށް ބެލެވޭތީ، މި ހަރަދުތަކަށް ޒިންމާވާ ފަރާތްތަކާ މެދު ފިޔަވަޅު އެޅުމަށް އޮޑިޓާ ޖެނެރަލް ވަނީ އަންގަވާފައެވެ.

އަދި މިދިޔަ އަހަރުގެ ބަޖެޓުގައި އެ ކައުންސިލަށް ހަމަޖެއްސި އަދަދަށް ވުރެ ގިނައިން ހަރަދު ކޮށްފައިވާކަން ވެސް ވަނީ ހާމަވެފައެވެ. އެގޮތުން، ދަތުރުތައް ކުރުމަށް މިދިޔަ އަހަރުގެ ބަޖެޓުގައި އެ ކައުންސިލަށް 651،572 ރުފިޔާ ހިމަނާފައި ވީނަމަވެސް، ބެންކޮކް ދަތުރުގެ ސަބަބުން ބަޖެޓް ކުރިވަރަށް ވުރެ އިތުރަށް 300،000 އަށް ވުރެ ގިނަ ރުފިޔާ ހަރަދުވެފައިވެއެވެ.

މީގެއިތުރުން، މާލިއްޔަތު ގަވާއިދާ ޚިލާފަށް ދޮޅު ލައްކައަށްއަށް ވުރެ ގިނަ ރުފިޔާގެ ސާމާނު އިއުލާނު ކުރުމަކާ ނުލައި ކައުންސިލުގެ ބަޖެޓުން ގަތް މައްސަލައެއް ވެސް ވަނީ ފެންމަތި ވެފައެވެ. އެ ގަވާއިދުގައިވާ ގޮތުން ކީދުމަތެއް ހޯދުމާއި، މަސައްކަތް ކުރުވުން ނުވަތަ ގަންނަ ތަކެތީގެ އަގު 35،000 އަށް ވުރެ ބޮޑު ނަމަ އާންމުކޮށް އިއުލާން ކުރަން ޖެހެއެވެ. ނަމަވެސް އެ ކައުންސިލުން ވަނީ ގަވާއިދާ ޚިލާފަށް 156،150 ރުފިޔާ ހަރަދުކޮށްފައެވެ.