ޙަޔާތުގެ ކޮންމެ ދުވަހަކީ އެއްގޮތަކަށް ކަންކަން މެދުވެރިވާނެ ދުވަހެއް ނޫނެވެ. ބައެއް ދުވަސްތަކަކީ އުފާވެރި ދުވަސްތަކެވެ. އަނެއްބައި ދުވަސްތަކަކީ ހިތާމަވެރި ދުވަސްތަކެވެ. މި ދެ ޙާލަތުވެސް މިންވަރުކުރައްވަވަނީ ﷲ ތަޢާލާއެވެ. ދެ ޙާލަތުވެސް މިންވަރު ކުރައްވަވަނީ ހަމަ އެންމެ ކަމަކަށެވެ. އެއީ މީސްތަކުން އިމްތިޙާން ކުރެއްވެވުމަށެވެ.
އެހެންކަމަށްވާއިރު އުފަލުގައި ހުރެވޭ ދުވަސް އެއީ ތިމާގެމަތިން ﷲ ތަޢާލާ ހަނދުމަފުޅު ކުރައްވަވާ ދުވަސްކަމަށް ޤަބޫލުކޮށްފައި ދަތިކަމެއް ކުރިމަތިވީމާ ތިމާގެ މަތިން ﷲ ތަޢާލާ ހަނދުމަފުޅު ނުކުރައްވަވަނީ ކަމަށް ޤަބޫލުކުރަން ހެޔޮވާނީވެސް ކިހިނަކުން ހެއްޔެވެ؟
މީސްތަކުންނޭވެ! އެދޭ ކަންކަން ފުއްދަވައި ދެއްވެވުން ލަސްކުރައްވަވަނީވެސް އަދި ދަތި އުނދަގޫ ކަންކަން ކުރިމަތިކުރައްވަވަނީވެސް ހަމަ އަހަރެމެންގެ ފައިދާއަށެވެ. އެއީ ﷲ ތަޢާލާގެ ރުހިވޮޑިގަތުން ހޯދަން އިތުރަށް މަސައްކަތްކުރުމުގެ ވިސްނުން އެމހަކު ލިބިގަނެތޯ ބެއްލެވުމަށެވެ. ވީމާ ދަތިޙާލުގައިވެސް އުފާވެރި ޙާލުގައިވެސް ތަޤްވާވެރިކަން އިތުރުކުރަން މަސައްކަތްކުރާށެވެ. ހުރިހާ ކަންބޮޑުވުންތައް ފިލުއްވަވައި ދެއްވަވާނެތެވެ. އިން ޝާ ﷲ
ވިސްނާށެވެ! އެމީހަކު ބޭނުންވެގެން އުޅޭ ކަމެއް ނުފުދި ލަސްވާނަމަ، ނުވަތަ ހިތްދަތިކަމާއި ދަތިޙާލުގައި އުޅެންޖެހިއްޖެނަމަ ތިމާގެމަތިން ﷲ ތަޢާލާ ހަނދުމަނެތިކޮށްލައްވަވައިފިކަމަށް ޤަބޫލުކުރުމަކީ ކުރެވޭ ވަރަށް ނުބައި ކަމެކެވެ. ޙަޤީޤަތަކީ އެގޮތަށް ޤަބޫލުކުރެވޭ މީހުންނަކީ ﷲ ތަޢާލާގެ މަތިން ހަނދުމަނެތިކޮށްލައިގެން ތިބި ބައަކު ކަމެވެ.
– އިސްލާމީ ތިލަފަތުގެ ދަރުސަކުން
