ވަޒީފާ އަދާކުރާ އަންހެންކުދިން ގިނަވަނީ ކޮންމެހެން އެކުދިން ތަންތަނުގައި މަސައްކަތްކުރާހިތްވާވަރުން ކަމަށް ބަލައިގެންނުވާނެއެވެ. ޢާއިލާގެ ޚަރަދުތަކަށް ބޭނުންވާ ފައިށާ ނެތުމުން ވަޒީފާ އަދާކުރާ އަންހެނުންނާއި އަދި މުސްކުޅި މައިންބަފައިންނަށް އެހީތެރިވެދޭން ޖެހިގެން ވަޒީފާ އަދާކުރާ އަންހެނުންވެސް މަދެއް ނުވާނެއެވެ.
އަހުރެން ބުނާނީ ވަޒިފާއަދާކުރާ ހިތުން އެކަން ކުރިޔަސް އަދި ކުރިން މިބުނި ފަދަ ސަބަބެއް އޮވެގެން އެކަންކުރިޔަސް އެކުދިންނަށް ހެޔޮކޮށް ހިތާށެވެ. އެކުދިންނާއިމެދު ރަނގަޅު ގޮތުގަ ވިސްނާށެވެ. އެއީ މިޒަމާނުގައި އެކުދިންނަށް ފައިސާ މާގިނައިން މާފަސޭހައިން ލިބެން އޮއްވައި މަދުފައިސާކޮޅަކަށް ގިނަ ވަޤުތު މަސައްކަތް އެކުރަނީ އެކުދިންނަކީ ރަނގަޅު ކުދިންކަމުގައިވާތީއެވެ. ޙަރާމް ގޮތުގައި ފައިސާ ހޯދަން ބޭނުންވާ ކުދިން ކަމުގައި ނުވާތީއެވެ.
އެކުދިންނަކީ އުޚުތުން ަކމުގައި ބަލައިގެން ވަޒީފާގައި ގެންގުޅޭށެވެ. އެކުދިންނަށް ސަލާމަތާއި ރައްކާތެރިކަން ފޯރުކޮށްދީ ހެޔޮކޮށް ހިތީމާ ކުރާ މަސައްކަތުގައި ބަރަކާތް ލައްވަވާނެތެވެ. އެއިރުން ތަނަށް ލިބޭ ފައިދާ ބޮޑުތަނުން އިތުރުވާނެއެވެ. އަދި ޤިޔާމަތް ދުވަހު އެކަމުގެ ފައިދާވެސް ކުރާނެއެވެ.
މިބަސްކޮޅު ބުނަން މިޖެހުނީ ވަޒިފާގައި އުޅޭ އަންހެންކުދިންނަށް ކުރިމަތިވާ މައްސަލަތައް ގިނަކަމުން ކަންބޮޑުވެ ޝަކުވާކުރާ ކުދިން ގިނަވާތީއެވެ. ”ޝައިޚްއެވެ. އަޅުގަނޑަށްޓަކާ ހެޔޮދުޢާކޮސްދެއްވާށެވެ!“ ބުނާ ކުދިން ގިނަވާތީއެވެ.
ވަޒިފާގެ މާޙައުލާއިމެދު ކަންބޮޑުވާ ކުދިންނަށް ބުނެލަން އޮތީ ތިރީގައިވާ ލިޔުންވެސް ވިދާޅުވެ ލައްވާށެވެ!
މިހާރަކަށް އައިސް އެންމެ ގިނައިން އަޑުއިވޭ އެއް ޝަކުވާއަކީ ވަޒީފާގެ މާހައުލުން ކުރިމަތިވާ ޖިންސީ ގޯނާކުރުމުގެ މައްސަލަތަކުގެ ވާހަކައެވެ. ވީމާ މިއީ މިއަދު ނުދައްކައި ތިބެވެން އޮތް ވާހަކައެއް ނޫނެވެ.
މިފަދަ ކަންކަމަށްބަލާއިރު ޢިއްފަތްތެރިކަމާއިއެކު ވަޒީފާއަދާކުރަން މަސައްކަތްކުރާ އަންހެނުންނަށްވެސް މައްސަލަތައް ކުރިމަތިވެއެވެ. 90 އިންސައްތަހައި މިންވަރަށް ގިނައީ ވަޒީފާ ބަޔާނުގައި ކުރަން ޖެހޭނެކަމަށް ނެތް މަސައްކަތް ކުރަން އުޅޭ އަންހެނުންނަށް ކުރިމަތިވާ މައްސަލަތަކެވެ.
ދިރިއުޅުމުގެ ކަންކަމަށް އައިސްފައިވާ ބޮޑެތި ބަދަލުތަކާއި ދިރިއުޅުމުގެ ޚަރަދުތައް ބޮޑުވެފައިވާވަރުން ވަޒީފާއަދާކުރަންޖެހޭނަމަ ވަޒީފާ އަދާކުރިނަމަވެސް ކުރަންޖެހޭނީ ވަޒީފާ ބަޔާނުގައި ކުރަންޖެހޭނެ ކަމަށް ވަޒީފާ ބަޔާނުގައި ބަޔާންކޮށްފައިވާ މަސައްކަތްތަކެވެ. ބޮޑުމީހާ ނުވަތަ އިސްކޮށް ހުންނަ މީހާގެ ޖިންސީ އެދުންތައް ފުއްދައިދިނުމާއި އޭނާގެ ގައިގައި އުނގުޅުންފަދަ ކަންކަން އެއްވެސް ވަރަކަށް ކުރާކަށް ނުޖެހޭނެއެވެ.
އެކަންކަން ނުކޮށް ވަޒީފާ އަދާކުރެވެން ނެތް ނަމަ ކިތަންމެ ދަތިޙާލުގައި އުޅެން ނަމަވެސް ﷲ ތަޢާލާއަށް ބިރުވެތިވެ ޢިއްފަތްތެރިކަން ސަލާމަތްކުރާށެވެ! ﷲ ތަޢާލާއަށް ވަކީލުކޮށް ވަޒީފާ ދޫކޮށްލާށެވެ! އެއިރުން މާރަނގަޅު ވަޒީފާތައް ﷲ ތަޢާލާ ފަހިކުރައްވަވައި ދެއްވަވާނެތެވެ! އެފަދަ މީހަކު މާޔޫސް ނުކުރައްވަވާނެތެވެ! އިން ޝާ ﷲ
ވަޒީފާ އަދާކުރުމަށްފަހު ވަގުތު ބޭކާރުނުކޮށް އަވަހަށް އެނބުރި ގެއަށް އަންނާށެވެ! ވަގުތުތައް ބޭކާރު ގޮތުގައި ގެއިން ބޭރުގައި ހޭދަނުކުރާށެވެ! ހަމަ އެޢާއިއެކު ވަޒީފާއަށް ދާންވެސް ލާންޖެހޭނީ ބޮޑުމީހާ ރުހޭނެ ހެދުމެއް ނޫނެވެ! ﷲ ތަޢާލާ ރުހިވޮޑިގަންނަވާނެ ހެދުމެވެ. ވަކި ގޮތަކަށް ހެދުންލުމަށާއި ވަކި ސަރަހައްދުތަކެއް ނިވާކުރަން ﷲ ތަޢާލާ ވަޙީޚުރައްވަވާފައި އެވަނީ އަނހެނުންނަށް ހުރިހައި ގޮތަކުން ވެސް ރައްކައުތެރިކަން ހޯއްދަވައި ދެއްވެވުމަށެވެ. އެ ރައްކައުތެރިކަން އަމިއްލައަށް ދޫކޮށްލުމަށްފަހު ޝަކުވާ ކުރުމުން ކުރާނީ ކޮން ފައިދާއެއް ހެއްޔެވެ؟
– އިސްލާމީ ތިލަފަތުގެ ދަރުސަކުން
