ކޮމިއުނިޓީ ކޮންސެޕްޓުގައި ސްކޫލުތައް ހިންގުމަށްޓަކައި ލާމަރުކަޒީ ނިޒާމުގެ ތެރެއިން ކައުންސިލްތަކާއި ހަވާލު ކުރެވިފައިވާއިރު، ދިމާވާ ދަތިތައް ސަރުކާރުން ހައްލުކޮށްދެއްވާނެކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
މާފަންނު މަދަރުސާއަށް 40 އަހަރު ފުރުން ފާހަގަކުރުމަށް މިއަދު ބޭއްވި ހާއްސަ ހަފްލާގައި ރައީސްގެ ވާހަކަފުޅުގައި އެންމެ ފުރަތަމަ ވެސް ދެއްވި ޔަގީންކަމަކީ ސްކޫލަށް ފަސޭހައިން ވަދެވޭ ގޮތަށް ގްރައުންޑް ފްލޯގައި ހޯލެއް އަޅައިދެއްވާނެކަމަށެވެ. ދަރިވަރުން އެދިފައި ވަނީ އެ ކުދިންގެ މާމައިންނާއި، ކާފައިންނަށް ފަސޭހައަށް ވަދެވޭނެ ގޮތަށް ސްކޫލުގެ ހޯލުގެ އިންތިޒާމުތައް ހަމަޖައްސައިދިނުމަށެވެ.
މާފަންނު މަދަރުސާއަކީ ޖީލެއް ބިނާކުރުމަށް ނުހަނު އަގުހުރި މަސައްކަތެއް ކުރި ސްކޫލެއްކަން ފާހަގަކޮށް ރައީސް މުއިއްޒު ވިދާޅުވީ، އެމަނިކުފާނު މާލޭގެ މޭޔަރަކަށް ހުންނެވި ދުވަސްވަރުގައި ވެސް އެކި މަސައްކަތްތައް ވަރަށް ގާތުން ފެނިވަޑައިގެންނެވި ކަމަށެވެ. ރައީސް ވިދާޅުވީ މާފަންނު މަދަރުސާއަކީ ގައުމު ފަހުރުވެރިވާ ފަދަ ދަރިވަރުންތަކެއް އުފައްދާފައިވާ، އަދި އުފައްދަމުން ދާ ސްކޫލެއް ކަމަށެވެ.
ރައީސް މުއިއްޒު ވިދާޅުވީ މާފަންނު މަދަރުސާގެ ކުރިއެރުމަށް ސަރުކާރަށް ކުށްދެވޭނެ ހުރިހާކަމެއްގައި ސަރުކާރުން އެއްބާރުލުން ދޭނެކަމަށެވެ.
މީގެއިތުރުން ކޮމިއުނިޓީ ސްކޫލުގެ މުހިންމުކަން ފާހަގަކުރައްވައި ރައީސް ވިދާޅުވީ، ކޮމިއުނިޓީ ކޮންސެޕްޓުގައި ސްކޫލުތައް ހިންގުމަށްޓަކައި ލާމަރުކަޒީ ނިޒާމުގެ ތެރެއިން ކައުންސިލްތަކާއި ހަވާލު ކުރެވިފައިވާ ކަމަށެވެ. އަދި މި ކޮންސްޕްޓަށް ވެސް ސަރުކާރުން އެއްބާރުލުން ދީ، ކޮންސެޕްޓުގައި ސްކޫލު ހިންގުމަށް އެއްވެސް ދަތިތަކެއް ދިމާވާނަމަ އެކަމެއް ހައްލު ކުރައްވާނެކަމަށް ވިދާޅުވި އެވެ.
ރައީސް ވިދާޅުވީ އެމަނިކުފާނު ބޭނުން ވަނީ ދަތިތަކުން އަރައިގަނެ، މިހާރަށް ވުރެ ރަނގަޅަށް ހިންގޭނެ ގޮތަށް ނިޒާމުތައް ރޭވިގެން ދިއުން ކަމަށެވެ.
