ރައްޔިތުންގެ މަޖިލީހުގެ މެންބަރުން ޕާޓީ ބަދަލުކުރުމުން ނުވަތަ ޕާޓީން ވަކިކޮށްފި ނަމަ މެންބަރުކަން ގެއްލޭ ގޮތަށް ގާނޫނުއަސާސީއަށް ގެނައި އިސްލާހާބެހޭ ތުސްތޫރީ މައްސަލަ ބަލައިނުގަންނަން ހައިކޯޓުން ނިންމައިފި އެވެ.
އެމައްސަލަ ހައިކޯޓުން ބަލައިނުގަންނަން ނިންމީ މަޖިލީހުގެ މެންބަރުންގެ ގޮނޑި ގެއްލޭ ހާލަތްތަކެއް ބަޔާންކޮށް ގާނޫނުއަސާސީ އިސްލާހުކޮށްފައި ވުމާއެކު އެ މައްސަލައިގެ ބޭނުން ގެއްލިފައިވާތީ ކަމަށް ބުނެ އެވެ.
ދުސްތޫރީ މައްސލައެއްގެގޮތުގައި އެ މައްސަލަ ހައިކޯޓަށް ހުށަހަޅާފައިވާ އިރު ގޮނޑި ގެއްލޭ ގޮތަށް ގާނޫނު އަސާސީ އަށް ގެނައި ބަދަލާ ގުޅިގެން އެ މައްސަލަ ސުޕްރީމް ކޯޓަށްވެސް ވަނީ ހުށަހަޅާފަ އެވެ.އަދި ސުޕްރީމް ކޯޓުން ވަނީ އެ މައްސަލަ ބަލައިވެސްގެންފަ އެވެ. އެ މައްސަލަ ސުޕްރީމު ކޯޓަށް ހުށަހެޅީ ކެންދޫ ދާއިރާގެ ކުރީގެ މެންބަރު އަދި ގާނޫނީ ވަކީލު ޢަލީ ޙުސައިން އެވެ.
މައްސަލަ ހުށަހަޅުއްވަމުން އަލީ ހުސައިން ވިދާޅުވެފައި ވަނީ، މެމްބަރުންގެ ގޮނޑި ގެއްލޭ ގޮތަށް ގާނޫނޫ އަސާސީއަށް ގެނައި އިސްލާހަކީ ގާނޫނު އަސާސީގެ ހަތަރު ވަނަ މާއްދާއާއި، އަށް ވަނަ މާއްދާ އާއި، 26، 75 އަދި 90 ވަނަ މާއްދާއާ ޚިލާފަށް އަދި މުޅި ގާނޫނު އަސާސީގެ އޮނިގަނޑާ ޚިލާފަށް ގެނެސްފައިވާ އިސްލާހެއް ކަމަށެވެ.
ގާނޫނުއަސާސީއަށް އިސްލާހުތަކެއް ސަރުކާރުގެ ފަރާތުން ހުށަހެޅީ ނޮވެމްބަރު 20 ވަނަދުވަހު އެވެ. ހަމަ އެ ދުވަހު އެ ބިލު މުޅި މަޖިލީހުގެ ކޮމިޓީން ފާސްކޮށް، އެ ދުވަހުގެ ހަވީރު ތަޅުމުން ފާސްކޮށްފައިވެ އެވެ. އަދި އެ ދުވަހުގެ އިރާކޮޅު ރައީސް ޑރ. މުހައްމަދު މުއިއްޒު ވަނީ އެ ބިލު ތަސްދީގު ކުރައްވައިފަ އެވެ.
ގާނޫނު އަސާސީއަށް އިސްލާހު ގެނައުމަށް ހަތަރު އިސްލާހެއް ވަނީ ހުށަހަޅާފައެވެ. އެއީ ރާއްޖޭގެ ސަރަހައްދަށް ބަދަލެއް ގެނައުމުގެ ކުރިން ރައްޔިތުންގެ މަޖިލީހުގެ ތިންބައިކުޅަ ދެބައިގެ ރުހުން ހޯދަންޖެހޭ ގޮތަށް ބަދަލު ގެނައުމާއި ގޮނޑި ގެއްލޭނެ އައު ދެ ހާލަތު ހިމެނުމާއި ދައުލަތުގެ މައިގަނޑު ސިޔާސަތުތައް ކަނޑައެޅުމާއި ސަރުކާރުގެ އިދާރާތަކަށް އިރުޝާދު ދިނުމާއި ގައުމީ ތަރައްގީގެ ޕްލޭންތަކާއި ތަސައްވުރުތައް އެކަށައެޅުން ރައީސްއަށް ލިބިދޭ ގޮތަށް ބަދަލުކުރުމާއި އަސްކަރީ ބޭނުމަކަށް ބޭރުގެ ސިފައިން ތިބެވޭނީ މަޖިލީހުގެ އަގުލަބިއްޔަތު ލިބިގެން ކަމަށް ހިމެނުން ހިމެނެއެވެ.
ރައްޔިތުންގެ މަޖިލީހުގެ މެމްބަރުންގެ ގޮނޑި ގެއްލޭ ގޮތަށް އެންމެ ފުރަތަމަ ގާނޫނެއް އެކުލަވާލީ ކުރީގެ ރައީސް އަބްދުﷲ ޔާމީންގެ ވެރިކަމުގައެވެ. އެހެން ނަމަވެސް އެމްޑީޕީން ކޮންޓްރޯލްކުރި އެގާނޫނު ވަނީ އުވާލާފައެވެ. އެހެންނަމަވެސް އެ ދައުރު ނިމެން ދަނިކޮށް އަނެއްކާވެސް އެމްޑީޕީން ވަނީ މި ގާނުނޫ ފާސްކޮށްފައެވެ.
