ފްލެޓާއި ގޯތި ވައްކަން: ފުލުހުންގެ ތަހުގީގު ވެރިޔާ ރަޖްނީ ފްލެޓެއް ކާލި މައްސަލަ ތަހްގީގް ފަށައިފި
ދެންމެ | 21 ޑިސެމްބަރ 2024

އެޗްޑީސީގެ ގޯތީގެ ވައްކަމުގެ މައްސަލަ ތަހުގީގުކުރާ ފުލުހުންގެ އިކޮނޮމިކް ކްރައިމް ޑިޕާޓްމަންޓްގެ ވެރިޔާ، ރަޖްނީ ޝުއައިބަށް ނުހައްގުން ވިނަރެސް ފްލެޓެއް ލިބިފައިވާ ކަމަށް ބުނާ މައްސަލައެއް ބަލަމުންދާ ކަމަށް ފުލުހުން މިއަދު ބުނެފި އެވެ.

މާލޭ ރަށްވެހިންނަށް ގޯތި ދިނުމަށް ހިންގި ”ބިންވެރިޔާ“ ސްކީމުގެ ދަށުން ގޯތި ނުލިބޭ ބަޔަކަށް، ގަވާއިދާ ހިލާފަށް އެޗްޑީސީން ހުޅުމާލެއިން ގޯތިތަކެއް ދިން މައްސަލަ ފެންމަތިވެ، އެ މައްސަލައިގެ ޖިނާއީ ތަހުގީގެއް މިހާރު ވަނީ ފަށާފަ އެވެ. ފުލުހުން ބަލަނީ ޑޮކިއުމެންޓުތަކެއް ފޯޖުކުރި މައްސަލަ އެވެ.

އެ މައްސަލަ ތަހުގީގު ކުރަމުންދާ ފުލުހުންގެ ޓީމުގައި ހިމެނޭ ރަޖުނީ އާއި އޭނާގެ އަންހެނުންނަށް ނުހައްގުން ފްލެޓް ލިބުނު ކަމަށް ބުނެ، ސޯޝަލް މީޑިއާގައި ދައުރުވަމުންދެ އެވެ. އެ ޕޯސްޓްތަކުގައި ބުނާގޮތުން ރަޖުނީއާއި އޭނާގެ އަންހެނުންނަށް ފްލެޓް ލިބުނީ، ވިނަރެސް ފްލެޓްތަކުންނެވެ.

”ރަޖުނީ ޝުޢައިބާއި ގުޅޭގޮތުން ސޯޝަލް މީޑިއާގައި އާންމުކުރަމުންދާ މަޢުލޫމާތާ ގުޅިގެން ދިވެހި ފުލުހުންގެ ހިދުމަތުން ބަލަންޖެހޭ ކަންކަން ބަލަމުންދާ ވާހަކަ ދަަންނަވަމެވެ“ ފުލުހުންގެ ތަރުޖަމާނު އަހުމަދު ޝިފާން ”އެކްސް“ ގައި ކުރި ޕޯސްޓެއްގައި ވިދާޅުވި އެވެ.

މިދިޔަ ސަރުކާރުން ވިނަރެސް ފްލެޓްތައް ދޫކޮށްފައިވަނީ ދެ ގޮތަކަށެވެ. އެއްގޮތަކަށް އެ ފްލެޓްތައް ދިނީ އިއުލާނު ކޮށްގެން ކުރިމަތިލީ މީހުންގެ ތެރެއިން ޝަރުތު ހަމަވާ ފަރާތްތަކަށެވެ. މި ސަރުކާރަށް ވީއިރު ބާކީ ނުދެވި ހުރި 123 ވިނަރެސް ފްލެޓް ދޫކޮށްފައިވަނ މި ސަރުކާރުންނެވެ.

ދެން އެ ފްލެޓްތައްދިނީ ސީލައިފް ކުންފުނީގެ ސަބަބުން ފްލެޓް ނުލިބި ތިބި މީހުންގެ ތެރެއިން ސިވިލް ކޯޓުން ކުރި ހުކުމްގައި ކަނޑައަޅާފައިވާ މީހުންނަށެވެ.

ވިނަރެސް ފްލެޓަށް ޝަރުތު ހަމަވެ، އެ ފްލެޓް ލިބޭ މީހުންގެ ނަންނަތައް އެޗްޑީސީއިން އާއްމު ވެސް ކުރި އެވެ. އާއްމު ފަރާތްތަކުން ކަންބޮޑުވުން ފާޅުކޮށް، ސޯޝަލް މީޑިއާގައި ކުރަމުންދާ ޕޯސްޓްތަކުގައި ބުނީ ރަޖުނީ އާއި އޭނާގެ އަންހެނުންގެ ނަން އެއިން އެއްވެސް ލިސްޓެއްގައި ހިމެނިފައިނުވާ ކަމަށެވެ.

ރަޖުނީ އާއި އޭނާގެ އަންހެނުންނަށް ނުހައްގުން ފްލެޓެއް ލިބުންކަން މިހާތަނަށް ކަށަވަރު ކުރެވިފައެއް ނުވެ އެވެ.

ގުޅުންހުރި ލިޔުންތައް

މި ލިޔުމަށް 48 ގަޑި އިރު ވެފައިވާތީ ކޮމެންޓުކުރުމުގެ ފުރުސަތެއް ނެތް. މާފުކުރައްވާ!