މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) އިން މިހާރު މަސްވެރިން ކިރުވާ މަހަށް 48 ގަޑިއިރުގެ ތެރޭގައި ފައިސާ ޖަމާކުރަމުންދާކަމަށް އެ ކުންފުނިން ބުނެފިއެވެ.
މިއީ ރައީސް ޑރ. މުހައްމަދު މުއިއްޒުގެ ރިޔާސީ ވައުދެއް ކަމަށްވާއިރު، ބައެއް ހާލަތްތަކުގައި 24 ގަޑިއިރުގެ ތެރޭގައި ވެސް ފައިސާ ޖަމާކުރެވޭ ކަމަށް މިފްކޯއިން ބުނެއެވެ.
މި ސަރުކާރު ވެރިކަމާ ހަވާލުވިއިރު މަސްވެރިންނަށް 230 މިލިއަން ރުފިޔާ ނުދެވި އޮތް ނަމަވެސް، މިހާރު އެ ފައިސާ ވަނީ ދައްކާ ނިންމާފައެވެ. އަދި މިހާތަނަށް މަސްވެރިންނަށް ދޭންޖެހޭ ހުރިހާ ފައިސާއެއް ދީ ނިމިފައިވާ ކަމަށް މިފްކޯއިން ބުނެފައިވެއެވެ.
މި މަސައްކަތުގައި ބޭންކް އޮފް މޯލްޑިވްސް އާއި މާލީ މިނިސްޓްރީ އަދި މަސްވެރިކަމާއި ކަނޑުގެ ވަސީލަތްތަކާ ބެހޭ މިނިސްޓްރީގެ އެހީތެރިކަން ލިބެމުންދާކަމަށް މިފްކޯއިން ފާހަގަކޮށްފައިވެއެވެ. ރައީސް މުއިއްޒުގެ ވެރިކަމުގައި މިހާތަނަށް 55،299 މެޓްރިކް ޓަނުގެ މަހަށް 973،744،789 ރުފިޔާ ވަނީ މަސްވެރިންނަށް ދޫކޮށްފައެވެ.
