ބައެއް މިނިސްޓްރީތައް އެއްކޮށްލައި، ކެބިނެޓަށް ރައީސް ޑރ. މުހައްމަދު މުއިއްޒު މިއަދު ބަދަލުތަކެއް ގެންނަވައިފި އެވެ.
މި ބަދަލުތަކުގެ ދަށުން ފިނޭންސް މިނިސްޓްރީ އާއި ޕްލޭނިން މިނިސްޓްރީން އެއްކޮށްލައި މިހާރު ވަނީ މިނިސްޓްރީ އޮފް ފިނޭންސް އެންޑް ޕްލޭނިން އަށް ބަދަލުކޮށްފަ އެވެ. އެ މިނިސްޓްރީ ހިންގަވާނީ ކުރިއެކޭ އެއްގޮތަށް މިހާރު ވެސް މިނިސްޓަރު މޫސާ ޒަމީރެވެ.
ހައުސިން އާއި އިންފްރާސްޓްރަކްޗާ އެއްކޮށްލައި މިހާރު ވަނީ އެ މިނިސްޓްރީގެ ނަން މިނިސްޓްރީ އޮފް ހައުސިން އެންޑް އިންފްރާސްޓްރަކްޗާ އަށް ބަދަލުކޮށްފަ އެވެ. އެ މިނިސްޓްރީގައި ހުންނަވާނީ މިހާރު ވެސް ހުންނެވި ޑރ. އަބްދުﷲ މުއްތޮލިބެވެ.
މިހާތަނަށް ހައުސިން މިނިސްޓަރަކަށް ހުންނެވި ޑރ. އަލީ ހައިދަރު އަހުމަދާ ހަވާލު ކުރެއްވީ ހަޔާ އެޑިއުކޭޝަން މިނިސްޓްރީ އެވެ.
ކުރިން ހަޔާ އެޑިއުކޭޝަން މިނިސްޓަރަކަށް ހުންނެވި ޑރ. މަރިޔަމް މާރިޔާ ބަދަލުކުރެއްވީ އެގްރިލަކްޗާ އެންޑް އެނިމަލް ވެލްފެއާ މިނިސްޓްރީއަށެވެ.
މިއީ ރައީސް މުއިއްޒުގެ ކެބިނެޓަށް ބަދަލު ގެންނެވި ދެވަނަ ފަހަރެވެ.
އެ ފަހަރު ގެންނެވި ބަދަލަކީ މި ސަރުކާރުގެ ފުރަތަމަ ފޮރިން މިނިސްޓަރަކަށް ހުންނެވި މޫސާ ޒަމީރު ފިނޭންސް މިނިސްޓަރަކަށް ބަދަލުކުރެއްވުމާއި މި ސަރުކާރުގެ ފުރަތަމަ ހެލްތު މިނިސްޓަރު ޑރ. އަބްދުﷲ ހަލީލް ފޮރިން މިނިސްޓަރަކަށް ބަދަލުކުރެއްވުމެވެ. އަދި ހެލްތު މިނިސްޓަރަކަށް އައްޔަންކުރެއްވީ ރައީސް އޮފީހުގެ މިނިސްޓަރަކަށް ކުރިން ހުންނެވި އަބްދުﷲ ނާޒިމް އިބްރާހިމެވެ.
ޒަމީރު ފިނޭންސް މިނިސްޓަރަކަށް އައްޔަންކުރެއްވީ މި ސަރުކާރުގެ ފުރަތަމަ ފިނޭންސް މިނިސްޓަރު ޑރ. މުހައްމަދު ޝަފީގު އިސްތިއުފާދެއްވުމުންނެވެ.