ސިޙުރުވެރިންނަށް ބަލައިފިނަމަ އެމީހުންނަކީ އެންމެ ގިނައިން ފައިސާ ލިބޭ އެއްބައެކެވެ. މިލިއަނުންވެސް ފައިސާ ލިބެއެވެ. ބަލަންވީ ލިބޭ ފައިސާތަކަކަށް ނޫނެވެ. އެހާގިނަ ފައިސާ ލިބޭއިރުވެސް އެމީހުންނަށް ހިތްހަމަޖެހިގެން އުފަލުގައި ނުއުޅެވޭ ސަބަބަށެވެ. އެމީހުންގެ އަތަށް ލިބޭ ފައިސާތަކުން ކުރާ ޙަޤީޤީ ފައިދާއެއް ނުފެންނަ ސަބަބަށެވެ. މިކަންކަމަށް ބެލިނަމަވެސް އެއީ ފައިށާ ހޯދުމުގެ ބޭނުމުގައި ކުރަންވީ ކަމެއް ނޫންކަން އެނގިގެން އެބަދެއެވެ.
ސިޙުރު ހެދުމަކީ އެންމެ ބޮޑެތި ފާފަތަކުގެ ތެރޭގައި ހިމެނޭ ފާއެކެވެ. ސިޙުރު ހަދާ މީހާއަށް އޮތީ މަރުގެ އަދަބުދިނުމެވެ. ސިޙުރު ހެއްދުވުމަކީވެސް ހަމަ އެހައިމެ ބޮޑުފާފައެކެވެ. ނަމަވެސް މިއަދުވެސް މި ބޮޑު ފާފަކުރާ މީހުން އެބައުޅެއެވެ. އަދި އެކަން ދަސްކުރާ މީހުންވެސް އެބަ އުޅެއެވެ. މިއީ އަމިއްލައަށް ދުނިޔެއާއި ޢާޚިރަތް ދޫކޮށްލުން ނުވަތަ ނަގައިލުން ފަދަ ނުބައި ޢަމަލެކެވެ.
އަހަރެންނާއި ބައްދަލުވި މީހަކު ވަރަށް ދެރަވެފައި ބުންޏެވެ. ”ވަރަށް ކުޑައިރުންސުރެ ސިހުރު ހަދަން ދަސްކުރަން އަހަރެން ޝައުޤުވެރިވެއްޖެއެވެ. ކާފަ ނޫޅޭ ވަގުތުތަކުގައި ކާފަގެ ފޮތްތައް ހާވައި ކަންކަން ދަސްކުރަންވެސް ފެށީމެވެ. އެގޮތަށް ދަސްކުރި ދުވަސްވަރު ދަސްވި އެކައްޗަކީ ”މާޅުސްކެޔޮވަކެއްގައި ލިޔެފައި ހޫނުކުރުމުން އެމީހާ މަރުވާނެ“ ކަމަށް އޮތް އެއްޗެކެވެ.
ތަޖުރިބާކޮށްލަން އެކަންކުރީމެވެ. ނަމަވެސް އެވަރުކަމެއް ވެދާނެކަމަށް ޤަބޫލުނުކުރެވޭތީ އަޖުމަ ބަލައިލަން ލިޔުނީ ދައްތައެއްގެ ނަމެވެ. އެކަން އެހެންކުރީ އެއްވެސް ޙާލެއްގައި ދައްތަ މެރުމުގެ ޤަޞްދަކު ނޫނެވެ. އަހަރެން ދައްތަ ދެކެ ވަރަށް ލޯބިވެސްވެއެވެ. ނަމަވެސް ކަންތައް ވެގެންދިއައީ މުޅިން ތަފާތު ގޮތަކަށެވެ. އެރޭގެ ނިދީގައި އަހަރެންގެ މަންމަ ވަނީ މަރުވެފައެވެ. ދައްތައަކަށް އެއްވެސް ކަމެއް ނުވެއެވެ. އަހަރެންނަށް މިއުޅެނީ އެއިގެފަހުން 60 އަހަރުވީއިރުވެސް މިކަމުގެ ވިސްނުމުން ސަލާމަތް ނުވެވިގެންނެވެ.
ދެން މި ހިއްޞާކުރަނީ އިމާމް މާޒިން އަޙްމަދު، އޭނާގެ އަމިއްލަ ތަޖުރިބާގެ މައްޗަށް ދަރުސެއްގައި ހިއްޞާކުރައްވާފައިވާ މައުލޫމާތެވެ!
އޮސްޓްރޭލިޔާގައި ދިރިއުޅޭ ހިންދޫ ޒުވާނަކު އަހަރެންނާއި ބައްދަލުކުރިއެވެ. ދެމީހުންގެ މެދުގައި ދެކެވުނީ ދީނުގެ ވާހަކަތަކެވެ. އަހަރެން ދިއައީ އިސްލާމް ދީނުގެ މަތިވެރިކަން ބަޔާންކޮށްދީގެން އޭނާ އިސްލާމް ދީން ޤަބޫލުކުރޭތޯ މަސައްކަތްކުރަމުންނެވެ.
ކުއްލިއަކަށް ފެނުނީ އޭނާގެ ގައިން އޮއްދާ ހިއްލަން ފެށިތަނެވެ. އެއާއިއެކު އޭނާ ވަށައިގެން ހޯދަން ފެށިއެވެ. ތިއަވަނީ ކިހިނެއްތޯ ސުވާލުކުރުމުން ބުނީ މިތިބަ މީހުން ތިމަންނާއަށް އަނިޔާ ކުރަނީ ކަމަށެވެ. އެވާހަކައާއި ގުޅިގެން ކުރި ސުވާލުތަކުން އެނގުނީ އޭނާއަކީ ސިހުރު ހަދަން ދަސްކުރަމުންދާ ޒުވާނެއް ކަމެވެ. އަދި މިއުޅެނީ ދަސްކުރަން ހެދި ސިހުރެއް ނުބައިކޮށް ހެދިގެން ކަމެވެ. ޝައިޠާނުންތައް އައިސް ދިމާކޮށްލައި އަނިޔާ ކުރަނީ ކަމެވެ.
އަހަރެން ބުނީމެވެ. ކުރެވިގެން ތިއުޅެނީ ފާފަތަކުގެ ތެރެއިން ބޮޑުފާފައެކެވެ. ސިހުރު ހެދުމަކީ ﷲ ތަޢާލާ ވަރަށް ބޮޑަށް ނަހީކުރައްވަވާފައިވާ ކަމެކެވެ. ވީމާ ތިއަ މުޞީބާތުން ސަލާމަތްވުމަށްޓަކައި ވެސް އަވަހަށް އިސްލާމްވާށެވެ! ﷲ ތަޢާލާގެ އެއްކައުވަންތަކަމާއި ރަސޫލް (ﷺ)ގެ ރަސޫލުކަން ޤަބޫލުކުރާށެވެ. އަދި އެކަމަށް ހެކިވާށެވެ! އެއިރުން ތިއަ ޝައިޠާނުން ތަކަށް ޖެހޭނީ އަނިޔާކުރުން ހުއްޓާލާފައި ކަލޭ ދޫކޮށް މިތަނުން ދާށެވެ. ކަލެއަށް ﷲ ތަޢާލާ ރައްކައުތެރިކަން ދެއްވަވާނެތެވެ.
އެގޮތަށް ވާހަކަ ދެއްކުމުން އިރުކޮޅަކު ވިސްނަން އިނދެފައި އޭނާ ޝަހާދަތް ކިޔައި އިސްލާމްވިއެވެ. އޭނާ، ދުލުން ޝަހާދަތް ކިޔުމާއިއެކު އޭނާއަށް ހަމަހިމޭންކަން އަންނަންފެށިއެވެ. ދާދިކުޑައިރުކޮޅެއްގެ ތެރޭގައި އޭނާ އިނީ ހަމަޖެހިލައިގެންނެވެ. އޭނާ ބުނީ ޝައިޠާނުންތައް އޭނާ ދޫކޮށްލާފައި ހިނގައްޖެ ކަމަށެވެ. މިއަދު އޭނާއަކީ އިސްލާމް ދީން ދަސްކުރާ ދަރިވަރެކެވެ. އިސްލާމް ދީނަށް އަމަލުކުރަން މަސައްކަތްކުރާ ޒުވާނެކެވެ.
މިއީ އަލަށް އިސްލާމްވުމުންވެސް މިންވަރު ކުރެއްވެވި ބޮޑު ނިޢްމަތެވެ. ދެއްކެވި ބޮޑު މުޢްޖިޒާތެއް ފަދަ ކަމެކެވެ. ވީއިރު އަހަރެމެން މުސްލިމުން ގިނަގިނައިން ޝަހާދަތް ކިޔައި ޝަހާދަތުގެ މާނަ ހިތްމައްޗަށް ގެންނަ ނަމަ ކުރާނެ ފައިދާގެ ބޮޑުކަމާއިމެދު ނިކަން ވިސްނައި ފިކުރުކޮށްބަލާށެވެ!
އިމާމް މާޒިން ވިދާޅުވެފައި އެވަނީ ވަރަށް ޙިކުމަތްތެރި ބަސްފުޅެކެވެ. ބައެއް މީހުން ކަމަކަށް ބޭނުންވާއިރަށް އަވަސްއަވަހަށް ދުއްވައިގަންނަނީ ކޮންމެވެސް ސިހުރުވެރިއެއްގެ ގާތަށެވެ. ގޮސް ސިހުރު ހައްދުވައެވެ. ޣައިބުގައިވާ ކަންކަން ސިހުރުވެރިންނަށް އެހައި ފަސޭހައިން ރަނގަޅުކުރެވޭއިރު ގޭގެފުރާޅުން ވާރޭ ވެހޭތީ ސިހުރުވެރިން ގާތަށް ނުދަނީ ކީއްވެގެންހެއްޔެވެ؟ އެ ގެންގުޅޭ ޖިންނި ޝައިޠޯނުން ލައްވައި ޓިނު އައުކޮށްލަންވީ ނޫންހެއްޔެވެ؟ މީހަކު އެދޭހައި ކަމެއް ސިޙުރުވެރިންނަށް ކޮށްދެވޭނެ ނަމަ ފުރާޅުގެ ޓިނުވެސް ބަދަލުކޮސްދެވޭނެ ނޫންހެއްޔެވެ؟
ވިސްނާށެވެ! ސިހުރު ހެދުމަކީ ވެސް ސިހުރު ހެއްދުވުމަކީވެސް ވަރަށް ބޮޑަށް ބިރުގަންނަންޖެހޭނެ ކަމެކެވެ. އެހެންނީ އެކަން އެނބުރި ފުރޮޅިގެން ތިމާ އާއި ދިމާއަށް އަތުވެދާނެ ސަބަބު ވިސްނަންވެސް ނޭނގޭނެތީއެވެ!
