އަނބިންގެ ކިބައިން ރޭގަނޑު އުފާވެރިކަން އެދެން ތަ!
ދެންމެ | 29 ޑިސެމްބަރ 2024

އުފާވެރި ދިރިއުޅުމެއް ކާމިޔާބުކުރުމުގެ ތަޅުދަނޑިއަކީ ފައިސާއެއް ނޫނެވެ. ވަފާތެރިކަމާއި އޯގާތެރިކަމެވެ. އިޙްޞާންތެރިކަމެވެ. އެކަން ރަސޫލް ޞައްލަﷲ ޢަލައިހިވަސައްލަމް ވަނީ އުންމަތަށް ބަޔާންކޮށްދެއްވަވައިފައެވެ.

”އޭ މީސްތަކުންނޭވެ! އަނބިންގެ މައްޗަށް ތިއަބައި މީހުންނަށް ޙައްޤުތަކެއް ލިބިގެންވެއެވެ. ހަމައެފަދައިން ތިއަބައިމީހުންގެ މައްޗަށް އެކަނބަލުންނަށްވެސް ޙައްޤުތަކެއް ލިބިގެންވެއެވެ. ތިއަބައިމީހުން އެމީހުންނަކީ އަނބިންކަމުގައި ބަލައިގަތީ ﷲ ތަޢާލާގެ ނަންފުޅު މެދުވެރިކޮށްކަމާއި ﷲ ތަޢާލާގެ އިޒުނަފުޅާއިއެކުގައިކަން ހަނދާން ނައްތައި ނުލާށެވެ. އަދި އެމީހުންނަށް ބޭނުންވާ ކަންކަން އޯގާތެރިކަމާއިއެކު ކޮށްދޭށެވެ. އަދި އެކަނބަލުން ނުގެންގުޅެވިގެން ދޫކޮށްލާނަމަވެސް އެކަނބަލުންނަށް އަނިޔާވެރި ނުވެ އަދުލުވެރިކަމާއިއެކު ކަންކަން ކުރާށެވެ.“

ރަސޫލް (ﷺ) ހައްޖިތުލްވިދާޢުގެ ޚުޠުބާގައި މިމޭރުމުން އުންމަތަށް ވަސިއްޔަތް ކުރެއްވެވިކަން ހަނދާނުގައި ބަހައްޓާށެވެ. ހިތާމައަކީ ރަސޫލް (ﷺ) ދެއްވަވާފައިވާ މިފަދަ އިރުޝާދުތައް އަހަރެމެންގެ ހަނދާނުގައި މިއަދު ނުހުންނަ ކަމެވެ. ހަމައެކަނި އެމީހެއްގެ އަމިއްލަ އެދުންތައް ކުރިއަށް ނެރެވޭ ކަމެވެ.

ދައްކަން މިއުޅެނީ ހުރިހާ ފިރިންގެ ވާހަކައެއް ނޫނެވެ! އަނބިންނަށް އަނިޔާވެރިވަމުން، އަނިޔާކުރަމުން ވެސް އަނބިންގެ ކިބައިން އުފާ ނުލިބިގެން ޝަކުވާކުރާ ފިރިންގެ ވާހަކައެވެ. އެމީހުންނަކީ އެމީހުންގެ އަބިންނަށް ވަރަށް އަނިޔާވެރި ބައެކެވެ. ތަޅައި ޖިސްމާނީ އަނިޔާތައްވެސް ކުރެއެވެ. ހިތަށް އެރިހައި ނުބައި ބަސްތައް ބުނެއެވެ. ހިތުގައި ޖައްސައި ރޮއްވައެވެ. ނަމަވެސް ރޭގަނޑުވުމުން ދުވާލު އަނިޔާތައް ދިން އަނބިމީހާގެ ގާތަށް އުފާ ހޯދަން ދެއެވެ. ބައެއް ފިރިން ރޭގަނޑު އެފަދަ އަނިޔާތައް ކުރުމަށްފަހު ވެސް ނިދަން އޮށޯވެފައި އަނބިމީހާގެ ކިބައިން އުފާވެރިކަން ލިބިގަންނަން ބޭނުންވެއެވެ.

ނިކަން ބުނެބަލާށެވެ. މިއީ ކޮން ގޮތަކުން ދެކޮޅު ޖެހޭ ކަމެއް ހެއްޔެވެ؟ އެ ހާލަތުގައި ފިރިމީހާ ބޭނުންވެގެން ހުރި އުފާވެރިކަން ބޭނުންވެގެން ހުރި މިންވަރަށް ފޯރުކޮށް ދިނުމަކީ ކުރެވިދާނެ ކަމެއް ހެއްޔެވެ؟ އެފަދަ ފިރިންނަށް ހިނިތުންވެވޭނީ ކިހިނަކުން ހެއްޔެވެ؟ އަނބިންނަކީ ރޮބޮޓްތަކެއް ހެއްޔެވެ؟ ބޭނުން ސްވިޗަކަށް ފިއްތައިލުމުން ބޭނުންވާ ގޮތަށް ޙަރަކާތްތެރިވުމަކީ ރޮބަޓްކުރާ ކަމެއް ނޫންހެއްޔެވެ؟

އެހެންކަމާއިއެކުވެސް އުފާވެރިކަން ފޯރުކޮށްދިނުމުގައި ކިތަންމެ ކުޑަ މިންވަރެއް މަދުވި ނަމަވެސް އަނެއްކާވެސް އެއްޗެތި ގޮވައި ތަޅައި އަނިޔާކުރަންވީއެވެ. އެފަދަ ފިރިން ވިސްނައިލުން އެންމެ ރަނގަޅުވާނީ އެމީހުން ދުއްވާ ވެހިކަލާއިމެދުގައެވެ. ދުއްވައި ދުއްވައި ޕެޓްރޯލް ހުސްކޮށްލަނީއެވެ. ޕެޓްރޯލް ހުސްވެގެން ހުއްޓުނީމާ ކިތަންމެ ވަރަކަށް ޗޯކް ކުރި ނަމަވެސް އަދި ފައިބައި ކިތަންމެ ބާރަށް ކޮސްޕި ނަމަވެސް ޕެޓްރޯލް ނުއަޅައި ސްޓާޓް ކުރެވޭނެ ހެއްޔެވެ؟

ރަނގަޅަށް ވިސްނާށެވެ. އަނިބިން ގެންގުޅެން ޖެހޭނީ ހިތުގައި ޖައްސައި އަނިޔާ ކޮށްކޮށް، މާޔޫސްކުރުވައި ގޮތް ހުސްކުރުވާކަށް ނޫނެވެ. ކާރުން ޕެޓްރޯލް ހުސްވީމާ ޕެޓްރޯލުކޮޅެއް އެޅީމާ ހަމަ ކުރިން ދުވި ސްޕީޑްގައި ދުއްވުނު ނަމަވެސް އެއްވެސް މީހެއްގެ ހިތުގައި ޖއްސަމުން ގެންދާނަމަ ކުރިން ދިން ލޯޓްބެއް ނުދެވޭނެއެވެ. ދުވާލު ހިތުގައި ޖައްސާފައި ރޭގަނޑު ކިތަންމެ ވަރަކަށް ފިރުމި ނަމަވެސް އެކަން ކާމިޔާބެއް ނުކުރެވޭނެއެވެ.

އަންހެނުންނަކީ ވަރަށް ނާޒުކު ބައެކެވެ. އެއީ ބިއްލޫރިކޮޅުތަކެއްގެ މިސާލެވެ. ކޫރުން އެޅުނީމާ ކޫރުން ފިލުވުމަކީ އެހައި ފަސޭހަކަމެއް ނޫނެވެ. އަދި ތަޅައިގެން ދިއުމުން ކުރިން ހުރި ގޮތަށް ރެނދު ބެއްދުމަކީވެސް ހަމަ ހިލާ ކުރެވޭނެ ކަމެއް ނޫނެވެ.

އަހަރެމެން މިސާލު ނަގަން ޖެހޭނީ ރަސޫލް (ﷺ) ގެންގުޅުއްވެވި އަނބިއަނބިކަނބަލުންގެ އަދަދަކުން ނޫނެވެ. އަނބިއަނބިކަނބަލުންނާއިމެދު އަމަލު ކުރެއްވެވި ގޮތުންނެވެ. ބެހެއްޓެވި އޯގާތެރިކަމުންނެވެ. ރަޙްމާލީ ލޯތްބާއި ކުލުނާއި ފަރުވާތެރިކަމުންނެވެ. ރަސޫލް (ﷺ) އެއްވެސް އިންސާނަކާއި ދިމާއަށް، އަނބިއަނބިކަނބަލުންވެސް ހިމެނިވަޑައިގަންނަވާ ގޮތަށް، ހަނގުރާމައެއްގައި މެނުވީ އަތްޕުޅު ހިއްލަވާފައެއް ނުވެއެވެ. ވީއިރު އަހަރެމެންނަށް އަނބިންގެ ގައިގައި ތަޅައި އަނިޔާކުރަން ހުއްދަ ލިބެނީ ކޮން ގޮތަކުން ހެއްޔެވެ؟ އެއްވެސް އަނބިކަނބަލެއްގެ ހިތްޕުޅަށް އުނދަގޫފުޅުވާނެ އެއްވެސް ކަމެއް ކުރައްވަވާފައެއް ނުވެއެވެ. ވީއިރު އަހަރެމެން ހަމަ ރުޅި އަންނައިރަށް ހިތަށް އެރިހާ އެއްޗެއް ގޮވައި ހިތަށް އެރިހާ ކަމެއް ކޮށް އެކަނބަލުންގެ ހިތުގައި ޖައްސަން އޮތީ ކޮން ހައްޤެއް ހެއްޔެވެ؟

ގުޅުންހުރި ލިޔުންތައް

މި ލިޔުމަށް 48 ގަޑި އިރު ވެފައިވާތީ ކޮމެންޓުކުރުމުގެ ފުރުސަތެއް ނެތް. މާފުކުރައްވާ!