ރެސްޓޯރަންޓާއި ކެފޭތަކުގައި ސިނގިރޭޓު ނުބޮވޭ ގޮތް ހަދަން ހެލްތު މިނިސްޓްރީގައި އޮންނަ ޓޮބޭކޯ ބޯޑުން ނިންމައިފިއެވެ.
ޓޮބޭކޯ ބޯޑުން އެގޮތަށް ނިންމި އިރު، އެކަމާ ގުޅޭ ގާނޫނު އިސްލާހު ކުރަން މިހާރު ވަނީ ކަމާބެހޭ ފަރާތްތަކަށް ފޮނުވައިފައެވެ.
ރެސްޓޯރަންޓާއި ކެފޭތަކުގައި ސިނގިރޭޓު ނުބޮވޭ ގޮތް ހަދަން ޓޮބޭކޯ ބޯޑުން ނިންމި އިރު، ސަރުކާރުން ވަނީ ދުންފަތުގެ ބާވަތްތައް ބޭނުން ކުރާ މީހުންގެ އަދަދު މަދުކޮށް، ދުޅަހެޔޮ ސިއްހަތެއްގައި ދިވެހިން ބޭތިއްބުމަށް ވަރުގަދަ ފިޔަވަޅުތަކެއް އަޅަން ފަށައިފައެވެ.
ރާއްޖޭގައި މި ފަހުން އެޅި އެންމެ ބޮޑު ފިޔަވަޅަކީ ވޭޕް މަނާ ކުރުމެވެ. ރާއްޖެއަށް ވޭޕް އާއި ވޭޕް ކުރުމަށް ބޭނުންވާ ތަކެތި އެތެރެ ކުރުން މަނާކޮށްފައިވާ އިރު، ވޭޕް ވިއްކުމާއި ބޭނުން ކުރުން ވެސް މިހާރު ވަނީ މަނާކޮށްފައެވެ. ވޭޕާއި ވޭޕްކުރަން ބޭނުންކުރާ އާލާތްތަކާ އެކު، އިލެކްޓްރޯނިކް ސިނގިރޭޓް ވިއްކުމާއި ހިލޭ ބެހުމާއި ބޭނުންކުރުމާއި ރާއްޖެ އެތެރެކުރުން ވެސް މަނާވާނެއެވެ. އެފަދަ ކަންކަން ކުރާ ނަމަ، ޖޫރިމަނާ ކުރަން ވަނީ ފަށައިފައެވެ.
1- ވޭޕާއި ވޭޕް ކުރަން ބޭނުން ކުރާ ތަކެތި ރާއްޖެއަށް އެތެރެ ކޮށްފިނަމަ، އެތެރެ ކުރި މީހަކު 50،000 ރުފިޔާއިން ޖޫރިމަނާ
2- އެތެރެ ކުރާ ކޮންމެ ވޭޕަކަށް އިތުރު 10،000 ރުފިޔާގެ މަގުން ޖޫރިމަނާ
3- ރާއްޖޭގައި ވޭޕް ވިއްކާ ކޮންމެ މީހަކަށް 20،000 ރުފިޔާގެ ޖޫރިމަނާއެއް، އަދި ވިއްކި ކޮންމެ ވޭޕަކަށް 10،000 ރުފިޔާގެ މަގުން ޖޫރިމަނާ
4- ހިލޭ މީހަކަށް ވޭޕެއް ދީފިނަމަ 10،000 ރުފިޔާގެ ޖޫރިމަނާއެއް
5- ވޭޕް ބޭނުން ކުރާ މީހަކު 5،000 ރުފިޔާއިން ޖޫރިމަނާ ކުރެވޭނެ
މީގެއިތުރުން ދުންފަތް ކޮންޓްރޯލް ކުރުމާ ބެހޭ ގާނޫނަށް ގެނައި އިސްލާހާ އެކު، ރާއްޖޭގައި ވޭޕް ބުއިމާއި އޭގެ ވިޔަފާރިކުރުން މަނާވި އިރު، ހަމަ އެ ގާނޫނަށް ގެނައި އިސްލާހުގައި ސިނގިރޭޓާއި ބިޑީގެ ޑިއުޓީ ވެސް %50 ބޮޑުކޮށްފައެވެ.
ގާނޫނަށް ގެނައި އިސްލާހާ އެކު، ރާއްޖޭގައި ދުންފަތުގެ ވިޔަފާރި ކުރެވޭނެ އެންމެ ހަގު އުމުރަކީ 21 އަހަރެވެ. މީގެކުރިން ނަމަ، ދުންފަތުގެ ވިޔަފާރި ކުރެވޭނެ އެންމެ ހަގު އުމުރަކީ 18 އަހަރެވެ.
