ކޮންމެ މީހަކަށްވެސް ފާފައެއް ކުރެވިދާނެއެވެ. ތައުބާވެ ވިއްދައިގެން ހެޔޮ ޢަމަލެއް ކުރުމުން އެކަން ނިމުނީއެވެ. މައްސަލައަކަށްވަނީ ފާފަކުރުންމަތީގައި ދެމިހުރުމެވެ. ބިރުހުރި ކަމަކީ އެއީއެވެ.
ބައެއް މީހުން، އެމީހުންނަށް ފާފަކުރެވޭތީ ދެރަވެއެވެ. ނަމަވެސް ބުނަނީ މިއުޅެނީ ހުއްޓާނުލެވިގެން ކަމަށެވެ. އެފަދަ މީހުންގެ ގާތުގައި ބުންނައޮތީ ހަމަ އަބަދުވެސް މިބުނާ ވާހަކައެވެ.
ފާފަކުރުން ހުއްޓާލަން ބޭނުންނަމަ އެކަމަށް އޮތް އެންމެ ޔަޤީން އެއް ފަރުވާއަކީ އެކަމަށް އެދިގެން މަސައްކަތްކުރަމުން، ފާފަކުރެވެން އުޅެވޭ ވަޤުތު މިކުރެވެނީ ފާފައެއް ކަމާއި މިކުރެވޭ ފާފަ ﷲ ތަޢާލާ ދެކެދެނެވޮޑިގެންވާ ކަމާއި މަލާއިކަތުން ލިޔުއްވަވާކަން ހިތަށް ގެނައުމެވެ. އިޙްޞާންތެރިވުމެވެ.
އިހްޞާންތެރިވުމަކީ ތިމާ ކުރާ ޢަމަލު ﷲ ތަޢާލާ ދެކެދެނެވޮޑިގެންވާކަން ޤަބޫލުކުރުމެވެ. އެހެންވެ އަޅުކަންކުރަން މަސައްކަތްކުރަންއޮތީ އިޙްޞާންތެރިކަމާއިއެކުގައެވެ. ހަމަ އެގޮތަށް ފާފައެއް ކުރެވޭ ވަޤުތުވެސް އިޙްޞާންތެރިވެވޭނަމަ ފާފައެއް ނުކުރެވޭނެއެވެ. ބިރުވެތިވެވޭނެއެވެ.
މިސާލަކަށް ބައެއް މީހުންނަކީ ދޮގުބުނަން އާދަވެފައި ތިބޭ މީހުންނެވެ. އަނެއް ބައަކު ފާޙިޝް ކަންކަން ކުރަންވެސް އާދަވެފައި ތިބެދާނެއެވެ. މިހެން ބަލައިފިނަމަ އެކި މީހުންނަށް ކުރެވޭނީ އެކި ފާފަތަކެވެ.
މިސާލަކަށް ބުނާނަމަ ކުރާ ދޮގުހުވާ މަލާއިކަތުން ތިމާގެ ފަތުގައި ލިޔުއްވަވާކަން ވިސްނައިލެވޭނަމަ ދޮގުހުވައެއް ނުކުރާނެއެވެ. ހަމަ މިފަދައިން އެމޭރުމުން ވިސްނައިލެވޭނަމަ އެހެން ފާފައެއްވެސް ނުކުރާނެއެވެ.
މިވާހަކަ މިގޮތަށް ދެއްކޭލެއް ގިނަ ކަމުން ބައެއް މީހުން އަޑުއަހަން ފޫހިވެސްވެދާނެއެވެ. ނަމަވެސް ފޫހިވެގެން ދެކޮޅު ޖައްސާނީ ކިހިނެއްހެއްޔެވެ؟ އަހަރެމެން މަސައްކަތްމިކުރަނީ ﷲ ތަޢާލާގެ ރުހިވޮޑިގަތުން ހޯދާށެވެ. ސުވަރުގެ ވަނުމަށެވެ. މިމަޤްޞަދުތައް ޙާޞިލްކުރެވެންއޮތީ ފާފަކުރުން ހުއްޓާލެވިގެންނެވެ.
ފާފަކުރަން ބޭނުންވާ މުސްލިމަކު ނުހުންނާނެއެވެ. ނަމަވެސް އިންސާނުން ކަމުގައިވާތީ ފާފަކުރެވެނީއެވެ. ވީމާ ސަލާމަތްވާން އޮތް ހަމައެކަނި މަގަކީ ފާފަކުރުން ހުޓައިލެވުމެވެ. އަދި އެކަމަށް މަސައްކަތްކުރަނިކޮށްވެސް ފާފައެއް ކުރެވިއްޖެނަމަ ތައުވާވުމަށާއި ވިއްދައިގެން ހެޔޮ ޢަމަލެއް ކުރަން އަވަސްވެގަތުމެވެ.
ޔާ ﷲ އަޅަމެން އެންމެންނަކީ އިނބަ ﷲ ސުވަރުގެ ދެއްވަވާ އަޅުން ކަމުގައި ލައްވަވާށި! އާމީން-
– އިސްލާމީ ތިލަފަތުގެ ދަރުސަކުން
