ހިނިތުންވުމާއެކު، ފަހަރަކު މީހަކާ ސަލާންކުރައްވަމުން ރައީސް ގެންދެވިއިރު، އެންމެ ބޮޑަށް ފާހަގަވީ، އަތަށް ގަނޑުކޮޅެއް ލައިގެން ބަރިއަކަށް އެތުރިގެން ތިބި މި ރަށު ސްކޫލުގެ ފިރިހެން ކުދީންތަކެކެވެ. ރައީސް އެ ކުދީންނާ އަރައި ހަމަވުމުން ފަހަރަކު ކުއްޖަކު، އެ ކުއްޖެއްގެ އަތުގައި އޮތް ގަނޑުކޮޅު ރައީސަށްދީ، ރައީސްގެ އޮޓޯގްރާފަކަށް އެދުނެވެ. ހިނިފުޅުވަޑުވަމުން، ފަހަރަކު ކުއްޖަކަށް ރައީސް އޮޓޯގްރާފް ދެއްވިއެވެ. ގާތްގަނޑަކަށް ދިހަ ވަރަކަށް ކުދީންނަށް އޮޓޯގްރާފް ދެއްވިއެވެ. އެ ކުދީންނާ އެކު ފޮޓޯވެސް ނެންގެވިއެވެ.
އެއިން ކުއްޖަކު އަށް ބުނިގޮތުގައި މިއީ އެ ކުދީންގެ ހަޔާތުގައި ރައީސެއްގެ ފަރާތުން ލިބުނު ފުރަތަމަ އޮޓޯގްރާފެވެ. އެ ކުއްޖާ ބުނި ގޮތުގައި ރައީސް މުއިއްޒަކީ އޭނާގެ ފޭވަރިޓް ރައީސެވެ.
ރައީސްގެ ފަރާތުން ލިބުނު އޮޓޯގްރާފަކީ، މިއަދު އެ ކުދީންނަށް ބޮޑު އުފާވެރިކަމެއް ލިބުނު ކަމެކެވެ. އެއީ ތާރީޚީ ގޮތުންވެސް އޮންނާނެ މުހިންމު ލިޔުންކޮޅެއް ގޮތަށް އެ ކުދީން ދެކެއެވެ.
ރައީސް ހުވަދުއަތޮޅަށް ކުރައްވާ މި ދަތުރުފުޅަކީވެސް ރާއްޖޭގެ ހުރިހާ އަތޮޅަކަށް ޒިޔާރަތްކުރެއްވުމަށާއި އަތޮޅުތަކާއި ރަށްތަކާއި އަދި ސިޓީތަކުގެ ލޯކަލް ކައުންސިލުތަކާ ބައްދަލުކުރެއްވުމަށް މިދިޔަ އަހަރު ފަށްޓަވައިގެން ކުރިޔަށްގެންދަވާ ސިލްސިލާ ދަތުރުފުޅުތަކުގެ ތެރޭގައި ހިމެނިގެން ކުރައްވާ ދަތުރުފުޅެއް ކަމަށް ރައީސް އޮފީހުން ބުންޏެވެ.
މި ދަތުރުފުޅުގައި ރައީސުލްޖުމްހޫރިއްޔާގެ އަރިހުގައި ވަޒީރުންނާއި ސަރުކާރުގެ އިސް ބައެއް ވެރީން ބައިވެރިވެވަޑައިގަންނަވައެވެ.
ރައީސް ހުވަދުއަތޮޅުގެ ބައެއް ރަށްރަށަށް ކުރައްވާ މި ދަތުރުފުޅު ނިންމަވާލައްވައި، މާލެ ވަޑައިގެންނެވުމަށް ހަމަޖެހިފައިވަނީ މާދަމާއެވެ.
