އަޅުގަނޑުގެ ލޯބިވެރިއަކު ހުރެއެވެ. އޭނާގެ މައްސަލައަކީ ވީޑިއޯކޯލްކުރާއިރު ބުރުގާ ނަގައި އަޢުރަ ދައްކަން އެދޭކަމެވެ. ނިދަން އޮއްވައި ގުޅާފައި ނިދާ ހެދުމުގައި ފެންނަން ބޭނުން ކަމަށްވެސް އެބަ ބުނެއެވެ. އެކަން ނުކުރާތީ ރުޅިއާދެއެވެ. ވީމާ އަޅުގަނޑު ބޭނުންވަނީ އެކަމުގެ ޙުކުމް އޭނާއަށް އަންގައިދޭށެވެ!
ކިޔުންތެރިޔާ ފާހަގަކުރައްވާފައިވާ މައްސަލައަކީ ވަރަށް ބޮޑުވަމުން އަންނަ މައްސަލައެކެވެ. ވަރަށް ބޮޑަށް ހޭލުންތެރިވެ ސަމާލުކަންދޭންޖެހިފައިވާ މައްސަލައެކެވެ. ތިރީގައިވާ ލިޔުމުން ކަމުގެ ޙުކުމް އެނގިލައްވާނެއެވެ. އިން ޝާ ﷲ
”ތިމާގެ ބަރަހަނާ ފޮޓޯ ތިމާގެ ރުހުމުގައި ވިޔަސް އެހެން މީހަކަށް ފޮނުވުމަކީ ބޮޑުވެގެންވާ ޙަރާމްކަމެކެވެ. ބޮޑުވެގެންވާ ޖަރީމާއެކެވެ. ”ސެކްސްޓިންގ“ އޭ ކިޔައި ރައްބެއް ރަސޫލެއް ގަބޫލުނުކުރާ ނަޖިސް ކާފަރުން އުޅޭ ގޮތަށް އުޅުމަކީ މައްސަލައެއް ނޫނޭ ބުނާނީ ޝައިޠާނެކެވެ. ދައްޖާލެކެވެ.“
އެ ކަންކަމުން ދުރުހެލިވާށެވެ. އެފަދަ ފޮޓޯއެއް ލީކުވާއިރު ތިމާގެ އަބުރާއި މުޅި ޢާއިލާގެ އަބުރު ދާނީ ވެއްޔާ މޮޑެވިގެންނެވެ. އެއީ ތައުބާ ވިޔަސް އެ ފާފައިގެ އަސަރު އެންމެންނަށް ފެންނާން ހުންނާނޭ ނުބައި ފާފައެކެވެ.
އަޚުންނާއި އުޚްތުންނޭވެ! މާތް ﷲ ޙަރާމްކުރެއްވި ކަންކަމާ ކައިރިނުވާށެވެ. ޙަލާލު ހެޔޮ ގޮތުގައި ދުނިޔޭގައި އުޅެވޭތޯ ބަލާށެވެ. ޙަރާމް ގުޅުންތައް ނުއުފައްދާށެވެ. ޝައިޠާނާ ތިބާ ވާވެއްދިޔަ ނުދެށޭވެ.
