ހުކުރު ދުވަހަކީ މުސްލިމުންނަށް އަންނަ ޢީދެއް ފަދައެވެ. އެއީ މުޅި ހަފްތާގައިވެސް މުސްލިމުންނަށް އަންނަ އެންމެ މާތް ދުވަހެވެ. ހުކުރު ދުވަހުގައި ކުރެވިދާނެ ބައެއް ކަންތައްތައް އެބަހުއްޓެވެ. އެކަންތައްތައް ކުރުން އާދަ ކުރުމަކީ އެދެވިގެންވާ ކަމެކެވެ.
އެގޮތުން، ހިނައިގަނެ ފެންވަރާ، ގައިން ތާޙިރުވުން މުހިންމެވެ. ޚާއްސަ ދުވަސްތަކަށް މިހާ ޒީނަތްތެރިވާ ފަދައިން، ހުކުރު ދުވަހަށް ހިނައިގަނެ ޒީނަތްތެރިވުން އެދެވިގެންވެއެވެ. ފެންވަރާ ގައިގައި ހުވަނދުލައި، ސާފުތާޙިރުކަންމަތީ ހުރުން މުހިންމެވެ. މީގެ އިތުރުން، ހުކުރު ދުވަހު ކުރުން އެންމެ މުހިންމު އެއްކަމަކީ ކަހަފް ސޫރަތް ކިޔެވުމެވެ. ކަހަފް ސޫރަތަކީ ކީރިތި ޤުރުޢާނުގެ 18 ވަނަ ސޫރަތެވެ. ކަހަފް ސޫރަތުގެ ފުރަތަމަ 10 އާޔަތް ހިތުދަސްކުރުމަކީ ދައްޖާލުގެ ފިތުނައިން ސަލާމަތްވެ، ރައްކާތެރިކަން ހޯދުމަށް އޮތް މަގެއްކަން އަހަރުމެންގެ ލޮބުވެތި ނަބިއްޔާ މުޙައްމަދު صَلَّى اللّٰهُ عَلَيْهِ وَسَلَّمَ ގެ ސައްޙަ ހަދީޘުން ސާބިތުވެއެވެ. ފުރަތަމަ ފަހަރަށް ސޫރަތް ދިގުވެ ކިޔަން އުނދަގޫ ވެދާނެއެވެ. ނަމަވެސް ކޮންމެ ހުކުރު ދުވަހެއްގައި ކިޔަވަން ފެށުމުން އާދަވެ، ފަރިތަކަމާއި ފަސޭހަކަމާއެކު ކިޔާ ނިންމާލެވޭނެއެވެ. އެއްފަހަރާ ކިޔަން އުނދަގޫނަމަ، އެކި ގަޑިތަކަށް ބަހާލައިންވެސް ކަހަފް ސޫރަތް ކިޔާ ނިންމާލެވިދާނެއެވެ. ހަމަމިއާއެކު، އަތުގައި ހުރި މިންވަރަކުން ސަދަޤާތް ކުރުމަކީވެސް ހުކުރު ދުވަހުގައި ކުރެވިދާނެ ކަމެކެވެ. ދަހިވެތިކަމާއި ބޮޑާކަމުން މީހާ ދުރުކޮށްދީ، ދީލަތިކަމުގެ މާތް ސިފަ އަށަގެންނެވުމަށްޓަކައި ސަދަޤާތް ކުރުމަކީ މުހިންމު ކަމެކެވެ. އެއީ މުދަލުގައި ބަރަކާތް ލެއްވުމުގެ ޒަރީޢާއެއްވެސްމެއެވެ. އަދި ހުކުރު ދުވަހުގައި ކުރެވިދާނެ އެހެން ކަމަކީ، އަތުގައި އޮންނަ އެންމެ ރީތި އަންނައުނު ލައި ޒީނަތްތެރިވުމެވެ. އަތުގައި އޮންނަ އެންމެ ރީތި ހެދުންލުމެވެ. ފިރިހެނުން ހުވަނދާއި އަތަރުލައިގެން ޒީނަތްތެރިވުމެވެ. ޢީދަށް މީހާ ތައްޔާރުވާ ފަދައިންނެވެ.
ހުކުރު ދުވަހު ވީހާވެސް ގިނައިން ރަސޫލާގެ މައްޗަށް ސަލަވާތް ކިޔެވުމަކީ އާދަކުރަން ޖެހޭ ކަމެކެވެ. އެއީ އަހަރުމެންގެ ހިތްތަކަށް ހަމަޖެހުމާއި އުފާވެރިކަން ގެނެސްދޭނެ ކަމެއްވެސްމެއެވެ. ރަސޫލާގެ މައްޗަށް ސަލަވާތް ކިޔެވޭނެ ގޮތެއް ތިރީގައި މިވަނީއެވެ.
اللَّهُمَّ صَلِّ عَلَى مُحَمَّدٍ، وَعَلَى آلِ مُحَمَّدٍ، كَمَا صَلَّيْتَ عَلَى إِبْرَاهِيمَ، وَعَلَى آلِ إِبْرَاهِيمَ، إِنَّكَ حَمِيدٌ مَجِيدٌ،
اللَّهُمَّ بَارِكْ عَلَى مُحَمَّدٍ وَعَلَى آلِ مُحَمَّدٍ، كَمَا بَارَكْتَ عَلَى إِبْرَاهِيمَ وَعَلَى آلِ إِبْرَاهِيمَ، إِنَّكَ حَمِيدٌ مَجِيدٌ.
”ޔާ ﷲ. އިބްރާހީމްގެފާނާއި އިބްރާހީމްގެފާނުގެ އާލުންގެ މައްޗަށް އިބަﷲ ޞަލާވާތްލެއްވި ފަދައިން، މުޙައްމަދުގެފާނާއި މުޙައްމަދުގެފާނުގެ އާލުންގެ މައްޗަށްވެސް ޞަލަވާތްލައްވާނދޭވެ! ހަމަކަށަވަރުން، އިބަﷲ އީ ހުރިހާ ޙަމްދަކާއި، ހުރިހާ މާތްކަމެއް ލިބިވޮޑިގެންވާ އިލާހެވެ. ޔާ ﷲ! އިބްރާހީމްގެފާނާއި އިބްރާހީމްގެފާނުގެ އާލުންގެ މައްޗަށް އިބަﷲ ބަރަކާތްލެއްވި ފަދައިން، މުޙައްމަދުގެފާނާއި މުޙައްމަދުގެފާނުގެ އާލުންގެ މައްޗަށްވެސް ބަރަކާތްލައްވާނދޭވެ! ހަމަކަށަވަރުން، އިބަﷲ އީ ހުރިހާ ޙަމްދަކާއި، ހުރިހާ މާތްކަމެއް ލިބިވޮޑިގެންވާ އިލާހެވެ.“
ހަމަމިއާއެކު، ފިރިހެނުން ހުކުރު ނަމާދަށް ދިއުމަށް ސަމާލުކަން ދޭންޖެހެއެވެ. ހުކުރު ޚުތުބާ ކަނުލާ އަޑުއެހުން މުހިންމެވެ. ޚުތުބާގައި ދެކެވޭ ވާހަކަތައް ރަނގަޅަށް އަޑުއަހާ، އެއާމެދު ވިސްނާ ފިކުރުކުރަން ވާނެއެވެ. ޚުތުބާ ފެށުމުގެ ކުރިން ހުކުރަށް ޖަމާޢަތަށް ދިއުމަށް ފަރުވާތެރިވާންވާނެއެވެ. އަންހެނުންނަށްވެސް ގޭގައި ތިބެގެން ހުކުރު ޚުތުބާ އަޑުއަހާލެވޭނެއެވެ. މީގެއިތުރުން، ހުކުރު ދުވަހުގައިވެސް ދުޢާ ކުރުން ގިނަކުރަން ޖެހެއެވެ. ހުކުރު ދުވަހުގައި ދުޢާ އިޖާބަކުރައްވާ ވަގުތެއެވެއެވެ. އެވަގުތާއި ދިމާވާނީ ގިނަގިނައިން ދުޢާ ކުރީމައެވެ. ބޭނުންވާ ކަންތައްތައް މާތް ﷲގެ ހަޟްރަތުގައި ދަންނަވަންވީއެވެ. ހަމައެހެންމެ، ހުކުރު ދުވަހަކީ ގިނަގިނައިން ޛިކުރުކޮށް، މާތް ﷲގެ ހަޟްރަތަށް ތަޢުބާވުން އިތުރުކުރާ ދުވަހަކަށް ހަދަންޖެހެއެވެ. ނަފުސު ހިސާބުކޮށް އިސްލާހު ކުރެވޭނީ އޭރުންނެވެ. މިއީ ހުކުރު ދުވަހުގައި ކުރުން އާދަކުރުން މުހިންމު ކަންތައްތަކެވެ.
