ރާއްޖޭގައި އުޅޭ ބިދޭސީންގެ މައުލޫމާތު އެއްކުރަން ސަރުކާރުން ފަށާފައިވާ ”އޮޕަރޭޝަން ކުރަނގި“ ގެ ދަށުން މާލެ ސަރަހައްދުގައި މިއަދު ހިންގި އޮޕަރޭޝަންގައި 1،455 މީހެއްގެ މައުލޫމާތު އެއްކޮށްފައިވާ ކަމަށް ހޯމް މިނިސްޓަރު އަލީ އިހުސާން ވިދާޅުވެއްޖެ އެވެ.
މިއަދުގެ ހެނދުނު 8:00 އިން ހަވީރު 6:00 އާ ހަމައަށް ކުރިއަށް ގެންދިޔަ އެ އޮޕަރޭޝަނާ ގުޅޭ ގޮތުން އެކްސްގައި ކުރެއްވި ޕޯސްޓެއްގައި އިހުސާން ވިދާޅުވީ، މިއީ އެ އޮޕަރޭޝަން މާލޭ ސަރަހައްދުގެ ޕްރައިވެޓް އަދި އާންމު ތަންތަނަށް ފުޅާކޮށް ފެށި ދުވަސް ކަމަށެވެ.
އިހުސާން ވިދާޅުވިގޮތުގައި މިއަދު ވަނީ މަސައްކަތްތެރިންގެ 10 އިނގިލީގެ ނިޝާނާއި ފޭޝަލް ރިކޮގްނިޝަނަށް ބޭނުންވާ ފޮޓޯ ނަގައިފަ އެވެ.
”މިއަދު ކުރެވުނު މަސައްކަތުން ވަނީ 1،455 ބިދޭސީ މަސައްކަތްތެރިންގެ 10 އިނގިލީގެ ނިޝާން އަދި ފޭޝަލް ރިކޮގްނިޝަނަށް ބޭނުންވާ ފޮޓޯ ނެގި ޑޭޓާބޭސް އަޕްޑޭޓް ކުރެވިފައި،“ އިހުސާން ވިދާޅުވި އެވެ.
ރާއްޖޭގައި އުޅޭ ހުރިހާ ބިދޭސީންގެ ބަޔޮމެޓްރިކް މައުލޫމާތު ނަގަން ފަށައި، ގަވާއިދާ ހިލާފަށް އުޅޭ ބިދޭސީން ގަވާއިދަށް ފެއްތުމަށް ”ކުރަނގި“ އޮޕަރޭޝަން ފެށީ މިދިޔަ އަހަރުގެ މޭ މަހުގެ ދެ ވަނަ ދުވަހު އެވެ.
މިދިޔަ އަހަރުގެ ނޮވެމްބަރު 17 ގައި ރައީސް ޑރ. މުހައްމަދު މުއިއްޒު އިއުލާންކުރެއްވި ގޮތުގައި، އެ ދުވަހާ ހަަމައަށް 10،000 ބިދޭސީންގެ މައުލޫމާތު އެއްކޮށްފައިވެ އެވެ. އޭގެ ފަހުން މިދިޔަ ދެ މަސް ދުވަހުގެ ތެރޭގައި 15،000 އަށް ވުރެ ގިނަ މީހުންގެ މައުލޫމާތު ނަގާފައިވާ ކަމަށް އިހުސާން ވިދާޅުވި އެވެ.
އެއާ އެކު މުޅި އޮޕަރޭޝަނުގައި މިހާތަނަށް ވަނީ 25،483 މީހެއްގެ ބަޔޮމެޓޮރިކް މައުލޫމާތު ނަގާފަ އެވެ.
އިހުސާން ވިދާޅުވީ، ރާއްޖޭގައި ގަވާއިދާ ހިލާފަށް އުޅެމުންދާ ބިދޭސީންގެ މައްސަލަ އަށް ދާއިމީ ހައްލެއް ހޯދުމަށް ރައީސް މުއިއްޒުގެ ވައުދުގެ ދަށުން މަސައްކަތް ކުރަނީ ތިން އަހަރަށް އެކުލަވާލާފައިވާ ޕްލޭނެއްގެ ދަށުން ކަމަށެވެ.
އެ އޮޕަރޭޝަން ނިންމާލާނީ އޭޕްރީލް 2027 ގަ އެވެ.
ބިދޭސީންގެ މައްސަލަ ހައްލުކުރުމަށް މުވައްޒަފުންނާއި ކައުންސިލްތަކުން ކުރަމުންދާ މަސައްކަތްތަކަށް ވެސް މިނިސްޓަރު ޝުކުރު އަދާކުރެއްވި އެެވެ.
”ﷲގެ އިރާދަފުޅާ އެކު ކާމިޔާބު ކަމާ އެކު ނިންމާލެވޭނީ 2027 ވަނަ އަހަރު އޭޕްރީލް މަހުގައި. މި މަސައްކަތުގައި މިނިސްޓްރީގެ ފޮރިން ލޭބާ ޑިޕާޓްމަންޓާއި އިމިގްރޭޝަން އަދި ފުލުހުންނާއި މުޅި ހޯމް ސެކްޓާގެ މުވައްޒަފުންނާއި ކައުންސިލްތަކުން ކުރައްވާ ބުރަ މަސައްކަތް ފާހަގަކޮށް ޝުކުރު ދަންނަވަން،“ މިނިސްޓަރު ވިދާޅުވި އެވެ.
ބިދޭސީންގެ ބަޔޮމެޓްރިކް ޑޭޓާ އެއްކުރުމުގެ މަސައްކަތް 185 ރަށެއްގައި ކުރިއަށް ގެންދާއިރު އޭގެ ތެރެއިން 55 ރަށެއްގައި އެ މަސައްކަތް އެއްކޮށް ވަނީ ނިންމާލައިފަ އެވެ.
ގަވާއިދާ ހިލާފަށް ރާއްޖޭގައި އުޅުނު 5،000 އަށް ވުރެ ގިނަ މީހުން މިހާތަނަށް ވަނީ ޑީޕޯޓް ކޮށްލައިފަ އެވެ. އެއީ ގަވާއިދާ ހިލާފަށް ރާއްޖޭގައި އުޅޭ ބިދޭސީންގެ މައްސަލަ ހައްލުކުރުމަށް ހޯމް މިނިސްޓްރީ އާއި ފުލުހުންނާއި އިމިގްރޭޝަން ގުޅިގެން ކުރަމުންދާ މަސައްކަތުގެ ދަށުން އަޅާ ފިޔަވަޅެކެވެ.
