އަބަދުވެސް މަސައްކަތްޕުޅު ކުރައްވަނީ ރައްޔިތުން އެދޭ ގޮތަށް މަޝްރޫއުތައް ހިންގައި، އުއްމީދުތައް ހާސިލް ކޮށްދެއްވުމަށް ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.
ރައީސް ރ. އަތޮޅުގެ ރަށްތަކަށް މިހާރު ކުރައްވާ ދަތުރުފުޅުގައި މިއަދު ހެނދުނު ވަނީ ހުޅުދުއްފާރަށް ވަޑައިގެން އެ ރަށު ކައުންސިލާއި ރައްޔިތުންނާ ވެސް ބައްދަލުކުރައްވައިފަ އެވެ.
ހުޅުދުއްފާރުގެ ރައްޔިތުންނާ ބައްދަލުކުރައްވަން ބޭއްވި ޖަލްސާގައި ރައީސް ވިދާޅުވީ އެ މަނިކުފާނު އަބަދުވެސް ވިސްނަވަނީ އަދި އިސްކަން ދެއްވަނީ ވެސް ރައްޔިތުންގެ ވިސްނުމާ އެއްގޮތަށް ކަމަށާއި ރައްޔިތުން ބޭނުންވާ ގޮތަށް ކަންކަން ފަހިކޮށްދިނުމަށް ކުރެއްވެން ހުރި ހުރިހާ ކަމެއް ކުރައްވާ ކަމަށެވެ. އަބަދުވެސް ގެންގުޅުއްވާ ސިޔާސަތަކީ ރައްޔިތުން ބޭނުންވާ ގޮތަށް ކަންކަން ފަހިކޮށްދިނުން ކަމަށް ރައީސް ވިދާޅުވި އެވެ.
”އަޅުގަނޑު އަބަދުވެސް ވިސްނަނީ ރައްޔިތުން ވިސްނާ ގޮތަށް، ރައްޔިތުން ބޭނުންވާ ގޮތަށް ކަންކަން ފަހިކުރެވޭ ގޮތްގޮތް ހޯދައިގެން އެ ގޮތަކަށް ކަންކަން ކުރަން،“ ރައީސް މުއިއްޒު ވިދާޅުވި އެވެ.
ރަށްރަށަށް ވަޑައިގެން ކައުންސިލްތަކާއި ރައްޔިތުންނާ ބައްދަލުކުރެއްވުމުގެ މަގުސަދަކީ ވެސް ރައްޔިތުން އެދޭ ގޮތަށް މަޝްރޫއުތައް ހިންގުމަށް ކަމަށް ރައީސް ވިދާޅުވި އެވެ.
”އަޅުގަނޑު އަބަދުވެސް މަސައްކަތްކުރަނީ ރައްޔިތުންގެ އުއްމީދުތައް ހާސިލްކޮށްދިނުމުގައި، ރައްޔިތުންނަށް ކަންކަން ފަހިކޮށްދިނުމުގައި، ރައްޔިތުންގެ އަމާޒަށް ކަންކަން ނިންމައިދިނުމަށް. އެހެންވީމާ އެ އުއްމީދު ތި ބޭފުޅުންނަށް ވަރަށް ޔަގީންކަމާ އެކު ދެން،“ ރައީސް ވިދާޅުވި އެވެ.
ހުޅުދުއްފާރުގައި ބޭއްވި ޖަލްސާގައި އެ މަނިކުފާނު ވަނީ އެ ރަށުގައި ހިންގަމުން އަންނަ މަޝްރޫއުތަކާއި އަލަށް ފަށަން ހުރި މަޝްރޫއުތަކުގެ މަސައްކަތް އަވަސްކޮށްދެއްވާނެ ކަމަށް ވިދާޅުވެފަ އެވެ.
ހުޅުދުއްފާރުގައި ބީއެމްއެލް އާއި އެމްއައިބީގެ އޭޓީއެމްއެއް ބެހެއްޓުމަށް އެކަމުގެ އެއްބަސްވުމުގައި ވެސް މިއަދުގެ ޖަލްސާގައި ވަނީ ރަށު ކައުންސިލާ އެކު ސޮއިކޮށްފަ އެވެ.
