ކުރީގެ ފިލްމީ ތަރި ނިއުމާ މުހައްމަދު މާލެ ދޫކޮށް ރަށަކަށް ދިިރިއުޅުން ބަދަލު ކުރުމާ ގުޅޭ ގޮތުން މީޑިއާއަކުން ގެނެސްދިން އާޓިކަލެއްގެ ސްކްރީންޝޮޓަކާ އެކު ކުރީގެ ލަވަކިޔުންތެރިޔާ އަލީ ރަމީޒް މިއަދު ސޯޝަލް މީޑިއާގައި ހިއްސާކުރި ޕޯސްޓަކާ ގުޅިގެން ނިއުމާ ރުޅިގަދަވެ، ރައްދު ދީފި އެވެ
މިހާރު ދީނީ ހޭލުންތެރިކަން އުފެއްދުމުގެ މަސައްކަތުގައި އުޅޭ އަލީގެ ޕޯސްޓްގައި ބުނީ މުޑުދާރު ފިލްމުތައް ކުޅުމާއި މިއުޒިކް ކުޅުން ފަދަ ހަރާން ކަމުން ލިބޭނެ ހިތްހަމަޖެހުމެއް ނޯންނާނެ ކަމަށެވެ. އަދި އެފަދަ މަސައްކަތުން މީހުންނާއި އިހުތިރާއި ލޯބި ލިބޭނެ ކަމަށް ހީކުރުމަކީ ޝައިތާނީ ވަސްވާސް ކަމަށެވެ.
އަލީ ބުނީ އެފަދަ މީހުން ހާލުގައި ޖެހޭ ދުވަހު ”އެއްކަލަ ލޯބިވާ“ އެއްވެސް މީހަކު ވެސް ނުހުންނާނެ ކަމަށެވެ.
”ﷲ އަށް ތައުބާވެ، ތިޔަ މުޑުދާރު މަސައްކަތާ ދުރުވެ އިއްފަތްތެރި މުސްލިމެއްގެ ގޮތުގައި ހަޔާތުގެ ބާކީ ބައި ހޭދަކުރުމަށް އުޙްތާ އަށް އަޅުގަނޑު ނަސޭހަތްތެރިވަން.“ އޭނަ ބުންޏެވެ.
މީގެ ރައްދުގައި ނިއުމާ ބުނީ އޭނަ އަކީ އޮރިޔާން ފިލްމު ކުޅެގެން މަޝްހޫރުވި މީހެއް ނޫން ކަމަށާއި ފިލްމީ މަސައްކަތްކޮށްގެން ހޯދީ ހަލާލު ފައިސާ ކަމަށެވެ.
”މުޑުދާރު ލަވަތައް ކިޔައިގެން މީނަ އަށް ލިބުނު ލާރި އަށް ކީއްބާ ކުރީ،“ ގދ. ވާދު އަށް އުފަން ބަތަލާ ބުންޏެވެ. ”…ކޮންމެހެން މަށާ ބެހޭނެ ކަމެއް ނެތް އަލީ ރަމީޒަކަސް.“
ނިއުމާ އަކީ 1994 ގެ ސިލްސިލާ ”ހިތި ތަޖުރިބާ“ އިން ފިލްމީ ދާއިރާ އަށް ނުކުމެ ވަރަށް ގިނަ މަސައްކަތްކޮށްފައިވާ ބަތަލާއެކެވެ. އޭނަ ފިލްމު ކުޅުން ހުއްޓައިލީ 2019 ގެ ”ނިވައިރޯޅި“ އަށް ފަހުގަ އެވެ. އެކަމަކު އޭގެ ފަހުން ވެސް ފިލްމުގައް ޕްރޮޑިއުސްކޮށްފައިވެ އެވެ.
