އަޅުގަނޑުމެންގެ ތެރޭގައި ގިނަ މީހުންނަކީ މަދުވެގެން ދުވާލަކު 8 ގަޑިއިރު ވަޒީފާގައި ހޭދަކުރާ މީހުންނެވެ. މިގޮތަށް ވަޒީފާގައި ހޭދަވާ ވަގުތު ތަފާތު އެކިކަންކަމާ ސްޓްރެސްވެ، މީހާ ވަރަށް ބޮޑަށް ”ބާންއައުޓު“ ވެއެވެ.
އެހެންކަމުން، މިފަހަރު މި ހިމަނާލަނީ ވަޒީފާ ނިންމާފައި އައިސް ބޯހަމަޖައްސާލުމުގެ ގޮތުން ކުރަންވީ ބައެއް ކަންކަމެވެ.
ހިނގާލަން ދިއުން
މީހާ ހެލިފެލިވެ އުޅެ ޖިސްމާނީ ހަރަކާތްތައް ކުރާނަމަ އޭގެ ސަބަބުން ހަށިގަނޑުން ސްޓްރެސް ހޯމޯނު ބޭރުކުރާނެއެވެ. އަދި އޭގެ ސަބަބުން މީހާ ހަމައަކަށް އެޅޭނެއެވެ. ވީމާ ވަޒީފާ ނިންމާލާފައި ކޮންމެ ދުވަހަކުވެސް ގެއަށް އައިސް ހިނގާލަން ނުވަތަ ކަސްރަތު ކުރަން ވަގުތުކޮޅެއް ހޭދަކުރާނަމަ މީހާ ސްޓްރެސްއާ ދުރުވެ، ސިކުނޑި ހަމައަކަށް އެޅޭނެއެވެ.
އަމިއްލަ ނަފްސަށް އަޅާލުން
ކޮންމެ ދުވަހަކުވެސް ޑިއުޓީ ނިންމާލާފައި އައިސް ބޯ ހަމަ ޖައްސާލައި ސިކުނޑިއަށް އަރާމެއް ދިނުމަށްޓަކައި އަމިއްލަ ނަފްސަށް އަޅާލުމުގެ ގޮތުން ކުރާ ކަމެއް ކުރުމަކީވެސް ވަރަށް މުހިންމު ކަމެކެވެ. އެގޮތުން ކުރެވިދާނެ ބައެއް ކަންކަމުގެ ތެރޭގައި ތާފެނާ ފެނުން ފެންވެރުން، ނުވަތަ ”ސްކިން ކެއާ“ ގެ ގޮތުގައި ކޮންމެވެސް ކަމެއް ކުރުން ހިމެނެއެވެ. މިހެން ކަންތައް ކުރުމުން މީހާގެ ނާރުތަކުގެ ނިޒާމުގެ މަސައްކަތްތައް އިތުރަށް ފުރިހަމަވެ، ހަމަޖެހިލެވޭނެއެވެ.
ކެއްކުން
ވަޒީފާގައި ހުރެފައި އައިސް ބޭރުން އޯޑަރު ކޮށްގެން ކާއެއްޗެހި ކެއުން މިއީ ވަރަށް ފަސޭހަ ކަމެކެވެ. ނަމަވެސް ޑިއުޓީ ގަޑިއަށްފަހު ގެއަށް އައިސް ފައިދާހުރި ކާއެއްޗެއް ކެއުމަށް ސަމާލުކަން ދިނުމަކީ ވަރަށް މުހިންމު ކަމެކެވެ. އެހެންކަމުން މަސައްކަތުގެ މައިދާނުގައި ދިމާވި ސްޓްރެސް އާ ދުރުވެ ބޯ ހަމަޖައްސާލަން ބޭނުންވާނަމަ ކޮންމެ ދުވަހަކުވެސް ގެއަށް އައިސް ކޮންމެވެސް އެއްޗެއް ކެއްކުމަށް އާދަކުރަން ޖެހެއެވެ. މިކަމުގެ ސަބަބުން ސިކުނޑީގައިވާ މަސައްކަތާ ބެހޭ ހިޔާލުތަކާ ދުރަށްދެވި، މީހާވެސް ހަމަޖެހޭނެއެވެ.
މަސްދަރު: އީޓައިމްސް
